1 usd = 71.42 inr 1 gbp = 86.67 inr 1 eur = 79.24 inr 1 aed = 19.44 inr 1 sar = 19.04 inr 1 kwd = 234.85 inr

Aug / 2019
22
Thursday

കാമനകളുടെ സുവിശേഷം

October 27, 2018 | 05:39 PM IST | Permalink



കാമനകളുടെ സുവിശേഷം

ഷാജി ജേക്കബ്‌

'അന്നാ കരേനിന'യിൽ, തന്നെയും മകനെയും കുടുംബത്തെയും ഉപേക്ഷിച്ച് മറ്റൊരാളുടെ കൂടെ ജീവിക്കാൻ ഇറങ്ങിപ്പോയ അന്നയെക്കുറിച്ചോർത്തു ഖിന്നനാകുന്ന കരേനിനോട് അയാളുടെ കസിൻ, കിറ്റി ഒരിക്കൽ പറയുന്നുണ്ട്, 'കർത്താവിനെപ്രതി, നമ്മെ വെറുക്കുന്നവരെപ്പോലും നാം സ്‌നേഹിക്കണം, അതാണ് ക്രൈസ്തവധർമം' എന്ന്. കരേനിൻ അവളോടു പറഞ്ഞ മറുപടി ഇതായിരുന്നു: 'എന്നെ വെറുക്കുന്നവരെ സ്‌നേഹിക്കാൻ എനിക്കു കഴിയും കിറ്റി. പക്ഷെ, ഞാൻ വെറുക്കുന്നവരെ ഞാൻ എങ്ങനെ സ്‌നേഹിക്കും?'

ടോൾസ്റ്റോയിപോലും അന്നക്കൊപ്പമായിരുന്നില്ല എന്നത് വിഖ്യാതമാണല്ലോ. അവൾ ചെയ്തപാപത്തിന് അദ്ദേഹം ശമ്പളം മരണമായിത്തന്നെ നൽകി. ഹെമിങ്‌വേയുടെ കഥാപാത്രങ്ങളെക്കുറിച്ച് ഒരു നിരൂപക(ൻ) പറഞ്ഞതുപോലെ, 'ശരീരത്തിലും ആത്മാവിലും മുറിവേറ്റ മനുഷ്യരുടെ' ഒരു മഹാപരമ്പരയ്ക്കാണ് പിന്നീടിങ്ങോട്ട് ലോകനോവൽസാഹിത്യം പിറവിനൽകിയത്. മർത്യജീവിതത്തെക്കുറിച്ചുള്ള മഹാതത്വവാക്യങ്ങളായി മാറി, ഓരോ ക്ലാസിക് നോവലും. സ്‌നേഹരാഹിത്യത്തിന്റെയും അതു സൃഷ്ടിക്കുന്ന ജീവിതവിരക്തിയുടെയും കയ്പുനീർ കുടിക്കുമ്പോൾതന്നെ സ്‌നേഹത്തിനും ജീവിതത്തിനും വേണ്ടിയനുഭവിക്കുന്ന ദാഹാർത്തിയാണ് മനുഷ്യരുടെ വിധി എന്നു തെളിയിക്കുന്ന നോവലുകളുടെ പരമ്പരയിൽ മലയാളഭാവന സൃഷ്ടിച്ച വിസ്മയമാണ് കെ. ആർ. മീരയുടെ 'സൂര്യനെ അണിഞ്ഞ ഒരു സ്ത്രീ'. കാപട്യങ്ങൾ മുഖപടമായണിയുന്ന മനുഷ്യരെ, അവരുടെതന്നെ കാമനകൾ കുരുതികൊടുക്കുന്ന അവസ്ഥകളെക്കുറിച്ചെഴുതപ്പെട്ട ദുരന്തഗാഥ.

