1 usd = 71.83 inr 1 gbp = 95.30 inr 1 eur = 84.64 inr 1 aed = 19.56 inr 1 sar = 19.16 inr 1 kwd = 237.36 inr

Sep / 2018
21
Friday

സി.ജെ. തോമസ്: വിചാരവിപ്ലവങ്ങൾ

March 18, 2018 | 09:59 AM IST | Permalink



സി.ജെ. തോമസ്: വിചാരവിപ്ലവങ്ങൾ

ഷാജി ജേക്കബ്

കൃത്യം എഴുപതുവർഷം മുൻപ്, 1948ലാണ്, മഹാത്മാഗാന്ധി വധിക്കപ്പെട്ട് മുപ്പതുദിവസത്തിനുള്ളിൽ ഇന്ത്യൻ കമ്യൂണിസ്റ്റ്പാർട്ടിയുടെ കൽക്കത്താകോൺഗ്രസ് നടക്കുന്നതും തെലുങ്കാനാ മാതൃകയിൽ സായുധവിപ്ലവത്തിനാഹ്വാനം ചെയ്യുന്നതും അതിന്റെ പേരിൽ പാർട്ടി ഇന്ത്യയിൽ നിരോധിക്കപ്പെടുന്നതും കമ്യൂണിസ്റ്റുകാരനായിരുന്ന സി.ജെ. തോമസ് സോഷ്യലിസം, മതവും കമ്യൂണിസവും എന്നീ പുസ്തകങ്ങൾ പ്രസിദ്ധീകരിക്കുന്നതും കേരളത്തിലെ പുരോഗമനസാഹിത്യപ്രസ്ഥാനം പിളർപ്പിലേക്ക് നീങ്ങുന്നതും മറ്റും മറ്റും... ഫെബ്രുവരി 28 മുതൽ മാർച്ച് ആറുവരെ നടന്ന കൽക്കത്താകോൺഗ്രസിൽ ബി.ടി. രണദിവെ അവതരിപ്പിച്ച പ്രമേയം, തെലുങ്കാനാസമരത്തിന്റെ മാതൃകയിൽ ഇന്ത്യയിലുടനീളം കർഷകരും തൊഴിലാളികളും ചേർന്ന് സായുധസമരം നടത്തി, വർഗശത്രുക്കളെ ഉന്മൂലനം ചെയത്, അധികാരം പിടിച്ചെടുക്കണം എന്നതായിരുന്നു. ബൊവാനിസെൻ പിന്താങ്ങിയ പ്രമേയം പി.സി. ജോഷിയും മറ്റും എതിർത്തിട്ടും കോൺഗ്രസ് പാസാക്കി. 'ഭരണഘടനാമാർഗത്തിലൂടെ സോഷ്യലിസം നടപ്പാകില്ല' എന്ന വിശ്വാസം ഉറക്കെ പ്രഖ്യാപിച്ച കൽക്കത്താകോൺഗ്രസ് ഇന്ത്യൻ കമ്യൂണിസ്റ്റ്പാർട്ടിയുടെ ചരിത്രത്തിൽ വഴിത്തിരിവായി മാറി. 'കൽക്കത്താതീസിസ്' എന്നു കുപ്രസിദ്ധി നേടിയ ഈ നയരേഖ രണ്ടുവർഷത്തിനുശേഷം പിൻവലിക്കപ്പെട്ടു. പക്ഷെ, സംഭവിക്കാനുള്ളതൊക്കെ അപ്പോഴേക്കും സംഭവിച്ചുകഴിഞ്ഞിരുന്നു.

1948ൽ സി.ജെ. തോമസിന് മുപ്പതുവയസ്സാണ്. ഉറച്ച കമ്യൂണിസ്റ്റ് വിശ്വാസി. സോഷ്യലിസത്തിന്റെ വക്താവ്. പക്ഷെ കൽക്കത്താതീസിസ് സി.ജെ.യെ കമ്യൂണിസത്തിന്റെ ഏറ്റവും കടുത്ത വിമർശകനാക്കി മാറ്റി. സി.ജെ. മാത്രമല്ല, അന്ന് കേരളത്തിൽ കമ്യൂണിസ്റ്റ് പാർട്ടിക്കും പുരോഗമനസാഹിത്യപ്രസ്ഥാനത്തിനുമൊപ്പമുണ്ടായിരുന്ന സാംസ്‌കാരിക പ്രവർത്തകരിൽ സിംഹഭാഗവും ഇതേ നിലപാടെടുത്തു. എംപി. പോളും സി.ജെ.യും തമ്മിലുണ്ടായിരുന്ന വിഖ്യാതമായ ഐക്യം അവർ തമ്മിലുടലെടുത്ത ബന്ധുത്വത്തെക്കാൾ ഇരുപതാം നൂറ്റാണ്ടിലെന്നല്ല മനുഷ്യചരിത്രത്തിൽതന്നെ ലോകം കണ്ട ഏറ്റവും കിരാതവും ഹിംസാത്മകവുമായ രണ്ടു പ്രസ്ഥാനങ്ങളെ തള്ളിപ്പറഞ്ഞുവെന്നതിലാണ്. ക്രിസ്തുമതത്തെയും കമ്യൂണിസത്തെയും. വിശ്വാസദാസ്യത്തിനും പ്രത്യയശാസ്ത്ര ധാർഷ്ട്യത്തിനും ഭരണകൂടഭീകരതക്കുമെതിരെ യുക്തിചിന്തക്കും സ്വതന്ത്രമാനവികതക്കും ജനാധിപത്യത്തിനും വേണ്ടിയായിരുന്നു, ഇരുവരും വാദിച്ചിരുന്നത്.

ആരായിരുന്നു, സി.ജെ. തോമസ്? നിസംശയം പറയാം, മലയാളം കണ്ട ഏറ്റവും വലിയ നാടകകാരൻ. എന്നുവച്ചാൽ നാടകകൃത്തും വിവർത്തകനും ചിന്തകനും. കമ്യൂണിസത്തെ രാഷ്ട്രീയയുക്തിയോടെയും വിവേചനബുദ്ധിയോടെയും വിലയിരുത്തി നിരാകരിച്ച സ്വതന്ത്ര ബുദ്ധിജീവി. എംപി. പോളിന്റെയും കുറ്റിപ്പുഴ കൃഷ്ണപിള്ളയുടെയും എം. ഗോവിന്ദന്റെയും ശിഷ്യരിൽ ഏറ്റവും മൗലികത തെളിയിച്ച സാംസ്‌കാരിക-രാഷ്ട്രീയ വിമർശകൻ. അസാധാരണമായ പ്രതിഭയുണ്ടായിരുന്ന പത്രപ്രവർത്തകൻ, പ്രസാധകൻ. ഇംഗ്ലീഷിലും മലയാളത്തിലും മികച്ച ലേഖനങ്ങളെഴുതിയ അദ്ധ്യാപകൻ. കലയാകട്ടെ, സാഹിത്യമാകട്ടെ, നാടകമാകട്ടെ, സിനിമയാകട്ടെ, മതമാകട്ടെ, ജാതിയാകട്ടെ, അധികാരമാകട്ടെ, ഭരണകൂടമാകട്ടെ, അടിമുടി രാഷ്ട്രീയം പറഞ്ഞു, സി.ജെ. ഇത്രമേൽ വിചാരതീവ്രവും പ്രത്യയശാസ്ത്രനിർഭരവുമായി ഇത്ര കുറഞ്ഞ കാലംകൊണ്ട് തന്റെ രാഷ്ട്രീയ-സാംസ്‌കാരിക ജീവിതം തീ പോലെ ജ്വലിപ്പിച്ച മറ്റൊരു മലയാളിയില്ല എന്നുതന്നെ പറയാം.

കേസരി, പോൾ, കുറ്റിപ്പുഴ, ഗോവിന്ദൻ തുടങ്ങിയവർക്കൊപ്പം കേരളത്തിലെ സ്വതന്ത്രമാനവികചിന്തയുടെ വക്താവായി രംഗത്തുവന്ന സി.ജെ, കൽക്കത്താതീസിസിനെത്തുടർന്ന് കമ്യൂണിസത്തോടും പുരോഗമനസാഹിത്യപ്രസ്ഥാനത്തോടും പിണങ്ങിപ്പുറത്തുവന്ന മലയാളത്തിലെ ബഹുഭൂരിപക്ഷം എഴുത്തുകാർക്കും കലാപ്രവർത്തകർക്കും വേണ്ടി ശബ്ദിക്കുകമാത്രമല്ല, രാഷ്ട്രീയസ്വരൂപമാർജിച്ച മതത്തെയും മതസ്വഭാവമാർജിച്ച രാഷ്ട്രീയത്തെയും ഒരേപോലെ വിമർശിക്കുകയും ചെയ്തു. യഥാർഥത്തിൽ കേസരി മുതൽ സി.ജെ. വരെയുള്ള മൗലികരും സ്വതന്ത്രരുമായ മലയാളിബുദ്ധിജീവികളുടെ പാരമ്പര്യം പിന്തുടർന്നത് അയ്യപ്പപ്പണിക്കരും എം വി ദേവനും പി.കെ. ബാലകൃഷ്ണനും ഒ.വി. വിജയനും ആനന്ദും സക്കറിയയും സി.ആർ. പരമേശ്വരനും കെ.പി. അപ്പനും മറ്റുമാണ്. പക്ഷെ, പിൽക്കാലത്ത് ഒരുപാടു വ്യാജബിംബങ്ങൾ ഈ പാരമ്പര്യം പിടിച്ചുവാങ്ങി അരങ്ങിലെത്തിയെന്നതാണ് കേസരി മുതൽ സി.ജെ. വരെയുള്ളവരുടെ മരണാനന്തര ദുരന്തങ്ങളിലൊന്ന്. ഉദാഹരണത്തിന്, ക്രിസ്തുമതത്തെയും കമ്യൂണിസത്തെയും ഒരേ രീതിയിൽ വിമർശിച്ചു പുറന്തള്ളി ധീരമായി ജീവിച്ചുമരിച്ച പോളിന്റെയും സി.ജെ.യുടെയും ജീവചരിത്രമെഴുതിയത് മേല്പറഞ്ഞ ഇരുപ്രസ്ഥാനങ്ങളുടെയും (മറ്റു പലതിന്റെയും!) അടുക്കളനിരങ്ങി നടക്കുന്ന ഒരു അവസരവാദിയാണ്. ചരിത്രം അസംബന്ധമായും ആവർത്തിക്കുമെന്നു പറയുന്നതു വെറുതെയല്ല.

