1 usd = 72.22 inr 1 gbp = 90.41 inr 1 eur = 81.73 inr 1 aed = 19.67 inr 1 sar = 19.25 inr 1 kwd = 237.31 inr

Dec / 2018
11
Tuesday

ആത്മയുദ്ധങ്ങൾ: പടനായകരും പലായികളും

July 14, 2018 | 04:48 PM IST | Permalink



ആത്മയുദ്ധങ്ങൾ: പടനായകരും പലായികളും

ഷാജി ജേക്കബ്‌

ധിഭൗതികവും അമൂർത്തവും വൈയക്തികവും മിത്തിക്കലും ഭാഷാനിഷ്ഠവുമായ പാരമ്പര്യംപോലെതന്നെ ഭൗതികവും മൂർത്തവും സാമൂഹികവും ചരിത്രപരവും ഭാഷണനിഷ്ഠവുമായ പാരമ്പര്യവും സാഹിത്യത്തിനുണ്ട്. പൊതുവെ യൂറോപ്യൻഭാവന തുടക്കം മുതൽ പുലർത്തിപ്പോരുന്നത് ഈ രണ്ടാം പാരമ്പര്യമാണെങ്കിൽ ആധുനികതവരെയും ഇന്ത്യൻഭാവനയിൽ മേൽക്കോയ്മ പുലർത്തിയത് ആദ്യപാരമ്പര്യമായിരുന്നു. പിന്നീടുള്ള കാലത്ത് ഇരുപാരമ്പര്യങ്ങളും ഒരുമിച്ച് മുന്നോട്ടൊഴുകിത്തുടങ്ങി. ഒരളവോളം ഒന്നാംപാരമ്പര്യത്തിൽനിന്നുള്ള വിച്ഛേദം തന്നെയായിരുന്നു ആധുനികത എന്നറിയപ്പെട്ടതുതന്നെ. പലപ്പോഴും ഇവ തമ്മിലുള്ള സയുക്തികമായ കലർപ്പും കൊടുക്കൽവാങ്ങലുകളും സംഭവിക്കുകയും ചെയ്യുന്നു.

സൗന്ദര്യകല എന്ന നിലയിൽ സാഹിത്യത്തെ സമീപിക്കുന്ന നിരൂപണത്തിന്റെ ചരിത്രവും സമാനമാണ്. ആധുനികതയിൽ മാത്രം നിരൂപണം രൂപംകൊണ്ട മലയാളം പോലുള്ള ഭാഷകളിൽ കഥ മറ്റൊന്നാണ്. സാഹിത്യത്തെ ഒരു സൗന്ദര്യവസ്തു എന്ന നിലയിൽകണ്ട് വിമർശനാത്മകമായി വിലയിരുത്തുന്ന ആദ്യ മലയാളരചന (ഒ. ചന്തുമേനോൻ ഇന്ദുലേഖക്കെഴുതിയ ആമുഖം-അവതാരിക) തന്നെ അതിന്റെ ലാവണ്യകലയെ സമീപിച്ചത് ചരിത്രാത്മകവും സാമൂഹികവും ഭൗതികവും മൂർത്തവുമായാണ്. തുടർന്നിങ്ങോട്ട് ചുരുക്കം ചില സന്ദർഭങ്ങളിൽ മാത്രമാണ് മലയാളനിരൂപണം സാഹിത്യത്തെ ഒരമൂർത്ത കലയായി കണ്ടു വിശകകലനം ചെയ്യുന്നത്. സി.പി. അച്യുതമേനോനും കേസരിയും മുണ്ടശ്ശേരിയും മാരാരും പോളും കുറ്റിപ്പുഴയും ഉൾപ്പെടുന്ന ഘട്ടങ്ങൾ നോക്കുക. മേല്പറഞ്ഞ ഇരുപാരമ്പര്യങ്ങളുടെയും സയുക്തികമായ കൂടിക്കലരൽ കാണാം. ഇക്കാലത്തു രൂപംകൊണ്ട യാന്ത്രിക ഭൗതികവാദികളായ ആദ്യകാല കമ്യൂണിസ്റ്റ് നിരൂപകരെയും എഴുത്തുകാരെയും വിട്ടുകളയുക. ഒറ്റക്കണ്ണൻ കാഴ്ചകൾക്ക് എക്കാലത്തും അത്രയേ കഴിയൂ. ഒരുപക്ഷെ ഭൗതിക-അധിഭൗതിക ഭാവലോകങ്ങളുടെ കൂടി സംഘർഷഭൂമിയായി മാറിയ ആധുനികതാവാദ കാലത്താണ് കുറെയെങ്കിലും ഊർജ്ജം ഒന്നാം പാരമ്പര്യത്തിനു മാത്രമായി മലയാളനിരൂപകർ ചെലവഴിച്ചത്. ഉത്തരാധുനികതയിലും ആ സ്ഥിതി തുടരുകയാണ്. ഏറ്റവുമൊടുവിൽ തസ്രാക്കിലെ വിജയൻ വിവാദം വെളിപ്പെടുത്തുന്നതും വാദഗതികളിൽ ദുർബ്ബലമെങ്കിലും എണ്ണത്തിൽ ആധുനികതാവാദകാലം മുതൽ ഒന്നാം പാരമ്പര്യക്കാർ അത്ര കുറവല്ല എന്ന വസ്തുതയാണ്. പക്ഷെ കൗതുകമെന്തെന്നുവച്ചാൽ സക്കറിയയെപ്പോലുള്ള ലിബറൽ ഭൗതികവാദികളെ എതിർക്കുന്നത് ആത്മീയവാദികൾ മാത്രമല്ല, കമ്യൂണിസ്റ്റ് ഭൗതികവാദികൾ മുതൽ കമ്യൂണിസ്റ്റ് വിരുദ്ധ മാനവികതാവാദികൾ വരെയാണ് എന്നതാണ്. ഹിന്ദുത്വവാദത്തിന്റെ പേരിൽ വിജയനെ വിമർശിച്ച സക്കറിയയെ ഇസ്ലാമിക പ്രീണനത്തിന്റെ പേരിൽ അവരിൽ ചിലർ പ്രതിക്കൂട്ടിൽ കയറ്റുന്നു. ഈവിധം സാഹിത്യമണ്ഡലത്തെ നിർണായകമായി സ്വാധീനിക്കുന്ന ആത്മ-അപരവാദങ്ങളുടെയും ബോധങ്ങളുടെയും സംഘർഷഭൂമിയിൽ നിന്ന് ബെന്നി ഡൊമനിക്കിന്റെ 'ആത്മശൈലങ്ങളിലെ യാത്രികർ' വായിച്ചുനോക്കൂ. സാഹിത്യം എഴുത്തല്ല, വായനയാണ് എന്ന് വളരെവേഗം ബോധ്യപ്പെടും.

രണ്ടുഭാഗങ്ങളിലായി പതിനെട്ടു പഠനലേഖനങ്ങൾ. ആറെണ്ണം വിശ്വസാഹിത്യത്തെക്കുറിച്ച്. നിക്കോസ് കസാൻദ് സാക്കീസ് മുതൽ സബാഹാറ്റിൻ ആലി(തുർക്കി)വരെയുള്ള എഴുത്തുകാരെക്കുറിച്ച്; ആഖ്യാനങ്ങളിലെ ക്രിസ്തു മുതൽ ആത്മയുദ്ധങ്ങളിലെ പടനായകർ വരെയുള്ളവരുടെ ഭാവലോകങ്ങളെക്കുറിച്ച്; നോവലിലെ ദേശഭാവന മുതൽ വിശ്വകവിതയിലെ രാഷ്ട്രീയമാനവികത വരെയുള്ള അനുഭവമണ്ഡലങ്ങളെക്കുറിച്ച്-ഈ ലേഖനങ്ങൾ ചർച്ചചെയ്യുന്നു.

ഇരുപതാം നൂറ്റാണ്ടിലെ ഏറ്റവും വലിയ എഴുത്തുകാരിലൊരാളായി ലോകം അംഗീകരിക്കുന്ന കസാൻദ് സാക്കീസിന്റെ രചനകളിലൂടെയുള്ള ഒരു ലാവണ്യസഞ്ചാരമാണ് ആദ്യലേഖനം. ദസ്തയവ്‌സ്‌കിക്കുശേഷം ദൈവാഭിമുഖമായി മനുഷ്യൻ നടത്തിയ ആത്മസഞ്ചാരങ്ങളുടെ ഇതിഹാസങ്ങൾ രചിച്ച കസാൻദ് സാക്കീസിന്റെ കാവ്യകലയുടെ വിശകലനം. ഗ്രീസിന്റെ ചരിത്രവും രാഷ്ട്രീയവും മുതൽ മർത്യാസ്തിത്വത്തിന്റെ നിത്യപ്രയാണങ്ങൾ വരെ; മിസ്റ്റിസിസത്തിന്റെ മൂടൽമഞ്ഞു മുതൽ ജീവിതാനന്ദത്തിന്റെ സൂര്യവെളിച്ചം വരെ; ഹിംസകളുടെ മരക്കുരിശു മുതൽ ആത്മബോധത്തിന്റെ ഉയിർത്തെഴുന്നേല്പുകൾ വരെ-കസാൻദ് സാക്കീസ് ദൈവത്തെയും രാഷ്ട്രത്തെയും ചരിത്രത്തെയും ഭാവനയെയും കുറിച്ചെഴുതിയവയെല്ലാം മനുഷ്യനെക്കുറിച്ചെഴുതിയതായിരുന്നു. പീഡിതരായ ജനതകൾ (രാഷ്ട്രീയം), പലായിയായ മനുഷ്യൻ (വ്യക്തി), പോരാളിയായ ക്രിസ്തു (ദൈവം) എന്നീ നിലകളിൽ തന്റെ കാലത്തെയും കല്പനയെയും കൂട്ടിയിണക്കിയ കസാൻദ് സാക്കീസിന്റെ മിക്ക കൃതികളെയും സ്പർശിച്ചുപോകുന്നു, ബെന്നി. ദസ്തയവ്‌സ്‌കി, കസാൻദ് സാക്കീസ്, സറമാഗു എന്നീ എഴുത്തുകാർ തമ്മിലുള്ള ഒരു സൂക്ഷ്മതാരതമ്യത്തിനും ഈ ലേഖനത്തിൽ ബെന്നി ശ്രമിക്കുന്നുണ്ട്.

രണ്ടാം ലേഖനത്തെ ഇതിന്റെ തുടർച്ചയായി കാണാം. ആഖ്യാനങ്ങളിൽ ക്രിസ്തു എങ്ങനെ മാംസവും രക്തവുമുള്ള മർത്യാനുഭവങ്ങളിൽ പുനർജ്ജനിക്കുന്നു എന്ന അന്വേഷണമാണിതിലുള്ളത്. പ്രത്യക്ഷവും പരോക്ഷവും പ്രതീകാത്മകവുമായ ക്രിസ്ത്വാനുകരണങ്ങളുടെ ഭാവലോകങ്ങൾ തേടുന്നു, ബെന്നി. ഹെമിങ്‌വേയുടെ കിഴവനിലും ബ്ലേക്കിന്റെ കടുവയിലും സാക്കീസിന്റെ ഫാദർ യാനറോസിലും സക്കറിയയുടെ പട്ടാളക്കാരനിലും വേശ്യയിലും സറമാഗോവിന്റെ യേശുവിലും കൂടി വളർന്നുപന്തലിക്കുന്ന മതേതരനും മാനവികനുമായ ഒരു ക്രിസ്തുവിനെക്കുറിച്ചുള്ള ചിന്തകളായി ഇതു മാറുന്നു.