ദൈവത്തിനും സമൂഹത്തിനും മുന്നിൽ, അഥവാ, സ്വന്തം മനഃസാക്ഷിക്കും നീതിപീഠത്തിനും മുന്നിൽ, കാലാകാലങ്ങളായി നിലനിൽക്കുന്ന പുരുഷലോകാധിപത്യത്താൽ വിചാരണ ചെയ്യപ്പെടുന്ന ഒരു പെണ്ണിന്റെ കഥയാണിത്. മൂവായിരം വർഷം മുൻപ്, സ്വന്തം ജനതയുടെ ആൾക്കൂട്ടവിചാരണയ്ക്കും ന്യായവിധിക്കും ഇരയാകേണ്ടിവന്ന ജെസബെൽ എന്ന സ്ത്രീയിൽനിന്ന് ഇരുപത്തൊന്നാം നൂറ്റാണ്ടിൽ അതേതരത്തിലുള്ള വിചാരണയ്ക്കും വിധിക്കും വഴങ്ങേണ്ടിവരുന്ന മറ്റൊരു സ്ത്രീയിലേക്കുള്ള ചരിത്രത്തിന്റെ യാത്രാവിവരണം. കാമനകളുടെ വേദപുസ്തകംപോലെ എഴുതിയും വായിച്ചും തീരേണ്ട സ്ത്രീത്വത്തിന്റെ ജീവചരിത്രം.

ജെസബെൽ എന്ന ഡോക്ടർ. അവളെ ജീവനുതുല്യം സ്‌നേഹിക്കുന്ന സഹോദരനും ചാച്ചനും വല്യമ്മച്ചിയും. അവളെ കുറ്റം പറഞ്ഞും പഴിചാരിയും നോവിക്കുകമാത്രം ചെയ്യുന്ന അമ്മച്ചി. അന്യനഗരത്തിൽ ഡോക്ടറായി ജോലിചെയ്യുന്ന ജറോമിന്റെ വിവാഹാലോചന വരുമ്പോൾ മുൻപിൻ ചിന്തയില്ലാതെ അതുറപ്പിക്കുന്നിടത്താണ് നോവലിന്റെയും അവളുടെ ദുരനുഭവങ്ങളുടെയും തുടക്കം. ജറോമിന്റെ അപ്പൻ ജോർജും അമ്മ ലില്ലിയും സഹോദരൻ ജോണും അമ്മാവൻ അബ്രഹാം ചമ്മനാടും പിന്നീട് ജെസിന്റെ ജീവിതം നിർണയിച്ചു. ആദ്യരാത്രിയിൽതന്നെ ജറോമിന്റെ ഭീതിദമായ ലൈംഗികവൈകൃതം അവളെ തകർത്തു. രണ്ടുവർഷം ഒന്നിച്ചുജീവിച്ചിട്ടും അവൾ കന്യകയായിത്തന്നെ തുടർന്നു. അയാളാകട്ടെ, തന്റെ ഇണ, ഡോ. അവിനാശുമൊത്ത് നിർബാധം സ്വലിംഗരതിബന്ധം പുലർത്തിപ്പോന്നു. ജോർജ്, ജെസിന്റെ ജീവിതം നരകതുല്യമാക്കി. അവൾ സന്ദീപ്‌മോഹൻ എന്ന ഡോക്ടറുമായി ഉറ്റ സൗഹൃദത്തിലായി. അത് അവിഹിതബന്ധമാണെന്നാരോപിച്ച് ജോർജ് അവളെ അപമാനിച്ചു. സന്ദീപിന് തന്റെ കൗമാരത്തിൽ അനിത എന്ന മുതിർന്ന സ്ത്രീയുലുണ്ടായ മകൾ ആന്മേരിയെ അനിതയുടെ മരണശേഷം രക്ഷിച്ച് വീട്ടിലെത്തിച്ചു, ജെസ്. ഒരിക്കൽ ജറോം ആ കുട്ടിയെ ലൈംഗികമായി ആക്രമിച്ചതോടെ അവൾ അയാളുമായി വഴിപിരിഞ്ഞു.

കാറപകടത്തിൽപെട്ട് കോമയിലായ ജറോമിനെ ശുശ്രൂഷിക്കാൻ ജെസ് തയ്യാറായെങ്കിലും ജോർജിന്റെ പുലഭ്യങ്ങളും കുറ്റപ്പെടുത്തലുകളും കയ്യേറ്റങ്ങളും മടുത്ത് അവൾ തന്റെ വീട്ടിലേക്കു പോന്നു. ജോർജ് അവളെ നിരന്തരം വേട്ടയാടി.

