• ഹോം
• കൂടുതൽ
• വിട

ആഗ്ര:ഇന്ത്യൻ ആർമിയുടെ ഭാഗമാകാൻ കഴിയാതെ വന്ന യുവാവ് ആത്ഹത്യ ചെയ്തു. സൈന്യത്തിൽ ചേരാൻ കഴിയാത്തതിന്റെ മനോവിഷമത്തിൽ യുവാവ് ഫേസ്‌ബുക്കിൽ ലൈവ് സ്ട്രീം ചെയ്തുകൊണ്ടാണ് ആഗ്ര സ്വദേശിയായ 24കാരൻ ആത്മഹത്യ ചെയ്തത്. 1:09 മിനുട്ട് ദൈർഘ്യമുള്ള ലൈവ് വീഡിയോ 2750 പേർ തൽസമയം കണ്ടെങ്കിലും ആരും പൊലീസിനെയോ ഇയാളുടെ കുടുംബത്തേയോ വിവരമറിയിച്ചില്ല.

ആഗ്രയിലെ ശാന്തി നഗറിലുള്ള മുന്ന കുമാർ ആണ് ആത്മഹത്യ ചെയ്തത്. ബി.എസ്.സി ബിരുദധാരിയാണ് മുന്ന. ബുധനാഴ്‌ച്ച അതിരാവിലെയാണ് ഇയാൾ ഫേസ്‌ബുക്കിൽ ലൈവ് ചെയ്തുകൊണ്ട് കഴുത്തിൽ കുരുക്കിട്ട് ആത്മഹത്യ ചെയ്തത്. ആറ് പേജുള്ള ആത്മഹത്യാ കുറിപ്പും ഇയാളുടേതായി കണ്ടെടുത്തിട്ടുണ്ട്. ഇതിൽ തന്റെ മരണത്തിൽ താൻ തന്നെയാണ് ഉത്തരവാദിയെന്നും അഞ്ച് തവണ ശ്രമിച്ചിട്ടും സൈന്യത്തിൽ ചേരാൻ സാധിക്കാത്തതിനാലാണ് താൻ ആത്മഹത്യ ചെയ്യുന്നതെന്നും മുന്ന കുറിച്ചിട്ടുണ്ട്.

മുന്ന ഭഗത് സിങിന്റെ കടുത്ത ആരാധകനായിരുന്നെന്നും സൈന്യത്തിൽ ചേരാൻ തീവ്രമായി ആഗ്രഹിച്ചിരുന്നെന്നും മുന്നയുടെ സഹോദരൻ വികാസ് കുമാർ ടൈംസ് ഓഫ് ഇന്ത്യയോട് പറഞ്ഞു.മരിക്കുന്നതിന് മണിക്കൂറുകൾക്ക് മുൻപേ താനും മുന്നയും ഒന്നിച്ച് ഭക്ഷണം കഴിച്ചിരുന്നെന്നും അപ്പോൾ മുന്ന സാധാരണ നിലയിലായിരുന്നെന്നും വികാസ് വ്യക്തമാക്കി.