ആത്മാന്വേഷണങ്ങളിൽ ഒഡിസിയൂസിനെപ്പോലെ ഐതിഹാസികമായി പങ്കുചേരുന്ന എത്രയെങ്കിലും കഥാപാത്രങ്ങളെക്കുറിച്ചാണ് മൂന്നാം ലേഖനം. ആത്മയുദ്ധങ്ങളിലെ പടനായകരാണവർ; പലായികളും. ഒരുപക്ഷെ ബെന്നിയുടെ സാഹിത്യനിരൂപണപദ്ധതിയുടെ താക്കോൽസ്ഥാനത്തുള്ളതും ഈയൊരു രൂപകമാണ്. വെർജിനിയവുൾഫിന്റെ 'മോഡേൺ ഫിക്ഷൻ' എന്ന പ്രബന്ധത്തിൽ റഷ്യൻ എഴുത്തുകാരുടെ ആത്മീയാന്വേഷണങ്ങളെക്കുറിച്ചു നടത്തുന്ന നിരീക്ഷണങ്ങൾ പിൻപറ്റിയുള്ള ഒരു സാഹിതീയവിചാരമാണ് ഈ ലേഖനം. ടോൾസ്റ്റോയിയുടെ 'ഇവാൻ ഇലിയിച്ചിന്റെ മരണം', ദസ്തയവ്‌സ്‌കിയുടെ 'കരമസോവ് സഹോദരന്മാർ', മിഖായേൽ ഷൊളൊഖൊവിന്റെ 'ഡോൺ' നോവലുകൾ, ബോറിസ് പാസ്തർനാക്കിന്റെ 'ഡോക്ടർ ഷിവാഗോ' തുടങ്ങിയ രചനകളാണ് ഇവിടെ വിശകലനം ചെയ്യപ്പെടുന്നത്. പ്രപഞ്ചത്തോടും ദൈവത്തോടും ലോകത്തോടുമെന്നല്ല, താനല്ലാത്ത എല്ലാത്തിനോടും യുദ്ധം ചെയ്യേണ്ടിവരുന്ന, ആയുധങ്ങളൊക്കെയും ഒരുതരത്തിലല്ലെങ്കിൽ മറ്റൊരു തരത്തിൽ ആത്മായുധങ്ങൾ കൂടിയായി മാറുന്ന മനുഷ്യന്റെ ആത്യന്തികമായ വിധിയെക്കുറിച്ചാണ് ഈ കൃതികളോരോന്നും സംസാരിക്കുന്നത്.

ലോകനോവലിലെ വിഖ്യാതങ്ങളായ ചില ദേശകല്പനകളെക്കുറിച്ചാണ് അടുത്തലേഖനം. ഭാവനാഭൂപടങ്ങൾ എന്ന നിലയിൽ എഴുത്തിലും വായനയിലും നോവൽ സൃഷ്ടിച്ച ഭാവുകത്വവിപ്ലവങ്ങളിലൊന്നായിരുന്നല്ലോ സ്ഥലത്തിന്റെ ഈ സാംസ്‌കാരികനിർമ്മിതി. എഴുത്തുകാർ പുനർജനിക്കുന്ന ഇടമായി ബെന്നി ഭാവനയിലെ ഈ സ്ഥലഭൂമികകളെ വിലയിരുത്തുന്നു. 'ആഖ്യായികാകാരൻ ദേശത്തെ പകർത്തുന്നവനല്ല; ദേശത്തെക്കുറിച്ചുള്ള സങ്കല്പത്തെ സൃഷ്ടിക്കുന്നവനാണ്. അയാളുടെ ദേശം ഒരു 'ടെറിട്ടറി' മാത്രമല്ല. ഫിക്ഷനിൽ ദേശം വളരുകയാണ്. സത്യസന്ധമായ ചിത്രീകരണം എന്നൊക്കെ പറയുന്നത് ഭാവനാശൂന്യതയ്ക്ക് കൈയൊപ്പു ചാർത്താൻ വേണ്ടിയാവരുത്. എഴുത്തുകാരന്റെ ദേശത്തെക്കുറിച്ച് പറയുമ്പോൾ വിശാലമായ അർത്ഥത്തിൽ അയാൾ ജീവിച്ച, സഞ്ചരിച്ച, വായിച്ചറിഞ്ഞ, സ്വപ്നം കണ്ട, കലഹിച്ച, സ്‌നേഹിച്ച ഇടങ്ങളെല്ലാം അയാളുടെ ദേശമാണ്. മഹത്തായ നോവലുകളിൽ ഈ ദേശത്തിന്റെ അതിരുകൾ മങ്ങിമായുകയും പുതിയ വിതാനങ്ങളിലേക്ക് വളരുകയും ചെയ്യുന്നതു കാണാൻ കഴിയും. തന്റെ ദേശത്തോടുള്ള സ്‌നേഹത്തോടൊപ്പം വിദ്വേഷവും അയാളിൽ പുതിയൊരു ദേശസങ്കല്പത്തെ വിരിയിച്ചെടുക്കുവാൻ പ്രേരിപ്പിക്കുന്നുണ്ടാവും. എന്നിരിക്കിലും ചവുട്ടിനിൽക്കാൻ സ്വന്തം മണ്ണ് ഇല്ലാത്തിടത്തോളം ഈ കലഹം പോലും അസാധ്യമാണ് എന്ന തിരിച്ചറിവാണ് ആസാമിലേക്ക് പോയ 'പരിഷകളെ'പ്പോലെ എഴുത്തുകാരനെ തന്റെ പിതൃഭൂമിയിലേക്ക് തിരികെയെത്തിക്കുന്നത്. അയാൾ ഏതേതു ലോകങ്ങളിൽ സഞ്ചരിച്ചാലും ഇടപഴകിയാലും സ്വന്തം നാടിന്റെ പൈതൃകമോ പൈതൃകനിരാസമോ ഒരു പ്രബലഘടകമായി അയാളുടെ എഴുത്തിൽ തെളിഞ്ഞുവരാനാണ് സാധ്യത. പിതൃദേശവുമായി അയാളുടെ കലഹവും തീവ്രപ്രതികരണങ്ങളും ദേശസങ്കല്പത്തെ മാറ്റിവരയ്ക്കാൻ അയാളെ പ്രേരിപ്പിക്കുന്നുണ്ടെങ്കിലും എല്ലാ നല്ല എഴുത്തും സ്‌നേഹത്തിന്റെ പാരിജാത മലരുകൾ വിടർന്നുനിൽക്കുന്ന ഇടങ്ങളാണ്. ദേശം എഴുത്തുകാരനെ രൂപപ്പെടുത്തുകയും എഴുത്തുകാരൻ ദേശത്തെ മാറ്റിവരയ്ക്കുകയും ചെയ്യുന്നു. എഴുത്തിന്റെ രാസപ്രവർത്തനം ഇങ്ങനെയാണ് സംഭവിക്കുന്നത്. എല്ലാ മികച്ച എഴുത്തുകാരും ദേശത്തിന്റെ ഒരു മൂന്നാംതലം സൃഷ്ടിക്കുന്നവരാണ്'.

വിജയനിലും തകഴിയിലും ചിനു അച്ചേബയിലും നിന്നു തുടങ്ങുന്ന ഈ ദേശവിചാരം മാർക്കേസിന്റെ മക്കൊണ്ടൊ, ഹാർഡിയുടെ വെസക്‌സ്, ഫോക്‌നറുടെ യോക്‌നാപട്ടാഫാ, തോമസ്മന്നിന്റെ ദാവോസ്, ഗുമോറാ റോസയുടെ സെർതാവോ, ഇവാ ആൻഡ്രിച്ചിന്റെ ഡ്രീനാ എന്നീ സ്ഥലഭൂപടങ്ങളെ നോവലുകളിൽ നിന്നു വിടർത്തിയഴിച്ചെടുക്കുന്നു. (ജന)സംസ്‌കൃതിയുടെയും (ദേശ)ചരിത്രത്തിന്റെയും ഉഭയരാഷ്ട്രീയം സന്നിവേശിപ്പിച്ചുകൊണ്ടാണ് ഈ നോവലുകളോരോന്നും സ്ഥലഭാവനകളെ മനുഷ്യാനുഭവങ്ങളുടെ മഹാഗാഥകളാക്കി മാറ്റുന്നത്. ബെന്നി എഴുതുന്നു: 'ചരിത്രത്തിന്റെ നീരൊഴുക്കു വറ്റിയ വരണ്ട ഭൂപടങ്ങളല്ല എഴുത്തുകാരന്റെ വാക്കുകളിൽ വന്നു നിറയുന്നത്. ചരിത്രത്തിൽ ആരാലും തിരിച്ചറിയപ്പെടാതെ അമർന്നുകിടന്നിരുന്ന ഫോസിലുകളെ പൊക്കിയെടുത്തു/ഒപ്പിയെടുത്തു ജീവൻ കൊടുക്കുന്ന സ്പീൽബർഗിയൻ ദൗത്യമാണ് എഴുത്തുകാരന് നിർവഹിക്കാനുള്ളത്'.

'ലോകകവിതയുടെ ഛായാപടങ്ങൾ' എന്ന ലേഖനം കവിത നിർവഹിക്കുന്ന രാഷ്ട്രീയദൗത്യങ്ങളെക്കുറിച്ചുള്ള ഒരന്വേഷണമാണ്. പാബ്ലോനെരൂദയും ഗാർസിയാ ലോർക്കയും അഡോണിസും തങ്ങളുടെ കവിതകളിൽ പൊരുതുന്ന, തോറ്റ, വിലപിക്കുന്ന മനുഷ്യർക്കുവേണ്ടി ഉയർത്തിയ മാനവികതയുടെ താരസ്വരങ്ങളെക്കുറിച്ചുള്ള വിശകലനമാണീ ലേഖനം. വാൾട്ട് വിറ്റ്മാൻ മുതൽ മഹ്മൂദ് ദർവീഷും ഡെറക് വാൽക്കോട്ടും വരെയുള്ളവരുടെ കാവ്യകല്പനകളുടെ സൂചനകളും. നെരൂദയുടെ കവിതകളെക്കുറിച്ചുള്ള ചർച്ചയാണ് വിശ്വസാഹിത്യത്തെക്കുറിച്ച് ബെന്നി എഴുതിയ ആറു ലേഖനങ്ങളിൽ ഏറ്റവും മികച്ചത്. ചരിത്രത്തെയും ഭാവനയെയും അധികാരത്തെയും മാനവികതയെയും പ്രണയത്തെയും രാഷ്ട്രീയത്തെയും ഇത്രമേൽ കൂട്ടിയിണക്കിയ കാവ്യഭാവന മറ്റൊന്നില്ല എന്നു തീർപ്പുകല്പിക്കുന്നു, ബെന്നി.

ഒന്നാം ഭാഗത്തെ ഒടുവിലത്തെ ലേഖനം തുർക്കി നോവലിസ്റ്റായ സബാ ഹാറ്റിൻ ആലിയുടെ 'മഡോണ ഇൻ എ ഫർകോട്ട്' എന്ന നോവലിനെക്കുറിച്ചാണ്. ഓർഹൻ പാമുക്കിനെക്കാൾ വലിയ എഴുത്തുകാരനായിട്ടും പാമുക്കിന്റെ താരപ്രഭയിൽ മങ്ങിപ്പോയ ആലിയെ ലോകം തിരിച്ചറിയുന്ന കാലമാണിതെന്നു സൂചിപ്പിക്കുന്നു, നിരൂപകൻ.

രണ്ടാം ഭാഗത്തുള്ളത് മലയാളസാഹിത്യവിചാരങ്ങളാണ്. ഒ.വി. വിജയന്റെ 'എണ്ണ', മലയാളഭാവനയിൽ 'കാഴ്ച'ക്കു കൈവന്ന രാഷ്ട്രീയം, പി. സുരേന്ദ്രന്റെ കഥകൾ, എം. കൃഷ്ണനായരുടെ സാഹിത്യവിമർശനം, മലയാളനോവലിലെ കീഴാള-ബദൽജീവിതങ്ങൾ, മരണത്തിന്റെ ഭാവനാപാഠങ്ങൾ, ഒരു തുഞ്ചൻസാഹിത്യോത്സവം, ഗാന്ധിയുടെ ഒരു ജീവചരിത്രം, ഇ. സന്തോഷ്‌കുമാറിന്റെ ചിദംബരരഹസ്യം, ഇടശ്ശേരിക്കവിത, വൈലോപ്പിള്ളിക്കവിത, സുന്ദരികളും സുന്ദരന്മാരും എന്നിവയെക്കുറിച്ചുള്ള വിശകലനങ്ങളാണ് ഉള്ളടക്കം.