വിവാഹമോചനത്തിനു കേസ്‌കൊടുത്ത ജെസിന്റെ തുടർന്നുള്ള ജീവിതം ഉറ്റവർക്കും ഒറ്റുകാർക്കുമിടയിൽ ഒരു പീഡാനുഭവയാത്രയായി മുന്നേറുന്നു. പഠിത്തത്തിന്റെയും ജോലിയുടെയും സംഘർഷം ഒരുവശത്ത്. ചതിക്കപ്പെട്ടതിന്റെയും ഒറ്റുകൊടുക്കപ്പെട്ടതിന്റെയും സങ്കടം മറുവശത്ത്. കോളേജ്കാലത്തെ മൂകപ്രണയത്തിലെ നായകൻ രഞ്ജിത്തിന്റെ മരണം, ഉറ്റസുഹൃത്ത് സെബിന്റെ തകർച്ച, സന്ദീപ്‌മോഹന്റെ അകൽച്ച, വിശ്വസിച്ചുപ്രണയിച്ച നന്ദഗോപന്റെ ചതി, സുഹൃത്തായടുത്തുകൂടിയ ഹരിതയെന്ന ഡോക്ടറുടെ വഞ്ചന, അജ്ഞാതനായിവന്ന് ഹൃദയം കീഴടക്കിയ ന്യൂറോസർജൻ കബീർമുഹമ്മദിന്റെ തിരസ്‌കാരം, അദ്വൈതായി മാറിയ ട്രീസയുമായുണ്ടാകുന്ന ആത്മബന്ധം-ജീവിതം ആസക്തികൾക്കും വിരക്തികൾക്കും, സ്വീകാരങ്ങൾക്കും തിരസ്‌കാരങ്ങൾക്കുമിടയിൽ നടക്കുന്ന ഒരാന്ദോളനം മാത്രമാണെന്ന് ജെസ് തിരിച്ചറിയുന്നു. വൈയക്തികതയുടെയും സൗഹൃദങ്ങളുടെയും ഈ ബ്ലാക്ക് ആൻഡ് വൈറ്റ് ലോകത്തിന്റെ മറ്റൊരു പതിപ്പായിരുന്നു, കുടുംബബന്ധങ്ങൾ അവൾക്കു നൽകിയ കുരിശുകൾ. സ്വന്തം വീട്ടിൽ വല്യമ്മച്ചി മാത്രം അവൾക്കു താങ്ങും തണലുമായി.

ജോർജിന്റെ കിരാതമായ നരനായാട്ടുകൾ അവളെ നാലുപാടുനിന്നും വിഷപ്പാമ്പുകൾപോലെ വളഞ്ഞുകൊത്തി. ആന്മേരിയെ സന്ദീപ്‌മോഹനെ ഏല്പിച്ചുവെങ്കിലും തുടർന്നുണ്ടാകുന്ന നിരവധിയായ ദുരനുഭവങ്ങൾ പെണ്ണിന്റെ ജീവിതത്തെക്കുറിച്ചുള്ള പുതിയ പാഠങ്ങൾ അവളെ പഠിപ്പിച്ചു. കാലുവെന്ത ജന്തുവിനെപ്പോലെ അവൾ തനിക്കും മറ്റുള്ളവർക്കുമിടയിൽ പരക്കം പാഞ്ഞു. ഡോ. കുര്യനും പത്രപ്രവർത്തകൻ ബാലഗോപാലും കൂട്ടുകാരികളായ അഹാനയും റാണിയും ഇർഷാദും ഗീതുവും അവളെ അതിജീവിക്കാൻ സഹായിച്ചു. ജെസിന്റെതന്നെ അപരമനഃസാക്ഷിയായി അമ്മച്ചി അവളെ കെട്ടസദാചാരച്ചങ്ങലകൾകൊണ്ടു കെട്ടിമുറുക്കി. വല്യമ്മച്ചി അവളുടെ സ്വാതന്ത്ര്യദാഹങ്ങൾക്കും ജീവിതമോഹങ്ങൾക്കും ചിറകുകൾ നൽകി സ്വപ്നങ്ങളുടെ ആകാശത്തേക്കു പറത്തിവിട്ടു. ചാച്ചൻ അവളുടെ ദുരിതജീവിതത്തിനു നിശ്ശബ്ദനും നിസ്സഹായനുമായി സാക്ഷ്യം നിന്നു. കോടതി, സമൂഹത്തിന്റെയും മതത്തിന്റെയും പുരുഷാധീശ പൊതുബോധത്തിന്റെയും അയുക്തികൾ ഒന്നിച്ചുനിർമ്മിച്ച ഫ്രാങ്കൻസ്റ്റീനായി അവൾക്കുമേൽ രക്തദാഹത്തോടെ വിധി പറഞ്ഞു.