സമകാലികരും പിൻഗാമികളുമായ മലയാളിബുദ്ധിജീവികളെ ഒരുപോലെ സ്വാധീനിച്ച സി.ജെ.യുടെ ചിന്തകൾക്ക് (മലയാളികൾക്കപ്പുറത്തേക്കും സി.ജെ.യുടെ ബൗദ്ധികപ്രഭാവം വളർന്നുവെന്നതിനു തെളിവാണ് സുന്ദരരാമസ്വാമിയുടെ നോവൽ-'ജെ.ജെ. ചില കുറിപ്പുകൾ') പലരും കരുതുംപോലെ രണ്ടുഘട്ടങ്ങളില്ല, ഒറ്റഘട്ടമേയുള്ളു. കാരണം, 1948 വരെയുള്ള കാലത്ത് കമ്യൂണിസത്തെയും ക്രിസ്തുമതത്തെയും കൂട്ടിയിണക്കി സി.ജെ. എഴുതിയ കുറിപ്പുകളോ, സോഷ്യലിസത്തെക്കുറിച്ചദ്ദേഹം പ്രസിദ്ധീകരിച്ച രചനകളോ 1948ൽതന്നെ അപ്രസക്തമായി. അതുകൊണ്ട്, വിശ്വാസപരമായി സി.ജെ.യുടെ ചിന്താജീവിതത്തിന് 1948 മുതലുള്ള ഒരു മുഖം മാത്രമേയുള്ളു എന്നതാണ് വസ്തുത. ഒരാളുടെ വിശ്വാസജീവിതത്തിൽ അയാൾതന്നെ തള്ളിപ്പറയുകയും കാലഭൂപടത്തിൽ ബുദ്ധിപരമായി റദ്ദാക്കുകയും ചെയ്ത പ്രമാണങ്ങൾകൊണ്ട് വീണ്ടും അയാളെ അളക്കുന്നതിലർഥമില്ല. അങ്ങനെവരുമ്പോൾ പിന്നെ ഒരു പന്തീരാണ്ടുകാല(1948-1960)ത്തെ സി.ജെ.യുടെ വിചാരജീവിതത്തെ നെടുകെ പിളർക്കുന്ന അളവുകോലുകൾ സർഗാത്മകരചനകളുടേതും വിമർശനാത്മക രചനകളുടേതുമാണെന്നു വരുന്നു. (അദ്ദേഹത്തിന്റെ സർഗാത്മക രചനകളുടെ രാഷ്ട്രീയം, വിമർശനാത്മക രചനകളുടേതിനും തിരിച്ചും ബാധകമാണെന്ന് ഓർക്കുകയും വേണം.) എന്നുവച്ചാൽ നാടകങ്ങളും ലേഖനങ്ങളുംതന്നെ. നാടകങ്ങളിൽ ആറ് സ്വതന്ത്രരചനകളും ഏഴ് വിവർത്തനങ്ങളുമുണ്ട്. നൂറ്റൻപതിലധികം ലേഖനങ്ങളിൽ പുസ്തകരൂപത്തിൽ സമാഹൃതമായവയും അല്ലാത്തവയുമുണ്ട്. അവതന്നെ മലയാളത്തിലും ഇംഗ്ലീഷിലുമുണ്ട്. (സി.ജെ. തന്നെ പിന്നീട് പ്രസിദ്ധീകരിക്കരുത് എന്നാവശ്യപ്പെട്ട 'മതവും കമ്യൂണിസവും' എന്ന ലേഖനസമാഹാരം അതേപടി ഈ പുസ്തകത്തിൽ കെ.എം. ചുമ്മാറും ജോസ് കരിമ്പനയും ഉൾപ്പെടുത്തിയത് എന്തിനാണെന്നറിയില്ല!).

സോഷ്യലിസം, ധിക്കാരിയുടെ കാതൽ, വിലയിരുത്തൽ, ഇവൻ എന്റെ പ്രിയപുത്രൻ, സി.ജെ.-വിചാരവും വീക്ഷണവും, അന്വേഷണങ്ങൾ എന്നീ ഗ്രന്ഥങ്ങളിൽ സമാഹരിച്ചവയും നിരവധി ആനുകാലികങ്ങളിൽ പ്രസിദ്ധീകരിച്ച്, പുസ്തകരൂപത്തിൽ സമാഹരിക്കാത്തവയുമായ നൂറ്റിപ്പന്ത്രണ്ടു ലേഖനങ്ങൾ നാലുഭാഗങ്ങളായി വർഗീകരിച്ചവതരിപ്പിച്ചിരിക്കുന്നു, ഈ പുസ്തകത്തിൽ. കലയും സാഹിത്യവും; ചരിത്രം, രാഷ്ട്രീയം; ഗ്രന്ഥവിമർശനം, അവതാരിക; സിനിമാനിരൂപണം എന്നിങ്ങനെ. ഒപ്പം, ഉയരുന്നയവനിക, മനുഷ്യന്റെ വളർച്ച, മതവും കമ്യൂണിസവും എന്നീ ലേഖനസമാഹാരങ്ങൾ അങ്ങനെതന്നെയും ചേർത്തിരിക്കുന്നു. ഇരുപത്തഞ്ചോളം ലേഖനങ്ങളുണ്ട് അവയിൽ.

സി.ജെ. തന്റെ വിചാരദീപ്തമായ സാംസ്‌കാരിക, രാഷ്ട്രീയ ജീവിതത്തിൽ നിരന്തരം താല്പര്യം കാണിച്ചിരുന്ന പത്തുവിഷയമേഖലകളെക്കുറിച്ചാണ് ഈ ലേഖനങ്ങളിൽ ബഹുഭൂരിപക്ഷവും എന്നു കാണാം.

1. കമ്യൂണിസത്തോടുള്ള താത്വികവും പ്രായോഗികവുമായ വിയോജിപ്പുകളും വിമർശനങ്ങളും. 2. പുരോഗമനസാഹിത്യപ്രസ്ഥാനത്തോടുള്ള എതിർപ്പും കലഹവും. 3. ജനാധിപത്യത്തിനും മതേതര രാഷ്ട്രീയത്തിനും വേണ്ടിയുള്ള നിരന്തരമായ വാദങ്ങൾ. 4. പുരോഹിതമതത്തിനു നേരെയുള്ള വാളോങ്ങലുകൾ. 5. സാഹിത്യവിമർശനം. 6. സിനിമാനിരൂപണം. 7. നാടകചർച്ചകൾ. 8. ക്ലാസിക്കൽ-വരേണ്യ കലകൾക്കുമേൽ നടത്തുന്ന കുറ്റവിചാരണകൾ. 9. വ്യക്തിചരിത്രങ്ങൾ, തൂലികാചിത്രങ്ങൾ. 10. ചരിത്ര-സാമൂഹിക നിരീക്ഷണങ്ങൾ എന്നിവയാണ് ഈ പത്തു മേഖലകൾ.

വ്യക്തിബോധത്തിനെതിരെ സാമൂഹ്യവാദം മുന്നോട്ടുവച്ച് കമ്യൂണിസം ഉയർത്തുന്ന യാന്ത്രികരാഷ്ട്രീയത്തെ തള്ളിപ്പറഞ്ഞുകൊണ്ടാണ് സി.ജെ.യുടെ തുടക്കം. 1949ലെഴുതിയ 'ഞാൻ' എന്ന ലേഖനത്തിൽതന്നെ കാണാം, കലാപകാരിയായ സി.ജെ.യെ. ആവിഷ്‌ക്കാരസ്വാതന്ത്ര്യം മുതൽ സർവാധിപത്യപ്രത്യയശാസ്ത്രങ്ങൾ വരെയുള്ളവ ചർച്ചക്കെടുക്കുന്ന, സി.ജെ.യുടെ രാഷ്ട്രീയ-സാംസ്‌കാരിക മാനിഫെസ്റ്റോ എന്നുതന്നെ വിളിക്കാവുന്ന രചനയാകുന്നു, 'ഞാൻ'. വ്യക്തിവാദത്തിന് മുതലാളിത്തവുമായുള്ള വൈരുദ്ധ്യാത്മക ബന്ധം വിശദീകരിച്ചുകൊണ്ട് സി.ജെ. എഴുതുന്നു:

'സാമൂഹ്യവാദത്തെ നേരിടുവാൻ മുതലാളിത്തം ഇന്നു പ്രയോഗിക്കുന്ന അടവുകളെ എടുത്തുനോക്കൂ. പഴയ രീതിയിൽ വ്യക്തികൾക്കു മറ്റു വ്യക്തികളെ ചൂഷണം ചെയ്യുവാനുള്ള സ്വാതന്ത്ര്യം ഉണ്ടായിരിക്കണമെന്ന അധഃപതിച്ച വ്യക്തിവാദവുമായി കഴിഞ്ഞുകൂടുന്ന കുറെ രാഷ്ട്രങ്ങളുണ്ട്. അവയാണ് ഇന്നു ഡെമോക്രാസികളെന്നു സ്വയം വിളിക്കുന്ന പാശ്ചാത്യമുതലാളിത്തരാഷ്ട്രങ്ങൾ. ഇതുകൂടാതെ രണ്ടാമതൊരടവും അവർ പ്രയോഗിക്കുന്നുണ്ട്. നാശംകൊണ്ടു വ്യക്തിവാദം ബലഹീനമായി സാമൂഹ്യവാദം പ്രബലപ്പെട്ട രാജ്യങ്ങളിലേക്ക് അവർ മറ്റൊരു അടവെടുത്തു. അതാണ് ഒരു ഇമിറ്റേഷൻ സാമൂഹ്യവാദത്തെ അംഗീകരിക്കുകയെന്നത്. വ്യക്തിയെ അപ്രധാനമാക്കി, സമുദായത്തെ ഈശ്വരനായി അവരോധിച്ച് അവർ ഒരു സാമൂഹ്യഘടന കെട്ടിപ്പടുത്തു. ഇതാണു ഫാസിസം. വ്യക്തിയുടെ ദൈനംദിനജീവിതത്തിൽ ഫാസിസം വളരെ കൈകടത്തുന്നുണ്ട്. തൊഴിലാളിസംഘടനകളും കൂലിയും രാഷ്ട്രംതന്നെ നിയന്ത്രിക്കുക, വ്യവസായങ്ങൾ സർക്കാർ തന്നെ ഏറ്റെടുക്കുക, വിദ്യാഭ്യാസം രാഷ്ട്രീയാധികാരികളുടെ കുത്തകയാക്കുക എന്നിങ്ങനെ ജീവിതത്തിന്റെ പ്രധാന തുറകളെല്ലാം സാമൂഹ്യമായി നടത്തുക എന്നാണവരുടെ തീർപ്പ്. ഇതിനൊന്നും തെറ്റില്ല. പക്ഷേ, ഇവയെല്ലാം വ്യക്തികളുടെ ഗുണത്തിനുവേണ്ടി ആയിരിക്കണം. ഇവിടെ അങ്ങനെയല്ല. വ്യക്തികൾ മാർഗ്ഗങ്ങളും കരുക്കളും മാത്രമാണ്. സമുദായമെന്ന സത്വമാണ് ലക്ഷ്യം. ഈ ഏർപ്പാടിനു സ്റ്റേറ്റ് കാപ്പിറ്റലിസം എന്നു പറയുന്നു. ഇതു സോഷ്യലിസമല്ല. പക്ഷേ, വ്യക്തിവാദവിദ്വേഷികളായ ജനങ്ങളെ വഞ്ചിക്കുവാൻവേണ്ടി ഈ തത്ത്വത്തെ സോഷ്യലിസം എന്നു ഹിറ്റ്‌ലർ വിളിച്ചു. ജർമ്മനിയിൽ തൊഴിലില്ലായ്മ അവസാനിച്ചു. ഭക്ഷണവും കിട്ടി, പക്ഷേ, കുറെകഴിഞ്ഞ് അതിന്റെ കടംവീട്ടുകയും ചെയ്തു.