 ലൈംഗികതയുടെ പ്രതീകാത്മക രചനയായി കെ.പി. അപ്പനും അധികാരത്തിന്റെ പാഠരൂപമായി ആഷാമേനോനും വായിച്ച 'എണ്ണ'യെന്ന കഥയുടെ അർഥബഹുലതകളിലേക്കു കടന്നുപോകുന്നു, ബെന്നി. കമ്പോളനാഗരികതയുടെയും ഉപഭോഗസംസ്‌കാരത്തിന്റെയും ആസുരഭാവങ്ങൾ പകർന്നാടുന്ന രചനയായും കാലത്തിന്റെ ജീർണതയെ, ജീർണിച്ച ബിംബകല്പനകൾ കൊണ്ടുതന്നെ റദ്ദുചെയ്യുന്ന ഭാഷയുടെ രസവിദ്യയായും ആഗോളവൽക്കരണത്തിന്റെ പ്രവചനരൂപമായും 'എണ്ണ' വായിച്ചെടുക്കുകയാണ് ഈ ലേഖനം.

സാങ്കേതികവിപ്ലവം സഷ്ടിച്ചിരിക്കുന്ന കാഴ്ചയുടെ ആറാമിന്ദ്രിയത്തെക്കുറിച്ചാണ് അടുത്ത ലേഖനം. സറമാഗുവിന്റെ 'അന്ധത'യിൽ തുടങ്ങി ഫ്രെഡറിക് ജയിംസൺന്റെ കാഴ്ചയെക്കുറിച്ചുള്ള പ്രബന്ധത്തിലൂടെ സഞ്ചരിച്ച് ഓർഹൻ പാമുക്കിന്റെ 'മ്യൂസിയം ഓഫ് ഇന്നസെൻസി'ലൂടെ മുന്നേറി ഹോമറിന്റെയും മിൽട്ടൺന്റെയും ബോർഹെസിന്റെയും ആന്ധ്യങ്ങളുടെ കഥപറഞ്ഞ് മലയാളകവിതയിലേക്കു വരുന്നു, ബെന്നി. കടമ്മനിട്ട, ശങ്കരപ്പിള്ള, അയ്യപ്പപ്പണിക്കർ... കൊമാലയും ആരാച്ചാരും മുൻനിർത്തി കാമറയുടെ കലയും കാഴ്ചയുമായി മാറുന്ന കഥയുടെ കാലവും സാധ്യതകളും ലേഖനം തിരയുന്നു. ദറിദയുടെ പ്രസിദ്ധമായ 'Memories of the Blind' വിട്ടുപോകുകയും ചെയ്തിരിക്കുന്നു, ബെന്നി.

പി. സുരേന്ദ്രന്റെ കഥാലോകത്തെ അതിശയോക്തികൾ കൊണ്ടഭിഷേകം ചെയ്യുന്ന രചനയാണ് അടുത്തത്. ഇങ്ങനെയുമുണ്ട് ചില നിരൂപകർ. ഒരുശ്വാസത്തിൽ ദസ്തയവ്‌സ്‌കി മുതൽ സറമാഗു വരെയുള്ളവരെക്കുറിച്ചെഴുതും. അടുത്തശ്വാസത്തിൽ മലയാളത്തിലെ ഏതെങ്കിലും അതിസാധാരണ കഥാകൃത്തുക്കളെക്കുറിച്ചുമെഴുതും. ഒരേ സ്വരം. ഒരേ നിറം. ബെന്നി തെന്നിവീണത് സുരേന്ദ്രനിലാണ്. ഒന്നല്ല, രണ്ടു ലേഖനങ്ങളിൽ. എം. കൃഷ്ണൻനായരുടെ സാഹിത്യവിചാരങ്ങളെ മുൻനിർത്തി അദ്ദേഹത്തിന്റെ സർഗപ്രതിഭയെ സമഗ്രമായടയാളപ്പെടുത്തുന്നു, അടുത്ത ലേഖനം. മലയാളിസാഹിത്യവായനക്കാരുടെ അഭിരുചി സംസ്‌കരണത്തിൽ ഇത്രമേൽ സ്വാധീനം ചെലുത്തിയ മറ്റൊരാളില്ല. സാഹിത്യപത്രപ്രവർത്തനം എന്ന വ്യതിരിക്തമായ ഒരു ശാഖയിൽ ചരിത്രം സൃഷ്ടിച്ച അസാമാന്യനായ വായനക്കാരനായിരുന്നു കൃഷ്ണൻനായർ.

സാമൂഹ്യവ്യവസ്ഥിതികളിൽനിന്ന് സ്വയം കലഹിച്ചു പുറത്തുപോയി ബദൽജീവിതങ്ങൾ കെട്ടിപ്പടുക്കുന്ന കഥാപാത്രങ്ങളെ മലയാളനോവലിൽനിന്നു കണ്ടെടുക്കുന്നു, ഇനിയൊരു ലേഖനം. സംസ്‌കൃതിയിൽനിന്നു പ്രകൃതിയിലേക്കു വഴിമാറി നടക്കുന്നു, ഖസാക്കിലെ രവി. അരികുകളിൽ തമസ്‌കരിക്കപ്പെടാതെ, സമാന്തരമായി ജീവിതം കുഴച്ചുണ്ടാക്കുന്ന മൂന്നു കഥാപാത്രങ്ങളാണ് 'കേറ്റങ്ങളുടെ മുന്നു ദശാബ്ദങ്ങ'ളിലുള്ളത്. അധഃസ്ഥിതർ വീണ്ടെടുക്കുന്ന ആത്മബോധത്തിന്റെ സ്വരങ്ങളാണ് 'കരിക്കോട്ടക്കരി'യിൽ മുഴങ്ങുന്നത്. തങ്ങളുടെ ഗോത്ര, വംശ സ്വത്വങ്ങളെ ആധുനികതയോടുള്ള കലഹങ്ങളാക്കി മാറ്റുന്നു, 'കൊച്ചരേത്തി'യിലെ ആദിവാസിജനത. ഭാഷയിലും ചരിത്രത്തിലും പ്രതിരോധമാക്കി വളർത്തുന്ന ഈ സ്വത്വബോധം തന്നെയാണ് 'മാവേലിമന്റ'ത്തിന്റെയും രാഷ്ട്രീയം.

എൻ. ശശിധരൻ നിർവഹിച്ചുനശിപ്പിച്ച സ്മാരക പ്രഭാഷണത്തിൽ തുടങ്ങിയ ഒരു തുഞ്ചൻ ഉത്സവത്തിന്റെ സാംഗത്യമേതുമില്ലാത്ത റിപ്പോർട്ടാണ് വേറൊരു രചന.

ഗാന്ധി ആധുനികതയോടു വിയോജിച്ചുനിന്നതിന്റെ മാനങ്ങളന്വേഷിക്കുന്നു, ഇനിയൊരു ലേഖനം. മർത്യബന്ധങ്ങളിലെ ഗൂഢനാടകങ്ങളെക്കുറിച്ചുള്ള ദീർഘോപന്യാസങ്ങളായി രചിക്കപ്പെട്ട 'ചിദംബരരഹസ്യം', 'കുന്നുകൾ, നക്ഷത്രങ്ങൾ' എന്നിവയുടെ നിരൂപണമാണ് അടുത്തത്. നിരവധി വിഖ്യാതരചനകളുമായി തുലനം ചെയ്തുകൊണ്ട് ആധുനികാനന്തര മലയാള കഥാസാഹിത്യത്തിലെ ഏറ്റവും മികച്ച എഴുത്തുകാരിലൊരാളായ സന്തോഷ്‌കുമാറിന്റെ രചനകൾ ബെന്നി സൂക്ഷ്മമായവലോകനം ചെയ്യുന്നു. ദാമ്പത്യത്തിന്റെ ആത്മയുദ്ധങ്ങളാണ് ഇരുകൃതികളുടെയും രംഗഭൂമിക. 'ആ ഭ്രാന്തൻ തിരകൾ കരയിറങ്ങുമ്പോൾ പഴയപടി ഞങ്ങൾ പെരുമാറി. പക്ഷേ, യഥാർത്ഥത്തിൽ മനുഷ്യർ തമ്മിലുള്ള ബന്ധത്തിന് വലിയ അടരുകളുണ്ടെന്നും, ഉടുപ്പുകൾ പോലെ നാം ധരിക്കുന്ന ചിരിക്കും വാക്കുകൾക്കുമപ്പുറത്ത്, ഉടയാടകളഴിഞ്ഞുപോയ ശരീരത്തിന്റെ മണവും മടുപ്പും ബാക്കിനിൽക്കുന്നുവെന്ന കണ്ടെത്തൽ.... എല്ലാം പഴയതുപോൽ തന്നെയെന്ന് അഭിനയിക്കുമ്പോഴും ഉള്ളിലെവിടെയോ ദഹിക്കാതെ കിടന്ന വെറുപ്പും കാലുഷ്യവും.... അരനൂറ്റാണ്ടിലേറെ ഒപ്പം പൊറുത്തിരുന്ന, സഹിച്ചിരുന്ന രണ്ടു വലിയ ഏകാന്തതകൾ... വലിയ രണ്ടു നിശ്ശബദതകൾ'.

ഇടശ്ശേരിയുടെ കാവ്യപ്രതിഭ മലയാളത്തിൽ വേണ്ടത്ര പരിഗണിക്കപ്പെട്ടില്ല എന്ന നിരീക്ഷണം മുന്നോട്ടുവച്ചുകൊണ്ട് 'പള്ളിക്കൂടത്തിലേക്ക്', 'പൂതപ്പാട്ട്', 'കുറ്റിപ്പുറംപാലം' തുടങ്ങിയ കവിതകൾ പുനർവായിക്കപ്പെടേണ്ടതിന്റെ ആവശ്യം ബെന്നി ചൂണ്ടിക്കാണിക്കുന്നു.