ഭാര്യയെ വിഷംകൊടുത്തുകൊന്ന ജോർജ്ജിന് മകന്റെ ജഡജീവിതത്തിനു കാവലിരുന്നു ഭ്രാന്തുപിടിച്ചു. അയാൾ കോടതിയിൽ ജെസിനെതിരെ നുണകളുടെ പെരുമഴ പെയ്യിച്ച ദിവസം പക്ഷെ, തന്നെ പ്രതി കള്ളസാക്ഷി പറഞ്ഞതിന് ദൈവം അയാളെ കാലുവാരി നിലത്തടിച്ചുവീഴ്‌ത്തി. നട്ടെല്ലുതകർന്ന് മറ്റൊരു മാംസപിണ്ഡം മാത്രമായി അയാൾ മകന്റെ പിണജീവിതത്തിനു കൂട്ടുകിടന്നുതുടങ്ങി. ചലനശേഷിയുള്ള കൈകൊണ്ട് ജോർജ് ജെസിനെ ശപിക്കുകയും നാവുകൊണ്ട് തെറിയഭിഷേകം നടത്തുകയും ചെയ്തു. അയാളുടെ അവസാനത്തെ ജീവകോശത്തിലും സാത്താൻ വിത്തുവിതച്ചിരുന്നു. ജറോമിനെ പരിചരിക്കാൻവന്ന അവിനാശും ജെസും തമ്മിൽ വാക്കേറ്റമുണ്ടായി. സ്വലിംഗരതിയിൽ മാത്രം താല്പര്യമുണ്ടായിരുന്ന ജറോമിനെ അയാളുടെ ഇണയായിരുന്ന അവിനാശിൽനിന്നും വേർപെടുത്താനായിരുന്നു. ജെസിന്റെ തലയിൽ കെട്ടിവച്ചത്. 'ദൈവം കൂട്ടിച്ചേർത്തതിനെ വേർപെടുത്താൻ മനുഷ്യർക്കാവില്ല' എന്ന കള്ളപ്രമാണമുദ്ധരിച്ച് പള്ളിയും വിശ്വാസികളും നരകമാക്കിക്കൊണ്ടേയിരിക്കുന്ന ക്രൈസ്തവകുടുംബങ്ങളുടെ ശവതുല്യമായ അന്തർലോകങ്ങളുടെ അപനിർമ്മിതികൂടിയാണ് 'സൂര്യനെ അണിഞ്ഞ ഒരു സ്ത്രീ'.

ജറോം ആദ്യം വിവാഹമാലോചിച്ച ട്രീസ, തന്റെ ട്രാൻസ്ജൻഡർസ്വത്വം മുൻനിർത്തി അയാളെ ഒഴിവാക്കിയിരുന്നു. അവൾ പിന്നീട് ലിംഗമാറ്റ ശസ്ത്രക്രിയ നടത്തി പുരുഷനായി, അദ്വൈത് എന്ന പേരു സ്വീകരിച്ചു. കാലത്തിന്റെ കാവ്യനീതിയും ചരിത്രത്തിന്റെ ചാക്രികതയും ഒന്നിച്ചുപ്രവർത്തിച്ചപ്പോൾ ജെസ്, അദ്വൈതുമായി ആത്മബന്ധം സ്ഥാപിക്കുന്നു.

കോടതി ജെസിന്റെ വിവാഹമോചനഹർജി അനുവദിച്ചില്ല. ദൈവനീതിക്കും ദാക്ഷിണ്യമേതുമുണ്ടായിരുന്നില്ല. ജറോം മരിച്ചു. ജോർജ്ജ് പുഴുത്തു. തന്റെ കാമവും കന്യകാത്വവും നിരാകരിച്ച കബീർ മുന്നോട്ടുവച്ച വിവാഹാഭ്യർഥന തള്ളി ജെസ് അമേരിക്കയിൽ ഉപരിപഠനത്തിനു പോകുന്നു.