ഈ നിലയിൽനിന്നു കമ്മ്യൂണിസത്തിനെന്തായിരിക്കണം വ്യത്യാസം? ഒന്നുമാത്രം: കാളയെ വണ്ടിയുടെ മുമ്പിൽ കെട്ടണമെന്നുമാത്രം. 'വ്യക്തിസമുദായത്തിനുവേണ്ടി' എന്നതു 'സമുദായത്തിന്റെ ലക്ഷ്യം വ്യക്തിയുടെ വളർച്ച' എന്നു മാറ്റി എഴുതണമെന്നു മാത്രം. ഈ അടിസ്ഥാനതത്ത്വം മനസ്സിലാക്കാതെ പോയാൽ അവസാനം ലഭിക്കുന്നത് ജർമ്മൻ ജനതക്കു ലഭിച്ച സമ്മാനമായിരിക്കും. ഹിറ്റ്‌ലറും മുസ്സോളിനിയും ആദ്യം സോഷ്യലിസ്റ്റുകളായിരുന്നു എന്നതും മറക്കരുത്. വ്യക്തിയെ അംഗീകരിക്കാത്ത ചിന്തകനും, പ്രസ്ഥാനവും ഫാസിസത്തിലവസാനിക്കും. ഈ നിർഭാഗ്യകരമായ അവസ്ഥയിലേക്ക് വളരെയധികം സാമൂഹ്യവാദികൾ ഇന്നു നീങ്ങിത്തുടങ്ങിയിട്ടുണ്ട്. അതിനെ ഒന്നു പിടിച്ചുനിറുത്താൻ വേണ്ടിയാണ് വ്യക്തിയുടെ പ്രാധാന്യം ഊന്നിപ്പറയേണ്ടിവന്നത്'.

പിൽക്കാലത്ത് ആനന്ദിനെപ്പോലുള്ളവർ നോവലിലും ലേഖനങ്ങളിലും ചരിത്രവൽക്കരിച്ചവതരിപ്പിക്കുന്ന വ്യക്തിവാദത്തിന് മലയാളത്തിലുണ്ടായ ശ്രദ്ധേയമായ വിചാരമാതൃകകളിലൊന്നാണ് ഈ ലേഖനം. (1930കളിൽതന്നെ, പുത്തേഴത്തു രാമമേനോനെപ്പോലുള്ളവർ ഈ വിഷയത്തിൽ ചർച്ചകളവതരിപ്പിച്ചിരുന്നുവെന്നും ഓർക്കുക.)

ഇതൊരുദാഹരണം മാത്രമാണ്. ഇതേരീതിയിൽ, മനുഷ്യാവസ്ഥകൾ, മതസംഘടനകൾ, രാഷ്ട്രീയപ്രസ്ഥാനങ്ങൾ, പ്രത്യയശാസ്ത്രങ്ങൾ, അവയുടെ പ്രയോഗരീതികൾ, ഭരണകൂടങ്ങൾ തുടങ്ങിയവയൊക്കെ മുൻനിർത്തി വ്യക്തിയെയും സമൂഹത്തെയും ഒരുപോലെ ബാധിക്കുന്ന എത്രയെങ്കിലും വിഷയങ്ങളെ പ്രശ്‌നവൽക്കരിക്കുന്നവയാണ് സി.ജെ.യുടെ മിക്ക ലേഖനങ്ങളും.

നിരവധിരചനകളിൽ സി.ജെ. പ്രത്യക്ഷവും പരോക്ഷവുമായി സൂചിപ്പിക്കുന്ന തന്റെ രാഷ്ട്രീയവിശ്വാസപരിവർത്തനത്തിന്റെ കഥകൾ ഒന്നടങ്കം വിരൽചൂണ്ടുന്നത് സ്റ്റാലിനിസത്തിന്റെ വൻപിഴവുകളിലേക്കും കൽക്കത്താതീസിസ് പുറത്തുകൊണ്ടുവന്ന ഇന്ത്യൻ കമ്യൂണിസ്റ്റുകളുടെ ചോരക്കൊതി മുഴുത്ത ദംഷ്ട്രകളിലേക്കുമാണ്.

രണ്ടുതലങ്ങളിൽ കാണാം, 'അപ്പസ്‌തോലനല്ലാത്ത തോമസ് കമ്യൂണിസ്റ്റുകാർക്കെഴുതിയ ലേഖന'ങ്ങളുടെ രാഷ്ട്രീയത്തെ. ഒന്ന്, സോവിയറ്റ് കമ്യൂണിസത്തിന്റെയും സ്റ്റാലിനിസത്തിന്റെയും പശ്ചാത്തലത്തിൽ കമ്യൂണിസ്റ്റ് ഭരണകൂടങ്ങൾക്കു സംഭവിച്ച മൂല്യത്തകർച്ചയുടെയും ഹിംസാത്മക സ്വരൂപങ്ങളുടെയും വിമർശനം. രണ്ട്, ഇന്ത്യൻ പശ്ചാത്തലത്തിൽ കമ്യൂണിസ്റ്റ്പ്രസ്ഥാനങ്ങൾക്ക് സംഭവിക്കുന്ന ഫാസിസ്റ്റ് പരിണാമങ്ങളുടെ വിശകലനം. 'രാഷ്ട്രീയകേരളത്തിന്റെ മാറിക്കൊണ്ടിരിക്കുന്ന മുഖം' എന്ന ലേഖനത്തിൽ സി.ജെ. എഴുതുന്നു:

'1947 വരെ തങ്ങൾക്കു ചുറ്റുമുള്ള എണ്ണമറ്റ പുരോഗമനപ്രത്യയശാസ്ത്രങ്ങളിലൊന്നായി കമ്യൂണിസം പരിഗണിക്കപ്പെട്ടുപോന്നു. ബുദ്ധിജീവികളുൾപ്പെടെ നിരവധിയാളുകൾ കമ്യൂണിസ്റ്റുപാർട്ടിയുടെ നാട്യങ്ങളിൽ വശീകരിക്കപ്പെടുകയും സംസ്ഥാനരാഷ്ട്രീയത്തിലെ ആരോഗ്യകരമായ ഒരു സ്വാധീനശക്തിയായിരിക്കും കമ്യൂണിസം എന്ന് വിശ്വസിക്കുകയും ചെയ്തു. സമത്വാധിഷ്ഠിതമായ ഒരു വിപ്ലവത്തിനുമേൽ ഗാന്ധിസം അടിച്ചേല്പിച്ച് അതിന് ഒരു സർറിയലിസ്റ്റ് പരിവേഷം സൃഷ്ടിച്ചുകൊടുത്തു. വയലാറും പുന്നപ്രയും ഇതിന് ചെറിയൊരു ഷോക്ക് നൽകി. 1948-ലെ തിരഞ്ഞെടുപ്പുകഥയിലെ വില്ലനായി ദിവാനെ അവതരിപ്പിച്ചുകൊണ്ടുള്ള ഒരു കപടവ്യാഖ്യാനം രചിക്കുവാനുള്ള അവസരം കമ്യൂണിസ്റ്റുകൾക്കു ലഭിച്ചു. എന്നാൽ കൽക്കത്താതീസിസ് എല്ലാ കാപട്യങ്ങളെയും ചീന്തിത്തെറിപ്പിച്ചു. പരിപാടിയുടെ പടുവങ്കത്തവും, അതിന്റെ പേരിൽ നടപ്പിലാക്കിയ കൊടും ക്രൂരതകളും കൂടിച്ചേർന്ന് ആദർശശാലികളുടെ കണ്ണുതുറപ്പിച്ചു. അതോടെ മാർക്‌സിസ്റ്റു മായാവലയത്തിൽ നിന്നുള്ള കൂട്ടപ്രയാണമാരംഭിച്ചു. ഇതുകൊണ്ട് കമ്യൂണിസ്റ്റു സ്വാധീനം കുറയേണ്ടതായിരുന്നെങ്കിലും അതുണ്ടായില്ല. ഏകാധിപത്യത്തോട് ഇണങ്ങിച്ചേരാൻ പറ്റാത്തയത്ര ആദർശശാലികളെക്കൊണ്ട് പാർട്ടി വീർപ്പുമുട്ടുകയായിരുന്നു. പുറത്തുപോയ ഓരോ ആദർശശാലിയുടെയും സ്ഥാനത്ത് പത്തു ക്രിമിനൽ വീതം പ്രത്യയശാസ്ത്രരംഗത്ത് വന്ന് അടിഞ്ഞുകൊണ്ടിരുന്നു. താത്ത്വികചർച്ചയുടെ ആവശ്യവും അതോടെ അവസാനിച്ചു. പുതിയ റിക്രൂട്ടുകൾ ചോദ്യം ചോദിച്ചില്ല. ഈ സാഹചര്യത്തിലാണ് വർഗ്ഗീയതയുടെ വിശാലവിഭാഗം തീവ്രയത്‌നം തുടങ്ങിയത്. ജനാധിപത്യത്തിന്റെ അംശം തെല്ലെങ്കിലും ഉണ്ടായിരുന്നെങ്കിൽ അതും ഇതോടെ നിലംപരിശായി. അങ്ങനെ 1957-ൽ കമ്യൂണിസ്റ്റുകൾ അധികാരക്കസേരയിൽ കടന്നുകൂടി'.