മലയാളകാവ്യഭാഷയുടെ ഏറ്റവും പ്രഫുല്ലമായ കാലത്തിന്റെ പ്രതിനിധികളായി ഇടശ്ശേരിയെയും വൈലോപ്പിള്ളിയെയും കണ്ടുകൊണ്ട് വൈലോപ്പിള്ളിക്കവിതക്കു ചുറ്റും നടത്തുന്ന ഒരു 'പ്രദക്ഷിണ നമസ്‌കാര'മാണ് 'എന്തുകൊണ്ട് വൈലോപ്പിള്ളി?'. ധൂസരമായ സംസ്‌കാരത്തിന്റെയും കാലത്തിന്റെയും കാവ്യവിമർശനങ്ങളെന്ന നിലയിൽ പാരമ്പര്യങ്ങളും ആധുനികതയും തമ്മിലുള്ള സംഘർഷത്തിന്റെ ഡോക്യുമെന്ററികളായി വൈലോപ്പിള്ളിക്കവിതകളെ വിലയിരുത്തുന്നു, ലേഖനം. 'മലയാളിയുടെ സ്വത്വം, സംസ്‌കാരം, ഗ്രാമീണജീവിതം, വൈവിധ്യമാർന്ന ലോകാവബോധം-ഇവയുടെ കറയറ്റ അവതാരപൂർണ്ണിമയായിരുന്നു വൈലോപ്പിള്ളി. സരളവും ജീവസ്സുറ്റതുമായ ജീവിത മുഹൂർത്തങ്ങളുടെ സുന്ദരവനികയായി ആ കവിത പരിലസിച്ചു. കേരളീയ ജീവിതത്തിന്റെ സമസ്ത സത്യ സൗന്ദര്യങ്ങളെയും നിസർഗ്ഗ സുന്ദരമായ കാവ്യ മഹിമയോടെ നെറ്റിപ്പട്ടം കെട്ടി എഴുന്നള്ളത്തിന് നിറുത്തി. സരളവും സമ്മോഹനവുമായ ഒരു ജീവിതവീക്ഷണത്തിന്റെ നിറങ്ങൾ ഒരു മഹാചിത്രകാരനെപ്പോലെ കടുപ്പിക്കാത്ത വർണ്ണങ്ങളിൽ ചാലിച്ച് വരച്ചുചേർത്തു ഈ 'വരകവി': വിഷയ സ്വീകരണത്തിലും പരിചരണത്തിലും അത്ഭുതകരമായ വൈവിധ്യങ്ങൾ പ്രദർശിപ്പിച്ചുകൊണ്ട് മരണം ഭരിക്കുന്ന മന്ദിരത്തിലും ജഗന്മംഗല വസന്തത്തെക്കുറിച്ച് പാടുന്ന ഒരു കാവ്യഭാഷ അങ്ങനെ രൂപപ്പെട്ടു. അകമേ പരിണാമം വരുത്തി, മനുഷ്യന് സ്വാസ്ഥ്യം നൽകുന്ന ശുശ്രൂഷികയാണ് എല്ലാ അർത്ഥത്തിലും വൈലോപ്പിള്ളിക്കവിതയെന്നത് ഇനിയും പറയേണ്ടതില്ലല്ലോ'.

ഉറൂബിന്റെ 'സുന്ദരികളും സുന്ദരന്മാരും' എന്ന നോവലിനെക്കുറിച്ചാണ് അവസാന ലേഖനം. ജീവിതത്തിന്റെ അർഥമന്വേഷിച്ചുള്ള യാത്രകളാണ് നോവലിലെ കഥാപാത്രങ്ങളുടേത്. ഓഷ്‌വിറ്റ്‌സിന്റെ ഇരയായിരുന്ന വിക്ടർ ഇ. ഫ്രാങ്ക്ൽന്റെ ''Man's search for Meaning', ബിമൽമിത്രയുടെ 'ഘടിദിയെ കിൻലാം' തുടങ്ങിയ രചനകളുടെ വായനയുമായി 'സുന്ദരി'കളുടെ വായനയെ ഈ ലേഖനം താരതമ്യം ചെയ്യുന്നു. ബെന്നി എഴുതുന്നു: 'ഈ നോവലിൽ അടിക്കടി കടന്നുവരുന്ന നൃത്തരംഗങ്ങൾക്ക് അതിന്റെ സാധാരണ അർത്ഥത്തെ അതിവർത്തിക്കുന്ന മറ്റൊരു അർത്ഥതലം കൂടിയുണ്ടെന്ന് തോന്നിപ്പോയിട്ടുണ്ട്. ശരീരം അതിന്റെ വിലക്കുകളെ അഴിച്ച് കളഞ്ഞ് പുതിയൊരു സാധ്യതയിലേക്ക് വിടർന്ന് വിരിയലാണല്ലോ നൃത്തമെന്നത്. കോസ്മിക് റിഥത്തോട് (പ്രപഞ്ചതാളം) സമരസപ്പെടാനുള്ള വെമ്പലാണോ അത്? പ്രണയനഷ്ടത്തെ അതിജീവിക്കാനുള്ള ഒരു മാർഗ്ഗവുമാവാം അത്. എന്തായാലും ഈ നൃത്തത്തെ സവിശേഷമായി ശ്രദ്ധിക്കേണ്ടതുണ്ട് എന്നുമാത്രം പറയട്ടെ. നൃത്തരംഗങ്ങളെ വർണ്ണിക്കുമ്പോൾ ഉറൂബിന്റെ ഭാഷയും നൃത്തമാടുകയാണെന്നു തോന്നും. ആ 'പാറിവീഴുന്ന സ്‌നിഗ്ദ്ധപക്ഷ്മളങ്ങളായ കണ്ണുകളും, ഇണപ്രാവുകളെപ്പോൽ ചലിക്കുന്ന കാലടികളും, ഇളകിയാടുന്ന മനുഷ്യാത്മാവിൽ നിന്ന് ചിതറുന്ന വർണ്ണോജ്ജ്വലങ്ങളായ പരാഗങ്ങളും' ഒക്കെക്കൂടി അതാണുദാഹരിക്കുന്നത്.

ജീവിതം ഏതു വഴിക്കും പൊയ്‌ക്കൊള്ളട്ടെ, അതിന് ഒരു അർത്ഥം കല്പിച്ചുനൽകാൻ വിധിക്കപ്പെട്ട മനുഷ്യരാണ് തങ്ങൾ എന്നൊരു ബോധം ഇവരിൽ അന്തർലീനമായിരിക്കുന്നു. ഈയൊരു മനോഭാവമാണ് ഇവരെ സുന്ദരികളും സുന്ദരന്മാരുമാക്കിത്തീർക്കുന്നത്.

ഉറൂബിന്റെ നോവലിനെ ചരിത്രനോവൽ എന്നു മാത്രം വിശേഷിപ്പിക്കുന്നത് ഉചിതമല്ല. ചരിത്രത്തിന്റെയും ദേശത്തിന്റെയും വിപുലമായ ക്യാൻവാസിനുള്ളിൽ നിന്നുകൊണ്ട് മറ്റൊരു ചരിത്രസൃഷ്ടി നടത്തുകയായിരുന്നു ഉറൂബ് എന്നു വേണമെങ്കിൽ പറയാം.

ചരിത്രത്തെ ഭാവനാപരമായി പുനഃസൃഷ്ടിക്കുവാനും ചരിത്രത്തെയും ജനതയെയും സംബന്ധിച്ചൊരു പുതിയ ഉൾക്കാഴ്ച മുന്നോട്ടുവയ്ക്കാനും ഉറൂബിനു കഴിഞ്ഞു. അത് ചരിത്രത്തിന്റെ മൂന്നാം തലമാണ് (Third Dimension). ചരിത്രമല്ല. ഇങ്ങനെ ചരിത്രത്തിന്റെ മൂന്നാം തലം സൃഷ്ടിച്ചവരായിരുന്നു ഫോക്‌നറും ടോൾസ്റ്റോയിയും മാരിയോ വർഗസ്സ് യോസയും മറ്റും. ചരിത്രം എന്താണ് എന്നുള്ളതിനെക്കാൾ എന്തായിരിക്കണം എന്ന വിഭാവനം കൂടി അവരുടെ രചനയെ സ്വാധീനിച്ചിട്ടുണ്ട്. എന്തായാലും സുന്ദരികളും സുന്ദരന്മാരും എന്ന നോവൽ ചരിത്രത്തിന്റെ പാവകളിയല്ല. ചരിത്രത്തിന്റെ അസ്ഥിപഞ്ജരം നമ്മെ നോക്കി ഭീതിദമാം വണ്ണം ചിരിക്കുന്നില്ല ഈ നോവലിൽ'.

പരന്ന വായനയും സാഹിത്യത്തോടുള്ള അദമ്യമായ പ്രണയവും വഴി ആധുനികതയുടെ സാംസ്‌കാരിക ഭാവുകത്വത്തിന്റെ മികച്ച വക്താവായി മാറാൻ ബെന്നിക്കു കഴിയുന്നുണ്ട്. ഒറ്റയൊറ്റ കൃതികളെയും എഴുത്തുകാരെയും കുറിച്ചുള്ള നിരൂപണങ്ങളെക്കാൾ ഈ പുസ്തകത്തിൽ ശ്രദ്ധേയമാകുന്നത് ചില സവിശേഷ പ്രമേയങ്ങളെയും സമീപനങ്ങളെയും നിരവധി കൃതികളിലേക്കും എഴുത്തുകാരിലേക്കും സംക്രമിപ്പിക്കുന്ന വിമർശനപഠനങ്ങളാണ്. ക്രിസ്ത്വാനുകരണം മുതൽ മരണരതി വരെ; മാനവികത മുതൽ ആത്മയുദ്ധങ്ങൾ വരെ; ദേശഭാവനകൾ മുതൽ ബദൽജീവിതങ്ങൾ വരെ; പുനർവായനകൾ മുതൽ ഭാഷാരാഷ്ട്രീയങ്ങൾ വരെ.

എങ്കിലും ആത്മരതിയുടെ തോത് കുറച്ചും അല്പഭാവനകൾക്കു നൽകുന്ന അമിതപ്രശംസ ഒഴിവാക്കിയും അർഥശൂന്യമായ സാഹിത്യസംഭവവിവരണങ്ങൾ വേണ്ടെന്നുവച്ചും എഡിറ്റുചെയ്തിരുന്നുവെങ്കിൽ നിശ്ചയമായും കുറെക്കൂടി മികച്ച ഒരു സാഹിത്യവിമർശനഗ്രന്ഥമാകുമായിരുന്നു, 'ആത്മശൈലങ്ങളിലെ യാത്രികർ'.

പുസ്തകത്തിൽ നിന്ന്:-

'ഫെദറികൊ ഗാർസിയ ലോർകയെ ഫാഷിസ്റ്റ് ഭരണകൂടം വധിക്കുമ്പോൾ പാബ് ലൊ നെരൂദ പ്രകോപിതനായി മാറി. അതുവരെ ഒരു റൊമാന്റിക് അനാർക്കിസ്റ്റായിരുന്ന നെരൂദ കമ്മ്യൂണിസ്റ്റ് അനുഭാവിയായി മാറുന്നു. 'എനിക്ക് കലഹിക്കുകയും പോരാടുകയും ചെയ്യേണ്ടിയിരുന്നു. സ്‌നേഹിക്കുകയും പാടുകയും ചെയ്യേണ്ടിയിരുന്നു. ലോകത്തിന്റെ തകർച്ചയും വിജയവും പരാജയവും ഞാൻ കണ്ടു. അപ്പവും രക്തവും രുചിച്ചു ഞാൻ. ഒരു കവിക്ക് ഇതിൽ കൂടുതൽ എന്താണ് വേണ്ടത്?' നെരൂദ ചോദിക്കുന്നു. നെരൂദ സ്‌പെയിനിലെ അക്കാലത്തെ രാഷ്ട്രീയ സംഭവങ്ങളോട് വളരെ കൃത്യമായി പ്രതികരിച്ചു. ദരിദ്രവും എന്നാൽ സമാധാനപൂർണ്ണവുമായിരുന്ന സ്‌പെയിനിനെക്കുറിച്ച് കവി എഴുതി. സ്‌പെയിനിന് ചരിത്രപരമായ സമൃദ്ധിയും മഹത്തായ ഒരു ഭൂതകാലവുമുണ്ടായിരുന്നു. ചരിത്രഗ്രന്ഥങ്ങളോട് നെരൂദയ്ക്ക് അഗാധമായ അഭിനിവേശമുണ്ടായിരുന്നു. ചിലിയുടെ ചരിത്രം ആഴത്തിൽ അറിയാനുള്ള ശ്രമങ്ങൾ അദ്ദേഹത്തിന്റെ ഭാഗത്തുനിന്നുണ്ടായി.