പെണ്മയുടെ (ഏകാത്മക) ലിംഗരാഷ്ട്രീയം ചർച്ചചെയ്യുന്ന നോവലല്ല 'സൂര്യനെ അണിഞ്ഞ ഒരു സ്ത്രീ'. പൊതുവിൽ മനുഷ്യരുടെയും വിശേഷിച്ച് ആണിന്റെയും പെണ്ണിന്റെയും ഇതരലിംഗങ്ങളുടെയും ജൈവരാഷ്ട്രീയം മതം മുതൽ വൈദ്യശാസ്ത്രം വരെയും നിയമം മുതൽ സാമൂഹ്യപൊതുബോധംവരെയുമുള്ള സ്ഥാപനങ്ങളിൽ സൃഷ്ടിക്കുന്ന പ്രകമ്പനങ്ങളുടെ സമകാലാവിഷ്‌ക്കാരമാകുന്നു ഈ നോവൽ. അഴിട്ടുവിട്ടാലും വീട്ടിൽ നിന്നോടിപ്പോകാത്ത പട്ടിയെപ്പോലെ ദാമ്പത്യത്തിൽ അലഞ്ഞുതിരിയുന്ന സ്ത്രീകളുടെ ദുർഗതി മാത്രമല്ല ഇതിലെ പ്രമേയം. ഉടലും ഉണ്മയും തമ്മിലുള്ള കടലകലം ഒരുതരത്തിലും താണ്ടാനാവാതെ തന്റെ ഇണയോട് മരിക്കുംവരെ അനീതിമാത്രം ചെയ്യുന്ന മനുഷ്യവിധിയുടെ അനാവരണവും ഇതിലുണ്ട്.

'സൂര്യനെ അണിഞ്ഞ ഒരു സ്ത്രീ' വായിക്കൂ, സ്ത്രീയിലേക്കുള്ള വഴി യോനിയിലൂടെയല്ല, തലച്ചോറിലൂടെയും ഹൃദയത്തിലൂടെയുമാണെന്ന് തിരിച്ചറിയാത്ത ഓരോ പുരുഷന്റെയും തല ആത്മനിന്ദയും കുറ്റബോധവും കൊണ്ട് കുനിയും. നട്ടെല്ലു വിറയ്ക്കും. അത്രമേൽ സൂക്ഷ്മസുന്ദരമായും രാഷ്ട്രീയജാഗ്രത്തായും ആണധികാരത്തിന്റെയും അതു തേർവാഴ്ച നടത്തുന്ന നരകജീവിതത്തിന്റെയും ആഴങ്ങളിൽനിന്ന് നമ്മുടെ മൂഢസ്വർഗങ്ങളിൽ തീകോരിവിതറുന്നുണ്ട്.

വിവാഹം, ദാമ്പത്യം, ലൈംഗികത, കുടുംബം... എന്നിങ്ങനെയുള്ള ഓരോ സ്ഥാപനത്തിന്റെയും അകംചീഞ്ഞ കാലത്തിന്റെ ഖേദപുസ്തകമാകുന്നു ഈ നോവൽ.

അഞ്ചു ജീവിത, സംസ്‌കാരലോകങ്ങളെ രക്തത്തിലും മാംസത്തിലും ഉരുക്കിച്ചേർത്ത് ശരീരത്തിന്റെയും ആത്മാവിന്റെയും ഛായയിൽ ഒരു പഞ്ചലോഹവിഗ്രഹം നിർമ്മിക്കുന്നതുപോലെയാണ് ഈ നോവലിന്റെ ആഖ്യാനഘടന.

ബൈബിളിന്റെ മൂല്യമണ്ഡലമാണ് ഒന്ന്. വൈദ്യശാസ്ത്രത്തിന്റെ ജ്ഞാനമണ്ഡലം മറ്റൊന്ന്. കോടതിയുടെ വ്യവഹാരലോകം ഇനിയൊന്ന്. സ്വലിംഗരതിയുടെ കാമനാലോകം നാലാമത്തേത്. ജനപ്രിയനോവലിന്റെ ഭാവമണ്ഡലം അഞ്ചാമത്തേത്.