തുടർന്ന്, ഒരുഡസനിലധികം ലേഖനങ്ങളിലെങ്കിലും സി.ജെ. കമ്യൂണിസത്തോടുള്ള തന്റെ താത്വികവും പ്രായോഗികവുമായ വിയോജിപ്പുകൾ നിശിതമായി രേഖപ്പെടുത്തുന്നു.

ഈ രാഷ്ട്രീയവിമർശനത്തിന്റെ സാംസ്‌കാരിക മുഖമാണ് പുരോഗമനസാഹിത്യ പ്രസ്ഥാനത്തോടുള്ള എതിർപ്പിന്റെയും വിമർശനത്തിന്റെയും സ്വരമായി ഇനിയൊരു വിഭാഗം ലേഖനങ്ങളിൽ മുഴങ്ങുന്നത്. 1944-48 കാലത്തു കരുത്താർജ്ജിച്ച പുരോഗമന സാഹിത്യപ്രസ്ഥാനത്തെ കൈപ്പിടിയിലൊതുക്കാൻ കമ്യൂണിസ്റ്റുകൾ നടത്തിയ വിഫലശ്രമവും കൽക്കത്താതീസിസ് മിക്ക എഴുത്തുകാരിലും കലാപ്രവർത്തകരിലും സൃഷ്ടിച്ച കടുത്ത അമർഷവുമാണ് ആ സംഘടനയുടെ ശൈഥില്യത്തിനു വഴിവച്ചത്. നിരവധി ലേഖനങ്ങളിൽ സി.ജെ. ഈ പ്രശ്‌നം ചർച്ചചെയ്യുന്നുണ്ടെങ്കിലും 1959ലെഴുതിയ 'എഴുത്തുകാരുടെ പ്രതികാര'മാണ് ഈ വിഷയത്തിലെ ക്ലാസിക്. എംപി. പോൾ, സ്വതന്ത്രമാനവികതയുടെ ചിന്തമുൻനിർത്തി കമ്യൂണിസ്റ്റുകാരുടെ കുതന്ത്രങ്ങൾ തകർത്തുതരിപ്പണമാക്കിയതിന്റെ ചരിത്രഗാഥയാണീ ലേഖനം. കേരളത്തിലെ എഴുത്തുകാരും കമ്യൂണിസ്റ്റുകാരും തമ്മിലുള്ള പോരാട്ടത്തിൽ അവസരവാദനിലപാടെടുത്ത ജോസഫ് മുണ്ടശ്ശേരിയെ സി.ജെ. നിലംപരിശാക്കുന്നു.

ജനാധിപത്യ, മതേതര ദേശീയതക്കുവേണ്ടിയുള്ള സി.ജെ.യുടെ വാദങ്ങൾ മേല്പറഞ്ഞ കമ്യൂണിസ്റ്റ് - ഫാസിസ്റ്റ് വിമർശനത്തിന്റെ മറുപുറമാണ്. ഇംഗ്ലീഷിലും മലയാളത്തിലുമെഴുതിയ നിരവധി ലേഖനങ്ങളിൽ സി.ജെ. തന്റെ ജനാധിപത്യവിശ്വാസം ഉറക്കെ പ്രഖ്യാപിക്കുന്നു. വലിയ ഒരു ഇന്ത്യൻഫലിതം (A Great Indian Joke), ഞാൻ കുറ്റപ്പെടുത്തുന്നു (I accuse) തുടങ്ങിയവ ഉദാഹരണം.

ഒന്നാം കമ്യൂണിസ്റ്റ് മന്ത്രിസഭക്കെതിരെ നടന്ന വിമോചനസമരത്തെ ജനാധിപത്യശക്തികളുടെ പ്രക്ഷോഭമായി വിശദീകരിക്കുന്ന നിരവധി രചനകളിൽ ഇതേ നിലപാടാവർത്തിക്കുന്നു, സി.ജെ.

പുരോഹിതമതത്തിനു നേരെയുള്ള കലാപങ്ങളിൽ സി.ജെ, എംപി. പോളിന്റെ പിൻഗാമിയാകുന്നു. പുരോഹിതനാകാൻ സെമിനാരിയിൽ ചേർന്ന് കുപ്പായമിട്ട് ശെമ്മാശ്ശനായെങ്കിലും പിന്നീടതുപേക്ഷിച്ചുവന്നയാളാണല്ലോ സി.ജെ. കമ്യൂണിസത്തെയെന്നപോലെ ക്രിസ്തുമതത്തെയും ക്രൈസ്തവവർഗീയതയെയും നിരന്തരം എതിർത്തുപോന്നു, അദ്ദേഹം. സംഘടിതമായ ഏതു ചൂഷകപ്രസ്ഥാനത്തെയും സി.ജെ. വിളിച്ചതുതന്നെ 'മതം' എന്നായിരുന്നു.

സാഹിത്യവിമർശനം എന്ന ഗണത്തിൽപ്പെടുത്താവുന്ന കുറെയേറെ രചനകളുണ്ട് സി.ജെ.യുടേതായി. കവിത, കഥ, നോവൽ തുടങ്ങിയ സാഹിത്യരൂപങ്ങളെ കേന്ദ്രീകരിച്ചും ഈ രൂപങ്ങളിലുണ്ടായ കൃതികളെ കേന്ദ്രീകരിച്ചും സി.ജെ. എഴുതിയ ലേഖനങ്ങൾ അവതാരിക മുതൽ പഠനം വരെയുള്ള വിഭാഗങ്ങളിൽപെടുന്നു. സാഹിത്യകൃതികളിലെ സാമൂഹികയാഥാർഥ്യങ്ങൾ, രാഷ്ട്രീയപ്രമാണങ്ങൾ, ലാവണ്യകല എന്നിവയൊക്കെ അദ്ദേഹം വിശകലനം ചെയ്തു. മുഖം നോക്കാത്ത വിമർശനത്തിന്റെ സുന്ദരകലയാണ് സി.ജെ.യുടെ സാഹിത്യനിരൂപണങ്ങൾ വെളിപ്പെടുത്തുന്നത്.

സിനിമാനിരൂപണമാണ് മറ്റൊരിനം. മലയാളത്തിൽ ചലച്ചിത്രവിമർശനത്തിനടിത്തറപാകിയവരിലൊരാൾ സി.ജെ.യാണെന്നതിൽ തർക്കമില്ല. 1950കളുടെ തുടക്കത്തിലാണ് സി.ജെ.യുടെ ശ്രദ്ധേയമായ പല സിനിമാപഠനങ്ങളും പുറത്തുവരുന്നത്. നവലോകം, ജീവിതനൗക തുടങ്ങിയ മലയാളചിത്രങ്ങളെ വിശദമായി അവലോകനം ചെയ്യുന്നവ, തമിഴ്‌സിനിമകളെ നിശിതമായി ഗുണദോഷവിചിന്തനം നടത്തുന്നവ, ചലച്ചിത്രമെന്ന വ്യവസായത്തെക്കുറിച്ചുള്ള ശ്രദ്ധേയമായ വിശകലനങ്ങൾ എന്നിങ്ങനെ. സിനിമയുടെ സാങ്കേതിക, ദൃശ്യഭാവുകത്വങ്ങൾ സൂക്ഷ്മമായി പരിഗണിക്കുന്നവയാണ് ഈ രചനകളൊന്നടങ്കം-സാഹിത്യവായനകളല്ല, എന്നർഥം.

നാടകത്തെക്കുറിച്ച് 'ഉയരുന്ന യവനിക'യിലും അല്ലാതെയും നിരവധി ലേഖനങ്ങളെഴുതി, സി.ജെ. ഗ്രീക്ക് നാടകവേദിയെ ഇത്രമേൽ ആദർശാത്മകവും പ്രായോഗികവും കാലികവുമായി ഉൾക്കൊണ്ട മറ്റൊരു നാടകകാരൻ മലയാളത്തിലില്ല. മലയാളനാടകത്തിന്റെ ചരിത്രം, നിരവധി നാടകങ്ങളുടെ നിരൂപണം, രാഷ്ട്രീയ നാടകമെന്ന ഗണത്തെക്കുറിച്ചുള്ള പഠനം, എല്ലാറ്റിനുമുപരി നാടകത്തെക്കുറിച്ചുള്ള കലാതത്വവിചാരങ്ങൾ-സി.ജെ.യുടെ നയവും സമീപനവും സുവ്യക്തമായിരുന്നു. ഇ.എം.എസിന്റെ 'പാട്ടബാക്കി' പഠനം പോലെതന്നെ പ്രസിദ്ധമാണ് സി.ജെ.യുടെയും 'പാട്ടബാക്കി'ചർച്ച. നോക്കുക:

'മലബാറിലെ എണ്ണമറ്റ ഗ്രാമങ്ങളിൽ പാട്ടബാക്കി അഭിനയിക്കപ്പെട്ടു. നാടകകൃത്തും, ശ്രീ.എ.കെ. ഗോപാലൻ, സർദാർ ചന്ത്രോത്ത് മുതലായവരും നടന്മാരായിരുന്നുവെന്നു പറയുമ്പോൾത്തന്നെ പാട്ടബാക്കിയുടെ രാഷ്ട്രീയകടമ വ്യക്തമാകുന്നുണ്ടല്ലോ. പത്തും പന്ത്രണ്ടും മൈലകലെ നിന്നു പാട്ടബാക്കി കാണാൻ വേണ്ടി കൃഷിക്കാർ നടന്നെത്തുകയെന്നത് ഒരു സാധാരണ സംഭവമായിരുന്നു. അഭിനയത്തിനിടയിൽ സദസ്യർ എഴുന്നേറ്റുനിന്നു നീചപാത്രങ്ങളുടെ സംഭാഷണങ്ങൾക്കു ചുട്ട മറുപടി കൊടുക്കാറുണ്ടായിരുന്നുവെന്നതിൽ കവിഞ്ഞ് ഒരു നാടകത്തിന് എന്തു വിജയമാണു വേണ്ടത്? അഭിനയത്തിന്റെ അന്ത്യത്തിൽ രാഷ്ട്രീയപ്രസംഗങ്ങളും സംഘടനാപ്രവർത്തനങ്ങളും നടക്കാറുമുണ്ടായിരുന്നു. അതിനുള്ള പ്രചോദനമാണ് സദസ്യർക്കു നാടകത്തിൽനിന്നു കിട്ടിയിരുന്നത്. കരഞ്ഞുനശിക്കുന്ന ഒരു ജനതയെയല്ല, പോരാടി ജീവിക്കുന്ന ഒരു ജനതയെയാണ് 'പാട്ടബാക്കി' ചിത്രീകരിക്കുന്നത്. പ്രചരണമെന്ന നിലയ്ക്ക് ഏറ്റവും വിജയകരമായ മലയാളരാഷ്ട്രീയനാടകം ഏതെന്നു ചോദിച്ചാൽ 'പാട്ടബാക്കി' എന്നു ഞാൻ ഉച്ചത്തിൽ വിളിച്ചുപറയും'.