നെരൂദയുടെ ഹൃദയവും ധിഷണയും ചരിത്രത്തിന്റെ നാൾവഴികളിൽ മുങ്ങിനിവർന്നു. മനുഷ്യചരിത്രത്തിലെ ഏറ്റവും നീണ്ടുനിന്ന ആഭ്യന്തരയുദ്ധത്തിന്റെ-ആരക്കാനിയന്മാരും സ്പാനിഷ് അധിനിവേശകരും തമ്മിലുള്ള നൂറ്റാണ്ടുകൾ നീണ്ടുനിന്ന സംഘർഷം-നെരൂദയ്ക്ക് അജ്ഞാതമായിരുന്നില്ല. ഈ ചരിത്രബോധം നെരൂദയിലെ കവിയെ രൂപപ്പെടുത്തുന്നതിൽ കുറഞ്ഞൊന്നുമല്ലാ സഹായകരമായിട്ടുള്ളത്. നെരൂദയിൽ കവിത ഒരു കവിയുടെ ജീവചരിത്രവും അതേസമയം ഒരു രാജ്യത്തിന്റെ ചുവരെഴുത്തുമായി മാറുന്നത് അങ്ങനെയാണ്. 'I am large, I contain multitudes' എന്ന് വാൾട്ട് വിറ്റ്മാൻ എഴുതുമ്പോൾ അത് നെരൂഗയുടെ കവിതയ്ക്കും ചേർത്തുവെയ്ക്കാവുന്ന മുഖവാക്യമായിത്തീരുന്നു. നെരൂദയുടെ കവിതയ്ക്കുള്ള ചരിത്രസ്വഭാവം (ഹിസ്റ്റോറിസിറ്റി) എടുത്തുപറയേണ്ടതാണ്. ചരിത്രം കുഴിച്ചു ചെല്ലുമ്പോൾ നൂറ്റാണ്ടുകളായി ജനതകൾ അനുഭവിച്ചിരുന്ന ദുരിതപർവ്വങ്ങളുടെ അവശിഷ്ടങ്ങൾ കണ്ടെത്തിയേക്കാം. കാന്റോ ജനറലിലും മറ്റും ഈ ചരിത്രത്തിന്റെ മായാത്ത കാൽപ്പാടുകൾ കാണാം. 'Poetry mtsu be born out of suÅering' കാലാകാലങ്ങളായി മനുഷ്യർ അനുഭവിക്കുന്ന യാതനകൾ കവിതകളായി പരിണമിക്കും. നെരൂദ അങ്ങനെ വിശ്വസിച്ച ആളാണ്.

ഫാഷിസ്റ്റ് ഭരണകൂടം അഴിച്ചുവിടുന്ന ക്രൂരമർദ്ദനങ്ങളോ വേട്ടായാടലുകളോ ഒരു യഥാർത്ഥ വിപ്ലവകാരിയെ തളർത്തുന്നില്ല. എതിർക്കുന്നവരെ ഇല്ലായ്മചെയ്യുകയോ അവസാനമില്ലാത്ത പീഡനങ്ങൾക്കിരയാക്കുകയോ ചെയ്യുന്നു. അത്തരം ഭരണകൂടങ്ങളാൽ ഫെദറികൊ ഗാർസിയ ലോർകയും മിഗുവെൽ ഹെർണാണ്ടസ്സും ഒക്കെ വേട്ടയാടപ്പെട്ടു. ഗാർസിയ ലോർകയുടെ മരണത്തേക്കുറിച്ചുള്ള ഗവൺമെന്റിന്റെ ഭാഷ്യം തെറ്റായിരുന്നു എന്നു പറഞ്ഞതിനാണ് മിഗ്വെൽ ഹെർണാണ്ടസ്സിനെ ചിലിയൻ ഗവൺമെന്റ് കൊന്നത്. നെരൂദയ്ക്കും കടുത്ത അനുഭവങ്ങളുണ്ടാകാതിരുന്നില്ല 'എന്റെ വീട് അവർ ചുട്ടെരിച്ചു. എന്നെ അവർ പീഡനങ്ങൾക്കിരയാക്കി ഒന്നിലധികം തവണ എന്നെ അവർ തടങ്കലിൽ വെച്ചു. എന്നെ നാടുകടത്തി. ആയിരക്കണക്കിന് പൊലീസ് അന്വേഷിക്കുന്ന നോട്ടപ്പുള്ളിയായി ഞാൻ' നെരൂദ ഒരിക്കൽ പറഞ്ഞു. ഇതൊക്കെയായിട്ടും കവിയുടെ മനസ്സ് തളരുന്നില്ല. ഒരിക്കൽ, ചിലിയുടെ പ്രസിഡണ്ടായി നിങ്ങൾ തിരെഞ്ഞെടുക്കപ്പെടുകയാണെങ്കിൽ എഴുത്തു തുടരുമോ എന്ന ചോദ്യത്തിന് എഴുത്ത് എനിക്കെന്റെ ജീവവായു ആണ് എന്ന് നെരൂദ മറുപടി നൽകുന്നുണ്ട് (പാരീസ്‌റിവ്യൂ).

അതുപോലെ ജന്മനാ കവിയായിട്ടുള്ളവന് കവിത വന്നു വിളിക്കുമ്പോൾ ഇറങ്ങിപ്പോകാതിരിക്കാനാവില്ല. ആരക്കാനിയൻ മലനിരകളിൽ നിന്നോ മാക്കു പീക്കുവിന്റെ ഉയരങ്ങളിൽ നിന്നോ, ഭൂമിയുടെ അത്യഗാധതകളിൽ നിന്നോ ഖനിത്തൊഴിലാളികളുടെ വേദനാപൂർണ്ണമായ നിശ്വാസങ്ങളിൽ നിന്നോ ഫാഷിസത്തിന്റെ തെരുവുകളിൽ നിന്നോ ആയിരിക്കാം കവിത കവിയെതേടിയെത്തുന്നത്.

'And it was at that age.... Poetry arriv-ed
it came in search of me, I don't know, I don't know where
It came from, from winter or a riv-er
I don't know how or when
no, they were not voices, they were nto
words, nor silence,
but from ats reet I was summoned,
from rhe branches og nigth
abruptly from the othser
among violent firse
or returning alone
there I was without a face
and it otuched me' (La Poesia)

കവിത കവിയെ തേടി വരികയാണ്. കവി കണ്ടെത്തുന്നതല്ല. അതുകൊണ്ടാണ് നെരൂദയുടെ കവിതകളിൽ കടലിന്റെയും മത്സ്യത്തിന്റെയും പക്ഷികളുടെയും രൂപത്തിൽ ആവർത്തിച്ചുവരുന്ന ബിംബങ്ങളെക്കുറിച്ച് ചോദിച്ചപ്പോൾ ബിംബങ്ങളിൽ ഞാൻ വിശ്വസിക്കുന്നില്ല എന്ന് കവി പറയുന്നത് (റീത്താ ഗിബർട്ടുമായുള്ള അഭിമുഖം) കോളനീകരിക്കപ്പെട്ട ഒരു ജനതയുടെ ചരിത്രമാണ് 'കാന്റോ ജനറൽ' പറയുന്നത്. അമേരിക്കൻ ജനതയുടെ ചരിത്രപരവും സാമൂഹികവുമായ യാഥാർത്ഥ്യം ഇതിൽ അവതരിപ്പിക്കുന്നു. ലാറ്റിനമേരിക്കയുടെ ദുരിതങ്ങളും പ്രതീക്ഷകളും കവിയിലൂടെ ശബ്ദം കൈവരിക്കുന്നു. മാക്കു പീക്കുവിന്റെ ഉയരങ്ങളിൽ മരിച്ചവരുടെ പ്രാമാണികനായ വക്താവായി മാറുന്നു നെരൂദ. കാന്റോ ജനറൽ നെരൂദയുടെ ഏറ്റവും മികച്ച കവിതയാണെന്നു പറയാം. ചരിത്രത്തെ ഭാവഗീതത്തിലേക്ക് മൊഴിമാറ്റം ചെയ്യാനുള്ള ആദമ്യമായ ആഗ്രഹമാണ് കാന്റോ ജനറൽ എന്നു പറയാറുണ്ട്. കവിത ഇവിടെ പ്രാകൃതികശക്തികളുടെ പ്രവാഹോർജ്ജം സംഭരിച്ച് ഒരു ഭൂഖണ്ഡത്തിന്റെ ഭാഗധേയത്തെയും സ്വപ്നങ്ങളെയും ജീവത്താക്കി മാറ്റുന്ന രാസപ്രക്രിയയ്ക്ക് വിധേയമാക്കുന്നു. ചിലിയുടെ സ്വപ്നങ്ങളെ, യാഥാർത്ഥ്യങ്ങളെ അതിന്റെ സസ്യജന്തുജാലങ്ങളെ കവി ആവാഹിച്ചു വരുത്തുന്നു. ഇതിൽ ചിലിയുടെ വേരുകൾ ഭൂമിയുടെ ആഴങ്ങളിലേക്ക് ആണ്ടിറങ്ങുന്നു. അവിടെ നിന്നത് മറ്റ് ഇടങ്ങളിലേക്ക് വ്യാപിക്കുന്നു.

പൂർവ്വകൊളംബിയ അമേരിക്ക മനുഷ്യരും മൃഗങ്ങളും തമ്മിൽ വലിയൊരു മൈത്രിയിൽ, ഒരു തരം നിഷ്‌കളങ്കാവസ്ഥയിൽ നിലനിന്നിരുന്നുവെന്നും പിൽക്കാലത്ത്, കൊളോണിയൽ കാലത്ത് സ്പാനിഷ് അധിനിവേശകരുടെ മുതലാളിത്ത ആധിപത്യം ആ പഴയ നിഷ്‌ക്കളങ്കതയെ തകർത്ത് മുന്നേറുന്നതായും നെരൂദ മനസ്സിലാക്കുന്നു. അതോടെ പ്രകൃതിയും മനുഷ്യനും തമ്മിലുള്ള പാരസ്പര്യമാർന്ന ഒരു ജീവനം അപകടത്തിലാവുന്നു. ചരിത്രത്തിൽ എല്ലാക്കാലത്തും ഇത്തരം വിപരീതസന്ധികളുണ്ടാവാറുണ്ട്. ഡിക്കൻസിന്റെ കാലത്ത് വ്യവസായ വിപ്ലവം മനുഷ്യബന്ധങ്ങളിലെ ആത്മീയതയെ ചവുട്ടി മെതിക്കുന്നതുപോലെ ആഗോളവത്ക്കരണത്തിന്റെ ഈ നാളുകളിൽ കോർപറേറ്റുകൾ വരുത്തിത്തീർത്ത് സാമൂഹ്യസാംസ്‌കാരിക ഭീഷണിയുടെ മറ്റൊരു പതിപ്പായിരുന്നു നെരൂദ ഉൾക്കിടിലത്തോടെ തിരിച്ചറിഞ്ഞത്.

സ്‌പെയിനിന്റെയോ ചിലിയുടെയോ ഗാഥകളല്ല വാസ്തവത്തിൽ നെരൂദ പാടുന്നത്. വിശാലമായ അർത്ഥത്തിൽ അവയെല്ലാം ഭൂമിയുടെ ആത്മാവിനെ തൊട്ടറിയുന്നവയാണ്. ലോകത്തിന്റെ ഹൃൽസ്പന്ദനങ്ങൾ കേൾക്കാൻ കവിക്ക് തന്റെ ജന്മദേശത്തിന്റെ അതിരുകൾക്കപ്പുറത്തേയ്ക്ക് പോകണം. അവർ എന്നോട് വെനസ്വേലയെക്കുറിച്ചു സംസാരിച്ചു. ചിലിയെക്കുറിച്ച്, പരാഗ്വയെക്കുറിച്ച് സംസാരിച്ചു. അവരെന്താണ് പറയുന്നതെന്ന് എനിക്ക് മനസ്സിലായില്ല.

'I know only the skin of earth
and I know it is without a name'

നെരൂദയുടെ പ്രണയകവിതകളിൽ വൈയക്തികമായ അനുഭവത്തെ അതിവർത്തിച്ച് വളരെ വലിയൊരു ക്യാൻവാസിലേക്ക് പ്രണയത്തിന്റെ വിവക്ഷകൾ വ്യാപിക്കുന്നു. കാമുകിയുടെ ശരീരവർണ്ണനയിലൂടെ ജന്മദേശത്തിന്റെ ഭൂപ്രകൃതികളെ പ്രത്യാനയിക്കുന്നു. പ്രണയം ഇവിടെ ജന്മദേശത്തോളം വിപുലമാവുന്ന കാഴ്ച, പ്രണയം ഭൂമിശാസ്ത്രവും രാഷ്ട്രീയവുമായ അർത്ഥതലങ്ങളോളം വികസിതമാവുന്ന കാഴ്ച നമ്മെ അത്ഭുതാധീനരാക്കും.