പാഗനിസത്തിന്റെ പാപചരിത്രങ്ങൾ കൂടിയാണ് ബൈബിൾ പഴയനിയമം. ഇസ്രയേലിന്റെ ഏകദൈവമായ യഹോവക്കെതിരെ ഗ്രീക്കോ-റോമൻ ജനപദങ്ങളിൽ നടന്ന അസംഖ്യം ദൈവങ്ങളുടെ അതിജീവനകലാപങ്ങളുടെ കഥകളാണ് അവയിൽ മിക്കതും. വ്യാജപ്രവാചകരുടെ മഹാറാണിയായി മുദ്രകുത്തപ്പെട്ട ജെസബെൽ രാജ്ഞി ബി.സി. 842-ൽ കൊല്ലപ്പെട്ടുവെന്നാണ് ചരിത്രം(?). യഹോവയെ മറന്ന് ബാലിനെയും അസേറയെയും ആരാധിക്കാൻ തന്റെ ഭർത്താവ് അഹാബ് രാജാവിനെയും അയാളുടെ ജനതയെയും നിർബന്ധിച്ചു അവൾ. യഹോവയുടെ പ്രവാചകരെ കൊന്നുകളഞ്ഞ ജെസബെൽ തന്റെ ദുഷ്‌ചെയ്തികൾക്കൊടുവിൽ സ്വന്തം ജനതയാൽ വധിക്കപ്പെടുന്നു. കൊട്ടാരത്തിനുമുകളിൽ നിന്ന് താഴേക്ക് വലിച്ചെറിയപ്പെട്ട അവളുടെ ശരീരം കുതിരകൾ ചവിട്ടിമെതിക്കുകയും നായ്ക്കൾ കടിച്ചുകീറി തിന്നുകയും ചെയ്തു. 'കൊമ്പില്ലാത്ത പിശാചിനി'യായും 'തിന്മയുടെ ചക്രവർത്തിനി'യായും 'കാമത്തിന്റെ കാട്ടുതീ'യായും പഴയനിയമത്തിൽ ജീവിച്ച ഫിനിഷ്യൻ രാജകുമാരി 'സൂര്യനെ അണിഞ്ഞ ഒരു സ്ത്രീ'യിൽ പുനർജനിക്കുന്നു. ആ പേരുകൊണ്ടുതന്നെ അവൾ പ്രേമിക്കപ്പെടുകയും ദ്വേഷിക്കപ്പെടുകയും ചെയ്തു. ജെറോമിന്റെ അപ്പൻ ജോർജ്, പെണ്ണുകാണാൻവന്ന ദിവസം മുതൽ തന്റെ കണ്ണടയാൻ കാത്തുകിടന്ന ദിവസങ്ങൾവരെ അവളെ സർപ്പസന്തതിയായെണ്ണി. സാത്താന്റെ വചനങ്ങൾകൊണ്ട് അയാൾ അവൾക്കുമേൽ തീയും ഗന്ധകവും വർഷിച്ചു.

അതേസമയം വല്യമ്മച്ചിയും ചാച്ചനുമുൾപ്പെടെയുള്ളവർ ജെസബെലിന് നാലുചിറകുള്ള പെണ്ണിന്റെ ഉയിരും ഉണ്മയും സങ്കല്പിച്ചുകൊടുത്തു. അവളുടെ കർതൃസ്വരം മുതൽ നോവലിന്റെ ഭാഷയും ഭാഷണവും വരെയുള്ളവ ചിട്ടപ്പെടുത്തുന്നത് ബൈബിളാണ്. ക്രിസ്തുവും മഗ്ദലനയും മറ്റുമായി പരകായപ്രവേശം നേടുന്ന ജെസബെലിന്റെ സ്വത്വം മർത്യജീവിതത്തെ രക്തംവിയർത്ത പാതിരാത്രിയിലെ ഒറ്റുകൊടുക്കലും പീഡാനുഭവവും ക്രൂശാരോഹണവും ഉയിർത്തെഴുന്നേല്പും മറ്റുമായി സമീകരിച്ചവതരിപ്പിക്കുന്നു. ഭാഷണകലയിൽ പഴയനിയമവും പുതിയനിയമവും കൂടിക്കുഴയുന്നു. ഉല്പത്തി മുതൽ വെളിപാടുവരെയുള്ള 'പുസ്തക'ങ്ങളിൽ നിന്നു സ്വീകരിച്ച രൂപകങ്ങളും കല്പനകളും ബിംബങ്ങളും പ്രതീകങ്ങളും ഭാവനകളും സദൃശ്യവാക്യങ്ങളും നോവലിലുടനീളം ഒഴുകിനിറയുന്നു.