കഥകളിയുൾപ്പെടെയുള്ള ക്ലാസിക്കൽ രംഗകലകൾ എങ്ങനെ കേരളീയ നാടകവേദിയെയും അഭിനയമെന്ന കലാനുഭവത്തെയും തളർത്തി എന്നന്വേഷിക്കുന്ന നിരവധി ലേഖനങ്ങളുണ്ട് സി.ജെ. തോമസിന്റേതായി. യാതൊരു ദാക്ഷിണ്യവുമില്ലാതെ ക്ലാസിക്കൽ-ശാസ്ത്രീയ-വരേണ്യ-ശൈലീകൃത കലകളെയും സാംസ്‌കാരിക രൂപങ്ങളെയും അവയുടെ യാന്ത്രികഭാവനകളെയും അദ്ദേഹം കടന്നാക്രമിച്ചു. ശ്രദ്ധിക്കുക:

'കഥകളിയെപ്പോലെ മലയാളനാടകവേദിയെ നശിപ്പിച്ച മറ്റൊരു ശക്തിയില്ല. ഈ പ്രാകൃതയാന്ത്രികകല പ്രചരിക്കുന്നിടത്തോളം കാലം ഇവിടെ അഭിനയമെന്നൊന്നുണ്ടാകയില്ല. മുദ്ര കാണിക്കുന്നത് അഭിനയമല്ല. അതു രണ്ടും തമ്മിലുള്ള വ്യത്യാസം സംസാരവും മോഴ്‌സ്‌കോഡും തമ്മിലുള്ളതാണ്. ഒരു നൃത്തരൂപത്തിലെ പ്രതീകമെന്ന നിലയ്ക്കു കഥകളിയിലെ മുദ്രകൾക്ക് ഒരു കലാമൂല്യമുണ്ട്. പക്ഷേ, അതിൽനിന്നു രണ്ടു മഹാദ്രോഹങ്ങൾ ജനിക്കുന്നു. ഒന്ന്: അഭിനയമെന്ന വാക്കിനെപ്പറ്റിത്തന്നെ തെറ്റിദ്ധാരണ. രണ്ട്: യാന്ത്രികവും കൃത്രിമവുമായ അഭിനയം'.

സമഗ്രവും വിമർശനാത്മകവുമായ വ്യക്തി-തൂലികാചിന്ത്രങ്ങളായി സി.ജെ. അവതരിപ്പിക്കുന്ന ചില ദീർഘലേഖനങ്ങളുണ്ട്. കേസരി ബാലകൃഷ്ണപിള്ള, ഇ.എം.എസ്. നമ്പൂതിരിപ്പാട്, ചങ്ങമ്പുഴ കൃഷ്ണപിള്ള തുടങ്ങിയവരെക്കുറിച്ചുള്ളവ ഉദാഹരണം. 'അ........അ......അതെനിക്കറിയില്ല' എന്നാരംഭിക്കുന്ന, ഇ.എം.എസിനെക്കുറിച്ചുള്ള സി.ജെ.യുടെ ലേഖനം പ്രസിദ്ധമാണ്. അദ്ദേഹം എഴുതുന്നു:

'ശ്രീ. ഇ.എം.എസ്. വൈരുദ്ധ്യങ്ങളുടെ ഒരു സമാഹാരമാണ്. വിക്കനാണെങ്കിലും അദ്ദേഹം ബൈബിളിലെ മോശയെപ്പോലെ ഒരു അഹറോന്റെ സഹായം തേടുന്നില്ല. പല സ്ഥലങ്ങളിലും അദ്ദേഹം പ്രസംഗിക്കുന്നതു കേട്ടിട്ടുണ്ട്. കൂടെപ്പിറപ്പായ വിക്ക് ശ്രോതാക്കളെ ശ്വാസം മുട്ടിക്കാറുണ്ട്. പക്ഷെ, യാതൊരു പൊടിപ്പും തൊങ്ങലും വച്ചുകെട്ടാത്ത അദ്ദേഹത്തിന്റെ പ്രസംഗങ്ങൾ കേൾവിക്കാരെ തൃപ്തിപ്പെടുത്താറുണ്ട്. വാക്‌ധോരണി അദ്ദേഹത്തിനില്ല. ഹ്രസ്വതയാണ് അദ്ദേഹത്തിന്റെ പ്രസംഗത്തിന്റെ വിശിഷ്ടസ്വഭാവം. ഏറ്റവും കുറച്ചു വാക്കുകളിൽ വളരെയധികം ആശയങ്ങൾ പ്രകടിപ്പിക്കുന്നതിന് അദ്ദേഹത്തിന് പാടവമുണ്ട്. ചുരുക്കത്തിൽ, വിക്കനായ വാഗ്മി-അതാണ് ശ്രീ. ഇ.എം.എസ്. വിക്ക് മാത്രമല്ല, അദ്ദേഹത്തിന്റെ കുറവ്. ചുട്ട മാമ്പഴംപോലെ യാതൊരാകൃതിയുമില്ലാത്ത തല, അത്ഭുതം മാത്രം ദ്യോതിപ്പിക്കുന്ന കണ്ണുകൾ, മഠയനെന്നു വിളിച്ചുപറയുന്ന ആ വായ്, അതിനെല്ലാം ഉപരിയായി മുള്ളൻ പീലിപോലെ എഴുന്നേറ്റുനിൽക്കുന്ന മുടി- ഈ ഭൂഷണങ്ങളുടെ എല്ലാം കേദാരമായ ആ വികൃതരൂപത്തെ നേതാവായിട്ട് അംഗീകരിക്കുന്ന രാഷ്ട്രീയപ്രസ്ഥാനത്തിനു മൗലികമായിട്ടെന്തോ കുറവുണ്ടെന്നു സൗന്ദര്യാരാധകന്മാർ തലകുലുക്കി സമ്മതിക്കും. പോരെങ്കിൽ 'സൃഷ്ടിച്ച മണ്ണിലധികം മഷിചേർത്തു ദുഷ്ടൻ' എന്നു കവിപാടിയതും ഇദ്ദേഹത്തെ സംബന്ധിച്ചാണെന്നു തോന്നുന്നു'.

ചരിത്ര-സാമൂഹിക-നരവംശശാസ്ത്ര നിരീക്ഷണങ്ങളാണ് മറ്റൊരിനം. കേസരിയെ പിൻപറ്റിയെഴുതിയവയാണ് ഇവ മിക്കതും. ഇന്നുവായിക്കുമ്പോഴും ചരിത്രപരവും സാംസ്‌കാരികവുമായ കൗതുകം ജനിപ്പിക്കുന്നവ. വിശേഷിച്ചും പശ്ചിമേഷ്യൻ സംസ്‌കാരമാതൃകകളെ മുൻനിർത്തുന്ന ലേഖനങ്ങൾ.

മേല്പറഞ്ഞ വിഷയമേഖലകളേതിലുമാകട്ടെ, സി.ജെ.യുടെ ആഖ്യാനഭാഷയ്ക്കുള്ള കരുത്തും സൗന്ദര്യവും ഒന്നു വേറെതന്നെയാണ്. മുനവച്ച പ്രയോഗങ്ങൾ, ഇരുതലമൂർച്ചയുള്ള ശൈലികൾ, നിശിതമായ പരിഹാസങ്ങൾ, കടുകിട തെറ്റാതെയുള്ള ആക്രമണങ്ങൾ ....ധ്വന്യാത്മകവും വൈരുദ്ധ്യാത്മകവുമായ ഗദ്യത്തിന്റെ ഉളിത്തല സി.ജെ. സദാ മുന്നോട്ടുവയ്ക്കും പിന്നീട് കെ.പി. അപ്പനിലൂടെ ഏറെ പ്രസിദ്ധമായ മലയാളഗദ്യത്തിലെ കാവ്യാത്മകബിംബകല്പനകളുടെ തുടക്കം സി.ജെ.യിൽ കാണാൻ വിഷമമില്ല. (ഭാസ്‌കരൻനായരിലും!) ചില ഉദാഹരണങ്ങൾ നോക്കുക:

'മരണംവരെ അദ്ദേഹത്തിന് ദ്രോഹികളോടും വിഡ്ഢികളോടും സമരം ചെയ്യേണ്ടിവന്നു'.

'ഇംഗ്ലണ്ടിന്റെ ചരിത്രത്തിൽ ക്രോംവെല്ലിന്റെ ശിപായിയോളം സ്ഥാനമില്ല ഷെല്ലിക്ക്'.

'നിലനില്പു ലഭിച്ച ഏതു ചിന്താഗതിയും മതമായിത്തീരും. ഏത് മതവും ജ്ഞാനത്തിനൊരതിരുവെയ്ക്കും. അതിനപ്പുറമുള്ളതിനെയെല്ലാം ആ മതത്തിന്റെ പുരോഹിതന്മാർ ശപിക്കുകയും ചെയ്യും'.

'തോഴിയുടെ വളയോ, വാസവദത്തയുടെ വളയോ കിലുങ്ങിയതെന്നുള്ള വാദപ്രതിവാദം ഇനിയുമുണ്ടാകുമെന്നു തോന്നുന്നില്ല'.

'കുറേക്കാലത്തേയ്ക്ക് എഴുതാതിരിക്കുക എന്നുള്ളതാണ് നമ്മുടെ കവികൾക്കു ഭാഷയോടു ചെയ്യാവുന്ന ഏറ്റവും വലിയ സേവനം'.

'കേരളത്തിലെ കമ്യൂണിസത്തിന്റെ പിന്നിലുണ്ടായിരുന്നത് തൊഴിലാളിവർഗ്ഗമായിരുന്നില്ല; മുടിഞ്ഞ ഫ്യൂഡലിസമായിരുന്നു'.