'Body of a woman, white hills, white thighs
You looks like a world, lying in surrender
My rough Peasant's body digs in you
and makes the son leap from the depth of the earth'

"Naked you are as thin as bare wheat
Naked, you are blue like a cuban night"

എന്നും ഉള്ള വരികളിൽ വ്യക്തിയിൽ നിന്നും രാഷ്ട്രത്തോളം എത്തുന്ന പ്രവാഹസന്നദ്ധമായി നിൽക്കുന്ന പ്രണയോർജ്ജത്തെ കാണാതിരിക്കാനാവില്ല.
ഈ ജനുസ്സിൽപ്പെട്ട മറ്റൊരു കവിത നോക്കൂ:
ഹാ! സരളദ്രുമങ്ങളുടെ അപരിമിതത്വം
തീരത്തു വന്നു വീഴുന്ന തിരമാലകളുടെ മർമ്മരം
പ്രകാശങ്ങളുടെ മന്ദഗതിയിലുള്ള പ്രസരം
ഏകാന്തമായമണിനാദം, നിന്റെ കണ്ണുകളിൽ
നിന്നു വീഴുന്ന സാന്ധ്യപ്രകാശം
വിവ: എം. കൃഷ്ണൻനായർ
(അഗ്നിശിഖയാർന്ന സ്വർണം)
ഫ്രാങ്കോയുടെ അതിനിന്ദ്യമായ ക്രൂരതകളോട് നെരൂദ പ്രതികരിച്ചത് അശുദ്ധ കവിതകൾ (Impure Poetry) രചിച്ചുകൊണ്ടാണ്. സ്‌പെയിനിലെ ആഭ്യന്തരയുദ്ധത്തെ തുടർന്ന് റൊമാന്റിക് കവിതകളുടെ ഭവനത്തിൽനിന്നും ഇറങ്ങി നടന്ന കവി അശുദ്ധകവിതയുടെ തീരത്ത് ചെന്നെത്തി. വിയർപ്പും പുകയും നിറഞ്ഞ, ലില്ലിപ്പൂവും മൂത്രവും മണക്കുന്ന.... പഴന്തുണി പോലെ അശുദ്ധമായ കവിതയുടെ ലോകത്തേക്ക് കവി പ്രവേശിക്കുന്നു. മാനുഷികതയ്‌ക്കെതിരായ ക്രൂരമായ ആക്രമണങ്ങൾ കവിയെ തെരുവിലേക്ക് ഇറങ്ങി നടക്കാൻ പ്രേരിപ്പിക്കുകയായിരുന്നു. ചരിത്രത്തിന്റെ ജനകീയ രൂപം കവി അവതരിപ്പിക്കുകയായിരുന്നു'.

ആത്മശൈലങ്ങളിലെ യാത്രികർ
ബെന്നി ഡൊമിനിക്
ലോഗോസ് ബുക്‌സ്, പാലക്കാട്
വില: 180 രൂപ

ഷാജി ജേക്കബ്‌    
കേരള സര്‍വകലാശാലയില്‍ ഗവേഷകവിദ്യാര്‍ത്ഥിയായിരുന്ന കാലത്ത് കലാകൗമുദി വാരികയില്‍ തുടര്‍ച്ചയായി ലേഖനങ്ങളും ഫീച്ചറുകളും എഴുതിത്തുടങ്ങി. ആനുകാലികങ്ങളിലും, പുസ്തകങ്ങളിലും, പത്രങ്ങളിലും രാഷ്ട്രീയസാംസ്‌കാരിക വിഷയങ്ങളെ സംബന്ധിച്ച നിരവധി ലേഖനങ്ങളും പഠനങ്ങളും എഴുതിയിട്ടുണ്ട്. അക്കാദമിക നിരൂപണരംഗത്തും മാദ്ധ്യമവിമര്‍ശനരംഗത്തും സജീവമായ വിവിധ വിഷയങ്ങളില്‍ ഷാജി ജേക്കബിന്റെ നൂറുകണക്കിനു രചനകള്‍ പുറത്തുവന്നിട്ടുണ്ട്.

Readers Comments

മലയാളത്തിൽ ടൈപ്പ്‌ ചെയ്യാൻ ഇവിടെ ക്ലിക്ക്‍ ചെയ്യുക
കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