സ്ത്രീയുടെ കർതൃപദവിയിൽ ക്രിസ്തു സൃഷ്ടിച്ച വിപ്ലവകരമായ കിരീടധാരണങ്ങളാണ് ഒരുപക്ഷെ ഈ നോവലിലെ ഏറ്റവും രാഷ്ട്രീയസൂക്ഷ്മവും ലാവണ്യനിർഭരവുമായ ബൈബിൾപ്രഭാവം. പെണ്ണിനെയും പാമ്പിനെയും അടക്കേണ്ടത് നടുവൊടിച്ചുകൊണ്ടാവണമെന്ന് വിശ്വസിക്കുന്നു, ജോർജ്. 'സ്‌നേഹിക്കപ്പെടാത്ത ഭാര്യ' രാജാവായി ഉയർന്ന അടിമയെപ്പോലെയും മൃഷ്ടാന്നം കഴിച്ച ഭോഷനെപ്പോലെയും യജമാനത്തിയുടെ സ്ഥാനമപഹരിച്ച ദാസിയെപ്പോലെയും അസഹ്യമായ കാര്യമാണെന്ന് ജെസബെൽ തിരിച്ചറിയുന്നു, അവളെന്തുചെയ്തു?

'ഇല്ലാത്തവളായ തന്നിൽനിന്ന്, ഉള്ളതായി താൻ വിചാരിച്ചതുകൂടി എടുക്കപ്പെട്ട ശേഷം ജെസബെൽ വിളക്കുകൊളുത്തി പാത്രം കൊണ്ടുമൂടുകയോ കട്ടിലിനടിയിൽ വയ്ക്കുകയോ ചെയ്യാൻ സന്നദ്ധയായില്ല. മറിച്ച് അകത്തു പ്രവേശിക്കുന്നവർക്കു കാണാൻ പാകത്തിൽ അവൾ അതു പീഠത്തിന്മേൽ വച്ചു. മറഞ്ഞിരിക്കുന്നതൊന്നും വെളിപ്പെടാതിരിക്കുകയില്ല എന്ന് അവൾ പ്രതീക്ഷിച്ചു. അറിയപ്പെടാതെയും വെളിച്ചത്തുവരാതെയും ഇരിക്കുന്ന രഹസ്യവുമില്ല. ആകയാൽ, പഴയതു കടന്നുപോയി, ഇതാ പുതിയതു വന്നുകഴിഞ്ഞു എന്നു സ്വയം പറഞ്ഞുകൊണ്ട് ജെസബെൽ തന്റെ ജീവിതത്തിൽ സംഭവിച്ച എല്ലാ തെറ്റുകളും തിരുത്താൻ പുതിയ ശരികളെ സ്വപ്നം കണ്ടു.

പക്ഷേ, ദാമ്പത്യത്തിന്റെയും കുടുംബത്തിന്റെയും ഏക ദൈവത്തെ വെല്ലുവിളിക്കുന്ന നിമിഷം മുതൽ ഓരോ സ്ത്രീയും സമരിയായിലെ ജെസബെൽ രാജ്ഞിയായിത്തീരും എന്നും തന്റെ ജീവിതത്തിൽനിന്നു ജെസബെൽ പഠിച്ചു. രണ്ടായിരം കിലോമീറ്റർ അകലെ പോയിട്ടും ജെസബെല്ലിനോടുള്ള ജോർജ് ജെറോം മരക്കാരന്റെ പക അണഞ്ഞില്ല. കോടതിയിൽ ഒറ്റനിൽപ്പിന് രണ്ടുമണിക്കൂറോളം ചോദ്യം ചെയ്യപ്പെട്ടപ്പോൾ, 'ജെസബെൽ രാജ്ഞിയുടെ ആഗ്രഹപ്രകാരം ബാലിന് അമ്പലം പണിതത് അറിഞ്ഞു ക്ഷുഭിതനായി ഇസ്രയേലിൽ വരൾച്ചയുണ്ടാവട്ടെ എന്നു ശപിച്ച ഏലീയാ പ്രവാചകനെപ്പോലെയായിരുന്നു ജോർജ് ജെറോം മരക്കാരൻ' എന്നു പറയാൻ അവൾ ആഗ്രഹിച്ചിരുന്നു.