പുസ്തകത്തിൽനിന്ന്:-

'ബുദ്ധിയും അറിവുമെല്ലാം കൈവെപ്പു സിദ്ധിച്ച ഒരു ന്യൂനപക്ഷത്തിന്റെ കൈയിലിരിക്കുന്ന രാഷ്ട്രീയത്തിന്റെ പേർ ഫാഷിസമെന്നാണ് - ഫൂററും അസിസ്റ്റന്റു ഫൂറർമാരുമാണ് അവിടെ മനുഷ്യരെ ഭരിക്കുന്നത്. മുകളിൽനിന്ന് അധികാരം, താഴെനിന്ന് അനുസരണം എന്നാണ് തത്ത്വം. അങ്ങനെ ചോദ്യം ചെയ്യാതെ അനുസരിച്ചാൽ അതുകൊണ്ട് ബുദ്ധിയും ലഭിക്കുമത്രേ. സർവ്വവിജ്ഞാനവും അങ്ങനെ കൈക്കലാക്കാം. ജന്നിങ്‌സിനേക്കാൾ രാജ്യതന്ത്രം, കീൻസിനേക്കാൾ ധനശാസ്ത്രം, റസ്സലിനെക്കാളധികം തത്ത്വശാസ്ത്രം! എത്ര എളുപ്പമായ മാർഗ്ഗം. കണ്ടമാനം ധൂർത്തടിച്ച് ദീപാളികുളിച്ച് 'ദുഷിച്ചുനാറിയ സമുദായഘടന'യെ തെറിപറഞ്ഞ് രക്തസ്‌നാനം ഏറ്റുകഴിഞ്ഞ ഒരുവൻ ഞെളിഞ്ഞുനിന്ന് ലോകത്തിനു ജ്ഞാനമോതുകയാണ്: റോളണ്ട് അസ്ഥിരബുദ്ധിയാണ്, ഫ്രോയിഡ് ഞരമ്പുരോഗിയാണ്, ഗാന്ധി ഒറ്റുകാരൻ ബനിയാനാണ്. ഇവരുടെ കൈയിലിരിക്കുന്നത് ശാസ്ത്രമല്ല. സൂപ്പർശാസ്ത്രമാണ് - ശാസ്ത്രങ്ങളുടെയെല്ലാം താക്കോൽശാസ്ത്രം. അതറിഞ്ഞുകഴിഞ്ഞാൽ പിന്നെ സകലതുമറിയാം. അറിയുവാനുള്ള മാർഗ്ഗവും വളരെ ലളിതമാണ് - മാനസാന്തരം മാത്രം.

ജനായത്തത്തെ നിഷേധിക്കുന്ന ഏതു രാഷ്ട്രീയവും, ലേബലെന്തൊട്ടിച്ചാലും, ഫാഷിസംതന്നെ. വിശദീകരണം, വ്യാഖ്യാനം, ടിപ്പണി മുതലായവ ലക്ഷ്യത്തെ മൂടിക്കളയരുത്. സോവിയറ്റു യൂണിയൻ അപകടത്തിലാവുമ്പോൾ മാർക്‌സിസം ജീവകാരുണ്യത്തെ ആദരിക്കും, റേഷൻ വിതരണത്തിന് പ്രസംഗിക്കും, പട്ടാളത്തിലേക്ക് ആളുപിടിക്കും. ദേശീയവിമോചനസമരവും വിപ്ലവവപം നീട്ടിവയ്ക്കും. യുദ്ധം കഴിഞ്ഞാൽ ഭാഷ്യം മാറി, ജീവകാരുണ്യത്തെ പുച്ഛമായി. ആസിഡ് ബൾബുകൾ ശേഖരിക്കുന്നു. അതു പരാചയപ്പെടുമ്പോൾ പിന്നെയും ഭാഷ്യം മാറും. സമാധാനപ്രസ്ഥാനമായി, വോട്ടുപിടുത്തമായി: ഇങ്ങനെ യാതൊരു സത്യദീക്ഷയുമില്ലാതെ രാഷ്ട്രീയതോന്ന്യാസം കാണിക്കുന്നതെല്ലാം ഒരാദർശത്തിനുവേണ്ടിയാണത്രേ. എല്ലാം സോഷ്യലിസത്തിനുവേണ്ടി! പക്ഷേ, അക്കൊടിയുമേന്തി നടന്നിരുന്നവരിൽനിന്നാണ് മുസ്സോളിനിക്കും ഹിറ്റ്‌ലറിനും സഖാക്കളെ കിട്ടിയതെന്ന് ചരിത്രം പറയുന്നു. ഫാഷിസം മുതലാളിതത്ത്വശാസ്ത്രമാല്ല, നിരാശരായ ഇടത്തരക്കാരുടെ പ്രതികാരപ്രസ്ഥാനമാണ്. സോഷ്യലിസ്റ്റ് പ്രസ്ഥാനം (പ്രത്യേകിച്ചും അത് ഇടത്തരക്കാരുടെ നേതൃത്വത്തിലായിരിക്കുമ്പോൾ) ഫാഷിസ്റ്റായി തിരിയുക എന്നത് അസാദ്ധ്യമല്ല, അസാധാരണവുമല്ല. ഫാഷിസ്റ്റുകാർ ജീവിതസൗകര്യങ്ങൾക്കുവേണ്ടി വാദിക്കുന്നു. മുതലാളിത്തത്തെ എതിർക്കുന്നു. ദിവ്യ വെളിപാട് അവകാശപ്പെടുന്നു. സർവജ്ഞാനഭാവം അഭിനയിക്കുന്നു. ഭിന്നചിന്താഗതിക്കാരെ രക്തത്തിലൊഴുക്കുന്നു. ജനാധിപത്യമെന്ന പ്രധാന കാര്യം അപ്രായോഗികമായി തള്ളുന്നു. ആദർശധീരതയില്ലാത്ത സോഷ്യലിസ്റ്റുകാർ ഫാഷിസ്റ്റായിത്തീരാൻ സമയമധികം വേണ്ട. ഇന്ത്യയിലിന്ന് സംഭവിച്ചുകൊണ്ടിരിക്കുന്നത് അതുതന്നെയാണ്. ഒരുവശത്ത് അവർ സ്വയം ഫാഷിസ്റ്റായി തീരുക, മറുവശത്ത് ഗവൺമെന്റിനെയും പൊതുജനങ്ങളെയും ഫാഷിസ്റ്റ് മനോഭാവത്തിലേക്ക് പിടിച്ചുതള്ളുക, ഇതാണ് നമ്മുടെ കമ്മ്യൂണിസ്റ്റുകൾ ചെയ്തുകൊണ്ടിരിക്കുന്നത്. മതത്തിന്റെയും ജാതിയുടെയും അന്തരീക്ഷത്തിൽ വളർന്ന ഒരു ജനതയ്ക്കു അന്ധമായ അനുസരണത്തിന്റെയും ശൂന്യമായ നിഷേധനത്തിന്റെയും ആത്മാവുണ്ടായിരിക്കും. ആ മണ്ണിലാണ് നമ്മുടെ സോഷ്യലിസ്റ്റ് ഫാഷിസ്റ്റുകൾ അവരുടെ കൃഷി നടത്തുന്നത്. മുളച്ചുവരുന്നത് ഗോൾവൽക്കറുടെ കമ്മ്യൂണിസം'.

സി.ജെ.യുടെ ലേഖനങ്ങൾ
സി.ജെ. തോമസ്
സമാഹരണം: കെ.എം. ചുമ്മാർ, ജോസ് കരിമ്പന
കേരളസാഹിത്യ അക്കാദമി
2017, വില : 850 രൂപ

ഷാജി ജേക്കബ്‌    
കേരള സര്‍വകലാശാലയില്‍ ഗവേഷകവിദ്യാര്‍ത്ഥിയായിരുന്ന കാലത്ത് കലാകൗമുദി വാരികയില്‍ തുടര്‍ച്ചയായി ലേഖനങ്ങളും ഫീച്ചറുകളും എഴുതിത്തുടങ്ങി. ആനുകാലികങ്ങളിലും, പുസ്തകങ്ങളിലും, പത്രങ്ങളിലും രാഷ്ട്രീയസാംസ്‌കാരിക വിഷയങ്ങളെ സംബന്ധിച്ച നിരവധി ലേഖനങ്ങളും പഠനങ്ങളും എഴുതിയിട്ടുണ്ട്. അക്കാദമിക നിരൂപണരംഗത്തും മാദ്ധ്യമവിമര്‍ശനരംഗത്തും സജീവമായ വിവിധ വിഷയങ്ങളില്‍ ഷാജി ജേക്കബിന്റെ നൂറുകണക്കിനു രചനകള്‍ പുറത്തുവന്നിട്ടുണ്ട്.

Readers Comments

മലയാളത്തിൽ ടൈപ്പ്‌ ചെയ്യാൻ ഇവിടെ ക്ലിക്ക്‍ ചെയ്യുക
കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