MNM Recommends

TODAYLAST WEEKLAST MONTH
നല്ല നിലയിൽ പ്രവർത്തിച്ചിരുന്ന ബിസിനസ് അടച്ചു പൂട്ടി ഒടിയന്റെ പിന്നാലെ പോയ ശ്രീകുമാർ മേനോൻ ടെൻഷൻ മാറൻ നടത്തിയ തള്ളോ റിലീസിന് മുമ്പേ 100 കോടി ലഭിച്ചെന്ന അവകാശവാദം? എത്രകൂട്ടി കിഴിച്ചാലും 40 കോടി കടക്കില്ലെന്നിരിക്കെ എന്തിന് നുണ പറഞ്ഞ് ലാലേട്ടനെ കൂടി കഴുപ്പത്തിലാക്കുന്നുവെന്ന് ചോദിച്ച് ആരാധകർ; കണക്ക് പുറത്തുവിട്ട് വിവാദങ്ങൾ ഒഴിവാക്കി താരമായി സംവിധായകൻ; റിലീസിംഗിന് രണ്ട് ദിവസം മുമ്പേ ഒടിയൻ ചർച്ചയിൽ നിറയുന്നത് ഇങ്ങനെ
മധ്യപ്രദേശിൽ ഫോട്ടോഫിനിഷിലേക്ക്; കോൺഗ്രസും ബിജെപിയും ഒപ്പത്തിനൊപ്പം; രാജസ്ഥാനിൽ കോൺഗ്രസിന് കേവല ഭൂരിപക്ഷം; ഛത്തീസ്‌ഗഡിൽ ഭരണം ഉറപ്പിച്ച് കോൺഗ്രസ് കുതിപ്പ്; മൂന്നിൽ രണ്ട് ഭൂരിപക്ഷത്തിൽ തെലുങ്കാനയിൽ ടിആർഎസ് ഭരണം നിലനിർത്തിയപ്പോൾ കോൺഗ്രസിനെ അട്ടിമറിച്ച് മിസോറാമിൽ എംഎൻഎഫും; അന്തിമഫലം പുറത്തുവരാനിരിക്കവേ ബിജെപി കേന്ദ്രങ്ങളിൽ മ്ലാനതയും കോൺഗ്രസ് നേതാക്കളിൽ ആഹ്ലാദവും: ലോക്‌സഭാ തെരഞ്ഞെടുപ്പിന്റെ സെമിഫൈനൽ ആവേശകരമായ അന്ത്യത്തിലേക്ക്
'രണ്ട് ലക്ഷം രൂപ തന്നാൽ ഒരു രാത്രിക്ക് കൂടെ വരാമോ ? കാര്യങ്ങൾ നമ്മൾ രണ്ട് പേർക്കുള്ളിൽ രഹസ്യമായിരിക്കും' ; തനിക്ക് വന്ന അശ്ശീല സന്ദേശത്തിന്റെ സ്‌ക്രീൻ ഷോട്ട് അടക്കം ഫേസ്‌ബുക്കിൽ പങ്കുവെച്ച് സീരിയൽ താരം ഗായത്രി; 'താങ്കളുടെ അമ്മയുടേയും പെങ്ങളുടേയും സുരക്ഷയ്ക്കായി പ്രാർത്ഥിക്കാമെന്നും' ഗായത്രിയുടെ കിടിലൻ മറുപടി
വളയുന്നിടത്തോളം വളഞ്ഞിട്ടും തല്ലിക്കൊണ്ടിരിക്കുമ്പോൾ മരണ ഭയം മൂർച്ഛിച്ച് രാജി; അതിസമ്പന്നർക്കായി റിസർവ്വ് ബാങ്കിനെ കൊല്ലാൻ ശ്രമിച്ചപ്പോൾ ഉണ്ടായത് അതിഭീകര തിരിച്ചടി; ഇന്ത്യയെ കാത്തിരിക്കുന്നത് അർജന്റീനയുടെ ഗതിയെന്നും റിപ്പോർട്ടുകൾ; റിസർവ്വ് ബാങ്കിലെ പ്രതിസന്ധി സാമ്പത്തിക മേഖലയെ ഞെട്ടിച്ചാൽ തെരഞ്ഞെടുപ്പിൽ വൻ തിരിച്ചടിയാകും; മുൻ ഗവർണ്ണറും ആഗോള സാമ്പത്തിക ശാസ്ത്രജ്ഞനുമായ മന്മോഹനെ തന്നെ രംഗത്തിറക്കി മുതലെടുക്കാൻ കോൺഗ്രസും
ഹിന്ദുവോട്ടുകൾ ധ്രൂവീകരിച്ച് ന്യൂനപക്ഷ വോട്ടുകൾ അനുകൂലമാക്കാൻ ശബരിമലയിൽ ഇറക്കിയ ജാതികാർഡിന്റെ ആനുകൂല്യം ഇല്ലാതാക്കിയ തെരഞ്ഞെടുപ്പ് ഫലം; ബിജെപിയെ നേരിടാൻ കോൺഗ്രസിന് ഇനിയൊരു അങ്കത്തിന് കൂടി ബാല്യം ബാക്കിയുണ്ടെന്ന് തിരിച്ചറിഞ്ഞതോടെ ലോക്‌സഭാ തെരഞ്ഞെടുപ്പിൽ വലിയ തിരിച്ചടി ഉണ്ടാകുമെന്ന് ഭയന്ന് സിപിഎം; ശബരിമല യുവതി പ്രവേശന വിഷയത്തിന്റെ പേരിൽ തൊലിപ്പുറത്ത് പുരോഗമനം തേച്ച് ജാതികളിച്ച സിപിഎം ലോക്‌സഭാ തെരഞ്ഞെടുപ്പിൽ കച്ചി തൊട്ടേക്കില്ല
മോദിയെ മലർത്തിയടിക്കാൻ ചങ്കുറപ്പുള്ള നേതാവ് രാഹുൽ തന്നെ.. പാർട്ടി കോൺഗ്രസ് തന്നെ.. പ്രതിപക്ഷ പാർട്ടികളിൽ ഇനി സംശയം ഉള്ളവർ ആരുമില്ല; മാറി നിന്ന മുലായവും ഓടിയെത്തി; ചോദിക്കും മുമ്പ് പിന്തുണ പ്രഖ്യാപിച്ച് മായാവതിയും രംഗം ഉഷാറാക്കി; സെമി ഫൈനലിലെ തിളക്കമേറിയ വിജയം മോദിവിരുദ്ധ സഖ്യത്തിന്റെ പ്രതീക്ഷ വാനോളം ഉയർത്തുന്നു
ബിയോൺസിനെ വിവാഹപ്പാർട്ടിയിൽ പാട്ടുകാരിയാക്കാൻ അംബാനി എത്ര കൊടുത്തുകാണും? ലോകം ചർച്ച ചെയ്യുന്നത് ലോകത്തെ ഏറ്റവും ഹോട്ട്‌സ്റ്റാറായ ബിയോൺസിന്റെ മുംബൈയിലെ പ്രകടനം; ലോക ചരിത്രത്തിലെ ഏറ്റവും ചെലവേറിയ കല്യാണമായി ഇതു രേഖപ്പെടുത്തുമോ? അംബാനിയുടെ മകളുടെ കല്യാണവിശേഷങ്ങൾ പറഞ്ഞുതീരാതെ വിദേശമാധ്യമങ്ങളും
സ്പോർട്സ് ക്വോട്ടയിൽ അഡ്‌മിഷൻ എടുത്തുസെന്റ് സ്റ്റീഫൻസിൽ പഠനം; രാഷ്ട്രീയത്തിൽ ഇറങ്ങും മുമ്പ് ജീവിതം അടിച്ചുപൊളിച്ച് അഭിഷേക് ബച്ചന്റെ ആത്മസുഹൃത്തായി; മോദിയുടെ ഡിഗ്രി സർട്ടിഫിക്കറ്റ് തിരച്ചിൽ തുടരുമ്പോഴും ഹാർവാർഡിലും ട്രിനിറ്റിയിലും ഉന്നതവിദ്യാഭ്യാസം നടത്തി രാഷ്ട്രീയക്കാർക്ക് മാതൃകയായി; ഗോസിപ്പുകോളങ്ങളിൽ നിറഞ്ഞ കൊളംബിയൻ പെൺകുട്ടിയെ കുറിച്ച് ഇപ്പോൾ ഒന്നും കേൾക്കാനില്ല; അളവറിഞ്ഞ് നാഴി നിറച്ച് പ്രധാനമന്ത്രി പദത്തിന് തൊട്ടടുത്തെത്തിയ രാഹുൽ ഗാന്ധിയുടെ ജീവിതം ഇങ്ങനെ
മഹാഭൂരിപക്ഷം വിശ്വാസികളും യാക്കോബായക്കാരെങ്കിലും കോതമംഗലം-പിറവം പള്ളികൾ നിയമപരമായി ഇനി മുതൽ ഓർത്തഡോക്‌സ് ഉടമസ്ഥതയിൽ; ഏത് കോടതിയിൽ ചെന്നാലും ഇനി യാക്കോബയക്കാർക്ക് രക്ഷയില്ല; സുപ്രീംകോടതി വിധി മറികടക്കാൻ ആകെ വഴി ജനകീയ പ്രതിരോധവും പിണറായി വിജയന്റെ സഹായവും; ചങ്ങന്നൂരിൽ വോട്ടുറപ്പിച്ച മുഖ്യമന്ത്രി ചതിച്ചെന്ന രോഷത്തിൽ ഓർത്തഡോക്‌സും; ശബരിമലയിൽ സുപ്രീംകോടതി വിധി നടപ്പിലാക്കാൻ ആവേശം കത്തിയ പിണറായി സർക്കാർ പെട്ട് പോയ മറ്റൊരു സുപ്രീംകോടതിയുടെ കഥ
രഹനാ ഫാത്തിമയുടെ മോചനം ഇപ്പോഴും അനിശ്ചിതത്വത്തിൽ; ജാമ്യഹർജി ഹൈക്കോടതി പരിഗണിക്കുന്നത് ഇനി 14ന്; രഹ്നയെ കൂടുതൽ ചോദ്യം ചെയ്യേണ്ടതുണ്ടെന്ന നിലപാടിൽ പൊലീസ് ഉറച്ച് നിൽക്കുന്നു; രഹ്നയെ സഹായിക്കുന്ന നിലപാട് സ്വീകരിച്ചാൽ വീണ്ടും ഹൈക്കോടതിയിലേക്ക് എന്ന് രാധാകൃഷ്ണ മേനോൻ; അകപ്പെട്ട അവസ്ഥയിൽ രക്ഷയില്ലാതെ രഹ്ന ഫാത്തിമയും
ലൈംഗിക പൂർവ്വ കേളികൾ ഉൾപ്പെടുന്ന ബോഡി ടു ബോഡി മസാജിന് 2500 രൂപ; ഫുൾ സർവ്വീസ് ബോഡി മസാജ് വിത്ത് സെക്‌സിന് വെറും 3000 റേറ്റ്; യോഗയും ആയുർവേദവും മറയാക്കിയുള്ള സെക്സ് തെറാപ്പിയിൽ നടക്കുന്നത് മലയാളി പെൺകുട്ടികളെ കരുവാക്കിയുള്ള വാണിഭം; കേരളത്തിലെ മദ്യവ്യവസായിയും ജൂവലറി ഗ്രൂപ്പ് ഉടമയും പിന്നെ കോൺഗ്രസ് നേതാവിന്റെ ബിനാമിയും; ഇടപാടുകാരെ കണ്ടെത്തുന്നത് നവമാധ്യമ പരസ്യത്തിലൂടെ; ബംഗലുരുവിൽ തഴച്ചു വളരുന്ന സെക്‌സ് റാക്കറ്റിന്റെ കഥ ഇങ്ങനെ
കട്ടിലിൽ കെട്ടിയുള്ള പീഡനം കണ്ടപ്പോൾ കൗൺസിലർ ഒരു പകലിന് ഓഫർ ചെയ്തത് 25,000രൂപ; പെൺകുട്ടിക്ക് നഗരസഭാ അംഗം സമ്മാനമായി വാഗ്ദാനം ചെയ്തത് ആഡംബര മൊബൈലും; വീഡിയോ ചാറ്റിങ് പൊലീസ് അറിഞ്ഞതോടെ രക്ഷപ്പെടാൻ പഴുതുകൾ തേടി ശ്രീകണ്ഠാപുരം നഗരസഭാ കൗൺസിലറും; പത്താംക്ലാസുകാരിയുടെ മൊബൈൽ ഫോൺ പരിശോധന നിർണ്ണായകമാകും; പറശിനിക്കടവിലെ ട്രാപ്പിൽ സന്ദീപ് സ്വപ്‌നം കണ്ടത് മറ്റൊരു സൂര്യനെല്ലി
'അഞ്ജനയുടെ' വാക്കു കേട്ടെത്തിയ പത്താംക്ലാസുകാരിയെ ബലം പ്രയോഗിച്ച് കാറിൽ തട്ടിക്കൊണ്ട് പോയി; ലോഡ്ജിലെത്തിച്ച് വിവസ്ത്രയാക്കി വീഡിയോ എടുത്തു; ഭീഷണിപ്പെടുത്തി വിളിച്ചു വരുത്തി ബലാത്സംഗം; കട്ടിലിൽ കെട്ടിയിട്ട് കൂട്ടുകാരുടെ കാമകേളി; പറശ്ശനിക്കടവിലെ വിരുതന്മാരെ കുടുക്കാനുള്ള ഫോൺ വിളിയിൽ കിട്ടിയത് 'ഭരണകക്ഷി നേതാവിന്റെ' തെറിവിളിയും; സന്ദീപിനെയും ഷംസുവിനേയും കുടുക്കിയത് പൊലീസിന്റെ കരുതോലോടെയുള്ള നീക്കങ്ങൾ; പറശനിക്കടവിലെ സെക്സ് മാഫിയയെ രക്ഷിക്കാൻ രാഷ്ട്രീയക്കളിയും സജീവം
ബാഗുമുരുട്ടി മുന്നോട്ടു നീങ്ങുമ്പോൾ ഒരുത്തൻ ഓടി അടുത്തേക്ക്; ചോദ്യം എൻക്വയറി എവിടെയാ എന്നാണ്; പക്ഷേ നോട്ടം മുലയിലേക്കും! കണ്ണിലേക്ക് മുഖത്തേക്ക് ഒന്നു പാളി നോക്കുന്നു പോലുമില്ല; വീണ്ടും ചോദിച്ചപ്പോൾ എന്റെ തലയിലെ അപായ ബൾബ് കത്തി; രാത്രി യാത്രയ്ക്കിടെ റെയിൽവെ സ്‌റ്റേഷനിൽ തനിക്കുണ്ടായ ദുരനുഭവം വിവരിച്ച് സജിത മഠത്തിൽ
47 വയസുള്ള യുഎഇയുടെ പുഞ്ചിരിക്കുന്ന മുഖം ലോകം കാണുന്നത് മലയാളിയായ ഈ ആറു വയസുകാരനിലൂടെ; അറബ് ലോകത്തെ സൂപ്പർ മോഡലായി തിളങ്ങുന്ന നിലമ്പൂരൂകാരൻ പയ്യൻ ലിവർപൂൾ ക്ലബ്ബ് മുതൽ ജാഗ്വാറും നിസ്സാനും ടോട്ടലും വരെയുള്ള ലോകത്തെ ബ്രാൻഡുകളുടെയെല്ലാം മുഖമായി മാറി; ഐസിന്റെ വെളുത്ത കന്തൂറയും ഗുട്രയുമണിഞ്ഞ രൂപം എത്ര കണ്ടിട്ടും മതിവരാതെ അറബികൾ; സൗദി മന്ത്രാലയത്തിലും ഇപ്പോൾ മുഖമാകാൻ വേണ്ടത് ഈ സുന്ദരക്കുട്ടനെ തന്നെ