MNM Recommends

TODAYLAST WEEKLAST MONTH
അറസ്റ്റ് ചെയ്യാൻ ആഗ്രഹിക്കുന്നുവെങ്കിൽ ആവശ്യത്തിലേറെ തെളിവ് ലഭിച്ചു കഴിഞ്ഞു; മൊഴികളിലെ വൈരുദ്ധ്യവും ചോദ്യങ്ങൾക്ക് മുമ്പിലെ നിശബ്ദതയും ഓർമ്മയില്ലെന്ന് പറഞ്ഞ് രക്ഷപ്പെടാനുള്ള ശ്രമവും ഒക്കെ കുറ്റത്തിലേക്കുള്ള വിരൽ ചൂണ്ടലെന്ന് തന്നെ വ്യക്തമാക്കി പൊലീസ്; പൊലീസിന്റെ ചോദ്യങ്ങൾക്ക് മുമ്പിൽ കണ്ണീരും കുരിശ് മുറുകെ പിടിത്തവും ഒക്കെ നടത്തി നാടകം തുടർന്ന് ഫ്രാങ്കോ; അന്വേഷണം ഉദ്യോഗസ്ഥൻ അറസ്റ്റ് ചെയ്യാൻ ഒരുക്കമാണെങ്കിലും മടിച്ച് നിൽക്കുന്നത് കോട്ടയം എസ് പി
'എന്റെ ഫോട്ടോ യൂട്യൂബിൽ ഇടരുതേ പ്ലീസ് '; സ്ത്രീകളുടെ നഗ്ന ഫോട്ടോ മോർഫ് ചെയ്ത് ഭീഷണിപ്പെടുത്തിയിരുന്ന എൻജിനീയറിങ് വിദ്യാർത്ഥി പിടിയിൽ; ഫ്രണ്ട് റിക്വസ്റ്റ് അയച്ച ശേഷം വീഡിയോ കോൾ ചെയ്തില്ലെങ്കിൽ ചിത്രം പുറത്ത് വിടുമെന്ന വിദ്യാർത്ഥിയുടെ ഭീഷണിക്ക് മുൻപിൽ വീണത് നിരവധി സ്ത്രീകൾ; പൊലീസിനെ ഞെട്ടിക്കുന്ന വെളിപ്പെടുത്തലുമായി 21കാരൻ
വരത്തൻ വേറെ ലെവലാണ്! കൊലമാസായി ഫഹദ്..ഒന്നാന്തരം ക്യാമറ..ചടുലമായ ആഖ്യാനം വേറിട്ട കഥ; ഒടുവിൽ നന്മ നിറഞ്ഞ നാട്ടിൻപുറങ്ങളിൽനിന്ന് മലയാള സിനിമയും മോചനം നേടുന്നു; ഗ്രാമങ്ങളുടെ വയലൻസും സദാചാര പൊലീസിങും വഷളത്തരങ്ങളുമൊക്കെ റിയലിസ്റ്റിക്കായി ചിത്രീകരിക്കുന്നു; ഇത് നമ്മുടെ മാനസിക വൈകൃതങ്ങൾക്കുനേരെ തുറന്നുവെച്ച കണ്ണാടി; പേര് എഴുതികാണിക്കുമ്പോൾ ഉയരുന്ന കൈയടികൾ സാധൂകരിച്ച് അമൽ നീരദ്
ആളൊഴിഞ്ഞ വഴിയിൽ വീട്ടമ്മയുടെ മാല പൊട്ടിക്കുമ്പോൾ വിരുതന്മാർ സ്വപ്‌നത്തിൽ പോലും കരുതിയില്ല കുടുങ്ങുമെന്ന്; 500 മീറ്റർ മാറിയുള്ള മാതാട്രേഡേഴ്‌സിലെ സിസിടിവിയിൽ പതിഞ്ഞ പൾസർ എൻ.എസ്.ബൈക്കിന്റെ ഒറ്റ ദൃശ്യം തുമ്പാകുമെന്നും അറിഞ്ഞില്ല; പാലാ പൊലീസ് പ്രതികളെ സാഹസികമായി ചെന്നൈയിൽ നിന്ന് പിടികൂടിയത് ഇങ്ങനെ
ഏഴു മണിക്കൂർ ചോദ്യം ചെയ്ത ശേഷം പഞ്ചനക്ഷത്ര ഹോട്ടലിൽ വിശ്രമിക്കാൻ അനുമതി നൽകുന്നത് തുടർച്ചയായി രണ്ടാം ദിവസം; ചോദ്യം ചെയ്യൽ പൂർത്തിയായെന്ന് അറിയിച്ചിട്ടും അറസ്റ്റ് ചെയ്യാതെ വിശ്രമിക്കാൻ അനുവദിച്ചിരിക്കുന്നതും ചരിത്രത്തിൽ ആദ്യം; ദിലീപിന്റെ കാര്യത്തിലെ കീഴ് വഴക്കം ലംഘിക്കപ്പെടുന്നു; മാധ്യമങ്ങളുടെ മുമ്പിൽ പെടാതിരിക്കാൻ സർവ്വ സന്നാഹങ്ങളും ഒരുക്കുന്നതും പൊലീസ് തന്നെ; ഫ്രാങ്കോയുടെ കേസിൽ പൊലീസ് അനുവർത്തിക്കുന്നതെല്ലാം ചട്ടങ്ങളും കീഴ് വഴക്കങ്ങളും മാറ്റിയുള്ള നടപടികൾ
നവവധുവിന്റെ ഒളിച്ചോട്ടം പുറത്തായോതോടെ കിർമാനി മനോജ് വീണ്ടും മുങ്ങി; ഭാര്യയ്ക്ക് മക്കൾ ഒന്നല്ല രണ്ടെന്ന് അറിഞ്ഞതും നാണക്കേടായി; ടി പി ചന്ദ്രശേഖരനെ വെട്ടിനുറുക്കി കൊന്ന് ജയിലിലായതിന്റെ ക്ഷീണം തീർക്കാൻ ഓർക്കാട്ടേരിക്കാരിയെ കെട്ടിയ കിർമാണി മനോജ് ഊരാക്കുടുക്കിൽ; പരോളിൽ മുങ്ങിയ കൊലപാതകിക്കായി വല വീശി വീണ്ടും പൊലീസ്; നിമിഷ വധുവായെത്തിയത് സാന്നിത്തിൽ നിന്നും വിവാഹ മോചനം നേടാതെ; മാഹി പന്തക്കലിലെ കല്ല്യാണ വീട്ടിൽ മ്ലാനത പടർന്നത് ഇങ്ങനെ
തിരുവനന്തപുരത്ത് മോഹൻലാൽ...കൊല്ലത്ത് സുരേഷ് ഗോപി...എറണാകുളത്ത് ശ്രീശാന്ത്; ഡൽഹയിൽ സേവാഗും അക്ഷയ് കുമാറും; മുംബൈ പിടിക്കാൻ സാക്ഷാൽ മാധുരി ദീക്ഷിത്ത്; സണ്ണി ഡിയോളിനേയും മത്സരിപ്പിക്കാൻ ആഗ്രഹം; ലോകസഭയിൽ 350 കടക്കാൻ 70ഓളം പ്രമുഖരെ രംഗത്തിറക്കാൻ പദ്ധതിയുമായി അമിത് ഷാ; മനസ്സ് തുറക്കാത്തത് മോഹൻലാൽ മാത്രം; പരിവാറിലൂടെ സൂപ്പർ സ്റ്റാറും അടുക്കുമെന്ന് പ്രതീക്ഷ; മോദി ഭരണം ഉറപ്പിക്കാൻ ബിജെപി തന്ത്രങ്ങൾ ഇങ്ങനെ
ബഷീർ ബഷിക്കെതിരെ പൊലീസിനെ സമീപിച്ച് രണ്ടാം ഭാര്യ! ആദ്യ ഭാര്യയ്‌ക്കൊപ്പം തന്നെ ലിവിങ് ടുഗെദർ ബന്ധത്തിലേർപ്പെട്ട തന്നെ വഞ്ചിച്ചെന്ന് ആരോപിച്ച് ബഷിക്കെതിരെ മോഡലായ യുവതി രംഗത്ത്; ബിഗ് ബോസിൽ നിന്നും പുറത്തായ ബഷീർ ബഷി അഴിയെണ്ണേണ്ടി വരുമോ? ബിഗ് ബോസിലെ സെലബ്രിറ്റി പരിവേഷം ഫ്രീക്കൻ ബഷിക്ക് രക്ഷയാകുമോ?
അവൻ നമ്മുടെയാളല്ല തട്ടിയേക്കൂ എന്നു ഫോണിൽ പറയുന്ന മെത്രാൻ! കൂട്ടിക്കൊടുപ്പുകാരിയുടെ തലത്തിലേക്ക് അധ:പതിച്ച മദർ സുപ്പീരിയർ; സ്വത്ത് വരെ സഭയ്ക്ക് നൽകി നിത്യവ്രതം അനുഷ്ഠിക്കുന്നതിനാൽ പുറത്താക്കാൻ ആർക്കും കഴിയില്ല; പ്രശ്‌നത്തിനെല്ലാം കാരണം അമ്മയെ പിതാവിനൊപ്പം കിടക്കാൻ സമ്മതിക്കാത്തതും; ഫ്രാങ്കോയുടെ ക്രൂരതകൾ സിസ്റ്റർ അനുപമ ഓർത്തെടുക്കുമ്പോൾ
സമ്മതമില്ലാതെ ചുംബിക്കാൻ ശ്രമിച്ചു, വീട്ടിനടുത്തുള്ള സ്‌കൂൾ വിദ്യർത്ഥികളായ ആൺകുട്ടികളെ കാലങ്ങളെടുത്ത് വരുതിയിലാക്കി ലൈംഗികമായി ഉപയോഗിച്ചു'; നടൻ ഹരിനാരായണന്റെ മരണത്തിനിടയക്കിയത് ചില ഫെമിനിസ്റ്റുകളുടെ ഈ ഗുരുതര ആരോപണങ്ങളോ? അപവാദത്തിൽ മനസ്സുനീറി വിഷാദരോഗിയായി മാറിയ നടൻ അമിതമായ ഗുളിക കഴിച്ച് മരണം സ്വയം വരിച്ചുവോ? ജോൺ എബ്രഹാമിന്റെ പ്രിയപ്പെട്ട നടന്റെ മരണം ഒരുകൂട്ടം ഫെമിനിസ്റ്റുകൾ നടത്തിയ 'കൊല'യെന്ന് സുഹൃത്തുക്കൾ
രതി വൈകൃതം സുഗമമാക്കാൻ ഓരോ വിദ്യാർത്ഥിക്കും പ്രത്യേകം മുറികളൊരുക്കി; അച്ചൻ പട്ടം പോകാതിരിക്കാൻ പഞ്ചനക്ഷത്ര ഹോട്ടലിൽ എത്തിച്ച് വസ്ത്രങ്ങൾ വലിച്ചു കീറി പൂർണ്ണ നഗ്നനാക്കി ഇരയുടെ വിഡിയോ ഷൂട്ട് ചെയ്തു; കുളിമുറിയിൽ ഒളിച്ചിരുന്ന് ജനനേന്ദ്രിയത്തിൽ മർദ്ദനവും; പീഡനക്കേസിൽ 14 ദിവസത്തിനകം ജാമ്യം നേടിയിട്ടും ലൈംഗിക ഭീകരത പുറത്തെത്തിച്ച ഇരയേയും അച്ഛനേയും കഞ്ചാവ് കേസിൽ കുടുക്കാൻ കരുക്കൾ നീക്കി വീണ്ടും അഴിക്കുള്ളിലാക്കി; ഇരിട്ടിയിലെ മുൻ വൈദികൻ ജെയിംസ് തെക്കേമുറി ചില്ലറക്കാരനല്ല