തട്ടുപണി കഴിഞ്ഞ് മദ്യപിച്ച് രാത്രികൾ ആഘോഷമാക്കി സുഹൃത്തുക്കൾ; ഭാര്യ ഗർഭിണിയായപ്പോൾ ഞെട്ടി ഉത്തരവാദിയെ കണ്ടെത്താൻ പൊലീസിൽെ അഭയം തേടി ഭർത്താവും; യുവതിയെ ചോദ്യം ചെയ്തപ്പോൾ കുട്ടിയുടെ അച്ഛൻ ദിവസവും വീട്ടിലെത്തുന്ന ആത്മാർത്ഥ കൂട്ടുകാരൻ; അഴിക്കുള്ളിലായപ്പോൾ എന്റെ ഗർഭം ഇങ്ങനെയല്ലെന്ന് സത്യം ചെയ്ത് അയൽവാസി; പോത്തൻകോട്ടെ ഗർഭത്തിലെ വില്ലനെ കണ്ടെത്താൻ ഇനി ഡിഎൻഎ പരിശോധന
ദിവസേന ചാത്തൻസേവ; മദ്യവും മയക്കുമരുന്നും ഇഷ്ടതോഴർ; ആഡംബര കാറുകളിൽ പാറി നടക്കും; ഇരകളെ ചതിക്കാൻ 'രാഷ്ട്രീയക്കാരെ' കൊണ്ട് വിളിപ്പിക്കാൻ മിമിക്രിക്കാർ; ഭർത്താവായി വേഷമിടുന്നത് മാസ ശമ്പളം പറ്റുന്ന ജീവനക്കാരൻ; ശ്രീജ.. ശാലിനി... ഗായത്രി... മേരി തുടങ്ങിയ പേരുകളിൽ ചതിച്ചും വഞ്ചിച്ചും വൻകിട ഫ്ലാറ്റുകളിലെ അടിപൊളി ജീവിതം; തട്ടിപ്പിന്റെ ഉസ്താദായ പൂമ്പാറ്റ സിനി വീണ്ടും കുടുങ്ങി; ഇത്തവണ പിടിയിലായത് ഒല്ലൂർ മേബൻ നിധി ലിമിറ്റഡിൽ പറ്റിക്കാൻ ശ്രമിച്ചപ്പോൾ
ലോകനേതാക്കൾ ഫോട്ടോഷൂട്ടിനായി ഒരുമിച്ച് നിന്നപ്പോൾ സൗദി രാജകുമാരനെ മാത്രം എല്ലാവരും അവഗണിച്ചോ..? മോദിയും പുട്ടിനും മാക്രോണും അടക്കമുള്ള നേതാക്കൾ ആവേശത്തോടെ സംസാരിച്ച വീഡിയോകൾ പുറത്ത് വന്നിട്ടും ആരെങ്കിലും സംസാരിക്കുമോ എന്ന് കാത്ത് ഒറ്റയ്ക്ക് നിൽക്കുന്ന മുഹമ്മദ് ബിൻ സൽമാന്റെ വീഡിയോ വൈറലാക്കി പാശ്ചാത്യമാധ്യമങ്ങൾ
ചതിയിലൂടെ ആദ്യം വീഴ്‌ത്തിയത് അച്ഛൻ തന്നെ! പറശ്ശിനിക്കടവിൽ കൂട്ടബലാൽസംഗത്തിന് ഇരയായ പത്താംക്ലാസ് വിദ്യാർത്ഥിനിയുടെ മനോനില പോലും മാറ്റിമറിച്ചത് പിശാചായി മാറിയ പിതാവിന്റെ ലൈംഗികവൈകൃതം; കേസിലെ പ്രതികളിൽ സിപിഎമ്മുകാരനടക്കം വിവിധ രാഷ്ട്രീയ പാർട്ടികളുടെ യുവജനനേതാക്കൾ; പെൺകുട്ടികൾ സ്‌കൂൾ യൂണിഫോമിൽ വന്നാലും പറശ്ശിനിക്കടവിലെ ചില ലോഡ്ജുകളിൽ ചൂഷണത്തിന് ഒത്താശ
ഡിവൈഎസ്‌പി ഹരികുമാറിനു വേണ്ടി ബിനു വീട്ടിൽ ഒരുക്കിയിരുന്നത് നക്ഷത്ര വേശ്യാലയവും മിനി ബാറും! ഇരുവരും പങ്കാളിത്ത ബിസിനസുകാർ; കാക്കിയിട്ട ക്രിമിനലിന് വേണ്ടി സ്ത്രീകളെ ബിനു എത്തിച്ചിരുന്നത് ബന്ധുക്കളെന്ന് പറഞ്ഞ്; വീട്ടിലെ രണ്ടു റൂമുകൾ ഹരികുമാറിന് വേണ്ടി മാത്രം നീക്കിവെച്ചു; എല്ലാ കോംപ്രമൈസ് ആക്കുന്ന ഉദ്യോഗസ്ഥന് ക്വാറിക്കാരും ബാറുകാരും പ്രതിമാസം നൽകിയിരുന്നത് 50ലക്ഷത്തിലധികം രൂപ; ലഭിക്കുന്ന തുകയിൽ പകുതിയും എത്തിയത് തിരുവനന്തപുരത്തെ പ്രമുഖ സിപിഎം നേതാവിന്റെ വീട്ടിലും
നീലച്ചിത്രവുമായി കാബിനിൽ ഇരുന്ന ദിലീപ് സിബ് തുറന്നു പ്രദർശിപ്പിച്ചത് സ്വകാര്യഭാഗം; എം ആർ രാജന് എന്നെ ദുപ്പട്ടയില്ലാതെ കാണണം; എങ്ങിനെയെങ്കിലും ശരീരം സ്പർശിക്കണം എന്ന വൈരാഗ്യ ബുദ്ധിയുമായി പത്മകുമാർ; ഏഷ്യാനെറ്റ് വിനോദ ചാനലിൽ എന്നെ കുരുക്കാനായി ഒരുക്കിയത് ട്രയാംഗുലർ ട്രാപ്പ്; ഈ മൂവർ സംഘത്തിന്റെ കൈയിൽനിന്ന് ആർക്കും രക്ഷയില്ല; ഏഷ്യാനെറ്റിലെ ഉന്നതർ ലൈംഗിക മനോരോഗികൾ; മറുനാടനോട് നിറകണ്ണുകളോടെ തുറന്നുപറഞ്ഞ് നിഷാ ബാബു
സ്റ്റേജ് ഷോയിൽ പങ്കെടുക്കാനായി എത്തിയ നൃത്താധ്യാപികയെ വീട്ടിൽ താമസിപ്പിച്ചു; നേഴ്‌സായ ഭാര്യ പിണങ്ങിയതോടെ പേയിങ് ഗസ്റ്റിനെ വധുവായി സ്വീകരിച്ച് വിവാഹം കഴിച്ചു; സാമ്പത്തിക തർക്കം മൂർച്ഛിക്കവേ രണ്ടാം ഭാര്യ വിവാഹ മോചനം നടത്തിയിട്ടില്ലെന്ന് തിരിച്ചറിഞ്ഞു; അമേരിക്കയിലെ ഹൂസ്റ്റണിൽ താമസിക്കുന്ന സ്‌റ്റേജ് ഷോ സംഘാടകനായ അങ്കമാലിക്കാരൻ സാജു മാളിയേക്കൽ തനിക്ക് നഷ്ടമായ കോടികൾക്ക് വേണ്ടി കോടതിയിൽ നൽകിയ കേസിന്റെ വിവരങ്ങൾ പുറത്തു വിട്ട് മറുനാടൻ
ലൈംഗിക പൂർവ്വ കേളികൾ ഉൾപ്പെടുന്ന ബോഡി ടു ബോഡി മസാജിന് 2500 രൂപ; ഫുൾ സർവ്വീസ് ബോഡി മസാജ് വിത്ത് സെക്‌സിന് വെറും 3000 റേറ്റ്; യോഗയും ആയുർവേദവും മറയാക്കിയുള്ള സെക്സ് തെറാപ്പിയിൽ നടക്കുന്നത് മലയാളി പെൺകുട്ടികളെ കരുവാക്കിയുള്ള വാണിഭം; കേരളത്തിലെ മദ്യവ്യവസായിയും ജൂവലറി ഗ്രൂപ്പ് ഉടമയും പിന്നെ കോൺഗ്രസ് നേതാവിന്റെ ബിനാമിയും; ഇടപാടുകാരെ കണ്ടെത്തുന്നത് നവമാധ്യമ പരസ്യത്തിലൂടെ; ബംഗലുരുവിൽ തഴച്ചു വളരുന്ന സെക്‌സ് റാക്കറ്റിന്റെ കഥ ഇങ്ങനെ
കട്ടിലിൽ കെട്ടിയുള്ള പീഡനം കണ്ടപ്പോൾ കൗൺസിലർ ഒരു പകലിന് ഓഫർ ചെയ്തത് 25,000രൂപ; പെൺകുട്ടിക്ക് നഗരസഭാ അംഗം സമ്മാനമായി വാഗ്ദാനം ചെയ്തത് ആഡംബര മൊബൈലും; വീഡിയോ ചാറ്റിങ് പൊലീസ് അറിഞ്ഞതോടെ രക്ഷപ്പെടാൻ പഴുതുകൾ തേടി ശ്രീകണ്ഠാപുരം നഗരസഭാ കൗൺസിലറും; പത്താംക്ലാസുകാരിയുടെ മൊബൈൽ ഫോൺ പരിശോധന നിർണ്ണായകമാകും; പറശിനിക്കടവിലെ ട്രാപ്പിൽ സന്ദീപ് സ്വപ്‌നം കണ്ടത് മറ്റൊരു സൂര്യനെല്ലി
ഭർത്താവിന്റെ സഹപ്രവർത്തകൻ ആയിരുന്ന ചീഫ് പ്രൊഡ്യൂസർ എംആർ രാജൻ ലൈംഗിക താൽപ്പര്യത്തോടെ സംസാരിക്കാൻ തുടങ്ങി; മാർക്കറ്റിങ് വിഭാഗത്തിലെ ദിലീപും ലൈംഗിക ചേഷ്ടകൾ പുറത്തെടുത്തു; എഞ്ചിനിയറായ പത്മകുമാർ അവസരം കിട്ടുമ്പോൾ ഒക്കെ ശരീരത്തിൽ സ്പർശിച്ചു തുടങ്ങി; പരാതിപെട്ടിട്ട് ഒരു നടപടിയും എടുക്കാതെ മാനേജ്മെന്റ്; നിഷാ ബാബുവിന്റെ മീ ടൂവിൽ അഴിഞ്ഞു വീഴുന്നത് ഏഷ്യാനെറ്റ് വൈസ് പ്രസിഡന്റ് അടക്കമുള്ളവരുടെ വൃത്തികെട്ട മുഖങ്ങൾ
പമ്പയിലേക്ക് സ്വകാര്യ വാഹനങ്ങൾ കടത്തിവിടാത്തത് എന്തെന്ന് കേന്ദ്രമന്ത്രി; ഉത്തരവാദിത്തം ഏറ്റെടുക്കുമോ? താങ്കൾ ഉത്തരവിട്ടാൽ താൻ വാഹനങ്ങൾ കടത്തിവിടാമെന്ന് മറുപടി നൽകി എസ്‌പി; വിറപ്പിക്കാൻ ശ്രമിച്ച പൊൻ രാധാകൃഷ്ണന്റെ ഉത്തരംമുട്ടിച്ച് യതീഷ് ചന്ദ്രയുടെ മറുപടി; നിങ്ങൾ മന്ത്രിയെ ചോദ്യം ചെയ്യുകയാണോ എന്നു ചോദിച്ച് ശബ്ദമുയർത്തിയ എ എൻ രാധാകൃഷ്ണന്റെ മുമ്പിലേക്ക് കയറി നിന്ന് ദഹിപ്പിക്കുന്ന നോട്ടവും: നിലയ്ക്കലിൽ ഇന്നു കണ്ട 'സുരേഷ് ഗോപി മൊമന്റ്'
ഹരികുമാർ മരണത്തിലേക്ക് നടക്കാൻ തീരുമാനിക്കും മുമ്പ് മകന്റെ കുഴിമാടത്തിൽ ജമന്തിപൂവ് വച്ച് പ്രാർത്ഥിച്ചു; എന്റെ മകനെ കൂടി നോക്കികോളണം എന്ന് കുറുപ്പെഴുതി പാൻസിന്റെ പോക്കറ്റിൽ സൂക്ഷിച്ചു; മകനോട് ആവശ്യപ്പെട്ടത് അമ്മയെ നോക്കണമെന്നും; നെയ്യാറ്റിൻകരക്കാർ ആഘോഷമാക്കിയപ്പോൾ കല്ലമ്പലത്ത് മാധ്യമ വിചാരണയിൽ കടുത്ത രോഷം
ജനം ടിവിയുടെ കുതിപ്പ് കണ്ട് ഞെട്ടിയ ചാനൽ മുതലാളിമാർക്ക് ഇരിക്കപ്പൊറുതിയില്ല; വിപ്ലവകാരികളായ റിപ്പോർട്ടർമാരെ മുഴുവൻ മാറ്റി അയ്യപ്പഭക്തരെ തന്നെ ശബരിമല റിപ്പോർട്ടിങ് ഏൽപ്പിച്ച് മനോരമയും മാതൃഭൂമിയും ഏഷ്യാനെറ്റും അടക്കമുള്ള ചാനലുകൾ; വേണുവിനെ പോലുള്ള സ്റ്റാർ അവതാരകർ സ്വയം മാറിയതോടെ മാതൃഭൂമിക്ക് ആശ്വാസമായെങ്കിൽ ഷാനി പ്രഭാകരനെ വടക്കേ ഇന്ത്യയിലേക്ക് അയച്ച് അയ്യപ്പദാസിനെ പുതിയ സ്റ്റാറാക്കി മനോരമയുടെ പിടിച്ചു നിൽക്കൽ ശ്രമം
കേന്ദ്രമന്ത്രി പൊൻ രാധാകൃഷ്ണനെ തടഞ്ഞിട്ടും പാഠം പഠിക്കാത്ത യതീഷ് ചന്ദ്ര ഒടുവിൽ കൈവച്ചത് ഹൈക്കോടതി ജഡ്ജിയുടെ മേൽ; ജഡ്ജിയെ നിലയ്ക്കലിൽ തടയുകയും പുറത്തിറക്കി പരിശോധിക്കുകയും തർക്കിക്കുകയും ചെയ്തതോടെ കാര്യങ്ങൾ കൈവിട്ടു; ജഡ്ജിയെ സന്നിധാനത്ത് പോയി കണ്ട് മാപ്പ് പറഞ്ഞ് മടങ്ങാൻ നേരം ഹരിവരാസനം കേൾക്കാൻ എത്തിയതെന്ന് വിശദീകരിച്ചത് വീണ്ടും വിവാദമായി; യതീഷ് ചന്ദ്രയെ സർക്കാർ കൈവിട്ടത് ജഡ്ജിയുടെ പരാതി കൂടി എത്തിയതോടെ