ഷാജൻ സ്‌കറിയ മറുനാടൻ മലയാളി ചീഫ് എഡിറ്റർ മാനേജിങ് എഡിറ്റർ പദവികൾ രാജി വച്ചു; ചെയർമാന്റെ ചുമതല തുടരും; പകരം ചീഫ് എഡിറ്ററായി എക്സിക്യൂട്ടീവ് എഡിറ്റർ എം റിജുവും മാനേജിങ് ഡയറക്ടറായി സിഇഒ ആൻ മേരി ജോർജും നാളെ ചുമതലയേൽക്കും; തലശ്ശേരിക്കാരിയായ ആൻ ചുമതലയേൽക്കുന്നത് മലയാളത്തിലെ ആദ്യ മാധ്യമ മേധാവിയായ വനിത എന്ന റെക്കോർഡോടെ
ഇറ്റാലിയൻ പാർലമെന്റ് അംഗങ്ങളായ കാതറിനും ലൂസിയയും ഓടി നടന്നിട്ടും ഫലം കണ്ടില്ല; ഫ്രാങ്കോയിൽ പരിശുദ്ധാത്മാവല്ല, ചെകുത്താനാണ് വാഴുന്നതെന്ന വൈദികരുടെ നിലപാട് നിർണ്ണായകമായി; മുംബൈ രൂപതയുടെ ഇടപെടൽ ഫലം കണ്ടു; ഒടുവിൽ ജലന്ധറിലെ പീഡനം മാർപ്പാപ്പയും അറിഞ്ഞു; അടിയന്തര റിപ്പോർട്ട് തേടി വത്തിക്കാൻ ഇടപെടൽ; ഫ്രാങ്കോ മുളയ്ക്കലിന് മെത്രാൻ സ്ഥാനം ഒഴിയേണ്ടി വരും; കന്യാസ്ത്രീകളുടെ പ്രതിഷേധക്കരുത്ത് തിരിച്ചറിഞ്ഞ് ആഗോള സഭാ നേതൃത്വം; ഫ്രാങ്കോയെ എല്ലാവരും കൈവിടുന്നുവോ?
ബംഗളുരു നഗരത്തിൽ നാലേക്കർ സ്ഥലത്ത് പൂന്തോട്ടത്തിന് നടുവിൽ ബംഗ്ലാവ്; പല അന്താരാഷ്ട്ര വിമാനത്താവളങ്ങളുടേയും സമീപം ഭൂമി; കൊട്ടാര സദൃശ്യമായ അരമനയും സമ്പൂർണ്ണമായി എസി ചെയ്ത സെമിനാരിയും; ഡൽഹിയിൽ സ്വകാര്യ ബസ് സർവ്വീസും പഞ്ചാബിൽ സാമ്പത്തിക ഇടപാടുകളും; മഠം സ്ഥാപിച്ചത് ലൈംഗിക ആവശ്യത്തിനും സാമ്പത്തിക ഇടപാടുകൾക്കുമായി; ബെങ്കയിലെ സെമിനാരിയുടെ ചുമതല സാമ്പത്തിക ക്രമക്കേടിന് പുറത്തായ വൈദികന്; ഫ്രാങ്കോയുടെ രഹസ്യ ജീവിതത്തിന്റെ ഞെട്ടിക്കുന്ന കഥകൾ
ഇപ്പോൾ കേന്ദ്രം അനുവദിച്ചത് എത്രയാണെന്ന് അറിയാമോ? കേരളം അനുവദിച്ചത് എത്രയാണെന്ന് അറിയാമോ? ഇതേക്കുറിച്ച് അംഗത്തിന് എന്തെങ്കിലും ധാരണയുണ്ടോ? ജീവൻ നഷ്ടമായവർക്കുള്ള നഷ്ടപരിഹാരം ഉയർത്തണമെന്നും വായ്‌പ്പകൾ എഴുതി തള്ളണമെന്നും ആവശ്യപ്പെട്ട എൽദോ എബ്രഹാം എൽഎൽയോട് ക്ഷുഭിതനായി മുഖ്യമന്ത്രിയുടെ ചോദ്യം; പിണറായിയുടെ ഇടപെടലിൽ സഭ പകച്ചുപോയ നിമിഷം..!
വെറുതെ കിടന്ന് വഴക്കുണ്ടാക്കാതെ.....ഓകെ താങ്ക് യു! ക്ഷമ ചോദിക്കുമോ എന്ന് ആവർത്തിച്ച് ചോദിച്ച് അവതാരിക; ചിരിച്ച് തള്ളി പിസി; കന്യാസ്ത്രീ കന്യകയല്ലെന്ന വാദത്തിൽ പൊട്ടിത്തെറിച്ച് ചോദ്യശരങ്ങൾ; തപ്പിയും തടഞ്ഞും ഇംഗ്ലീഷ് പറഞ്ഞ് പടിച്ച് നിൽക്കാൻ ശ്രമിച്ചെങ്കിലും പതറി വീണ് പൂഞ്ഞാർ എംഎൽഎ; ഷാനി പ്രഭാകരനേയും വേണു ബാലകൃഷ്ണനേയും തെറി പറഞ്ഞ് പേടിപ്പിച്ച് ശീലിച്ച പിസി ജോർജ് റിപ്പബ്ലിക് ചാനൽ അവതാരികയുടെ ചോദ്യത്തിന് മുമ്പിൽ പെട്ട് പോയത് ഇങ്ങനെ
ദിവസം രണ്ടരക്കിലോ ചിക്കനും അൻപത് മുട്ടയുടെ വെള്ളയും ഇനി എവിടെ നിന്നു കിട്ടും? പീഡന കേസിൽ അകത്തായ മുരളീകുമാറിന്റെ ഭക്ഷണചര്യകൾ കേട്ടു ഞെട്ടി പൊലീസും; ഓർമ്മ വെച്ചപ്പോൾ മുതൽ തുടർന്ന ഭക്ഷണവും എക്‌സർസൈസും ഇരുമ്പഴിക്കുള്ളിൽ മുടങ്ങുമ്പോൾ നഷ്ടമാകുന്നത് വർഷങ്ങളായി കാത്തു സൂക്ഷിച്ച ശരീരസൗന്ദര്യം: മിസ്റ്റർ ഏഷ്യയുടെ ആരാധകർക്കും സങ്കടം ഉള്ളിൽ ഒതുക്കാൻ വയ്യ
ശശി നടന്ന വഴിയിൽ കമ്മ്യൂണിസ്റ്റ് പച്ചപോലും മുളയ്ക്കില്ല! ഞാൻ ഗുണ്ടയെന്ന് പരസ്യമായി പറയുന്ന നേതാവ്; വിമർശിക്കുന്നവരെ പച്ചത്തെറി വിളിക്കാൻ ഒരു മടിയുമില്ല; ഷൊർണ്ണൂരിലെ മണൽ മാഫിയയുടെ തലതൊട്ടപ്പൻ; പാർട്ടി സമ്മേളനത്തിനെത്തിയ പിണറായിയെ ഊണു കഴിക്കാൻ വീട്ടിൽ കൊണ്ട് പോകാൻ നടത്തിയ ശ്രമം പൊളിച്ചത് പിണറായിയുടെ മുൻകോപം തന്നെ; പാർട്ടി വനിതാ നേതാവിന്റെ പരാതിയിൽ കുടുങ്ങിയ ഷൊർണ്ണൂർ എംഎൽഎ പികെ ശശി അത്ര ചെറുമീനല്ല
ആറുമാസം മുമ്പ് ഫെയ്‌സ് ബുക്കിലൂടെ ബോഡി ബിൽഡർ പരിചയം തുടങ്ങി; വീട്ടുകാരുമായും അടുത്ത് യുവതിയിൽ വിശ്വാസം നേടിയെടുത്തു; പിന്നെ ഭക്ഷണത്തിന് വിളിച്ച് കോട്ടയത്തെ ഹോട്ടൽ ഐഡയിൽ മുറിയെടുത്ത് ബലാത്സംഗം; നിലയ്ക്കാത്ത രക്തസ്രാവമുണ്ടായപ്പോൾ ആശുപത്രിയിൽ കൊണ്ടു വന്നതും മിസ്റ്റർ ഏഷ്യ പട്ടത്തിനുടമ; അവിവാഹിതയെ വിവാഹിതനായ നാവിക സേന പെറ്റി ഓഫീസർ പീഡിപ്പിച്ചത് അതിക്രൂരമായി; മുരളി കുമാർ അറസ്റ്റിൽ
പന്ത്രണ്ടായിരം ലക്ഷം കോടി ആസ്തിയുള്ള രാജ്യമാണ് ഇന്ത്യ; വിദേശ സഹായം സ്വീകരിക്കുന്നത് അപമാനം; നവകേരള നിർമ്മിതിക്ക് പൂർണ അധികാരമുള്ള സമിതി രൂപീകരിക്കണം; എങ്കിൽ എട്ട് വർഷംകൊണ്ട് പുതിയകേരളം പടുത്തുയർത്താൻ കഴിയും; ഡാം മാനേജ്‌മെന്റിലും കേരളത്തിന് വലിയ പാളിച്ച പറ്റി; ആദ്യഘട്ടിൽ കനത്ത മഴ പെയ്തപ്പോൾ ഡാമിലെ വെള്ളം തുറന്നുവിടാമായിരുന്നു; മനസു തുറന്ന് ഇ ശ്രീധരൻ; പുനർനിർമ്മാണം മെട്രോമാനെ ഏൽപ്പിക്കുമോ എന്ന ചലഞ്ചുമായി സോഷ്യൽ മീഡിയ
അമൃതയിലെ എംബിബിഎസ് പഠനകാലത്ത് മൊട്ടിട്ട പ്രണയം; പഠനം പൂർത്തിയാക്കി ലേക് ഷോറിൽ പ്രാക്ടീസ് ചെയ്ത ശ്രീജ അമേരിക്കയ്ക്ക് പറന്നപ്പോഴും രോഹിത്തുമായുള്ള ആത്മബന്ധം തുടർന്നു; വിവാഹത്തിലൂടെ ഒരുമിക്കാനുള്ള രോഹിത്തിന്റെയും ശ്രീജയുടെയും ആഗ്രഹത്തിന് സന്തോഷത്തോടെ സമ്മതം മൂളി ചെന്നിത്തലയും വ്യവസായി ഭാസിയും; ചിങ്ങ മാസത്തിലെ ഉത്രം നാളിൽ വിവാഹ നിശ്ചയം നടന്നപ്പോൾ പൂവണിയുന്നത് വർഷങ്ങളുടെ പ്രണയം