വാസ്തവത്തിൽ ഏലീയായുടെ പക ആഹാബിനോടോ ജെസബെലിനു വേണ്ടി ആഹാബ് പ്രതിഷ്ഠിച്ച ദൈവങ്ങളോടോ ആയിരുന്നില്ല. അത് ആ ദൈവങ്ങളെ ആരാധിച്ച ജെസബെലിന്റെ ആത്മവിശ്വാസത്തോടായിരുന്നു എന്ന് അവൾ പിൽക്കാലത്തു തിരിച്ചറിഞ്ഞിരുന്നു. യഹോവയുടെ ജനങ്ങൾ വെള്ളമില്ലാതെ വലഞ്ഞ നാലുവർഷവും ഏലീയാ പ്രവാചകൻ ജെസബെൽ രാജ്ഞിയുടെ ജലസമൃദ്ധമായ രാജ്യത്തുപോയി വസിച്ചു. കോപിക്കുകയും ജനങ്ങളെ ശിക്ഷിക്കുകയും ചെയ്യുന്ന ദൈവത്തെയും ആ ദൈവത്തിന്റെ കർക്കശക്കാരനായ പ്രവാചകനെയും മനസ്സിലാകാതെ ജെസബെൽ രാജ്ഞി വേദനിച്ചു. മഴ പെയ്യാറായപ്പോൾ ഏലീയാ വീണ്ടും ജെസ്രീലിൽ എത്തി ഴ പെയ്യിക്കാൻ ബാലിന്റെ പ്രവാചകരെ വെല്ലുവിളിച്ചു. പക്ഷേ, ബാലിന്റെ പ്രവാചകർക്കു മഴ പെയ്യിക്കാൻ സാധിച്ചില്ല. അതുകൊണ്ട് ഏലീയാ അവരെ കൂട്ടമായി കൊന്നു. തന്റെ ദൈവം ശക്തനാണെന്നു തെളിയിക്കാൻ മനുഷ്യരെ കൊല്ലാൻ മടിക്കാത്ത പ്രവാചകനോടു ക്ഷമിക്കാൻ ജെസബെൽ രാജ്ഞിക്കു സാധിച്ചില്ല. ഏലീയാ പ്രവാചകനു നേരേ വിരൽ ചൂണ്ടി 'ഇരുപത്തിനാലു മണിക്കൂറിനകം അവരുടെ വിധി നിനക്കുണ്ടായില്ലെങ്കിൽ എന്റെ ദൈവങ്ങൾ എന്നെ കൊന്നോട്ടെ' എന്നു വെല്ലുവിളിച്ചു. 'നീ ഏലീയാ ആണെങ്കിൽ ഞാൻ ജെസബെലാണ്' എന്ന് വിരൽ ചൂണ്ടി പറഞ്ഞു. ഏലീയാ പ്രവാചകൻ ഭയന്നോടി മലമുകളിലെ ഗുഹയിൽ അഭയം പ്രാപിച്ചു. പക്ഷേ, അതുകൊണ്ട് ഏലീയായുടെ പക അണഞ്ഞില്ല.

ജെസബെൽ രാജ്ഞിയുടെ ശരീരം നായ്ക്കൾ കടിച്ചുകീറിത്തിന്നുന്നതു കാണാൻ മോഹിച്ച ഏലീയാ പ്രവാചകനു സഹായവുമായി എത്തിയവരെപ്പോലെ ജോർജ് ജെറോം മരക്കാരനെ സഹായിക്കാനും ആളുകളെത്തി. അവർ ജെസബെൽ നടന്നുപോകുന്ന വഴികളിലൊക്കെ മുള്ളുകളും ചില്ലുകളും കുഴിബോംബുകളും ഒളിപ്പിച്ചു. അവളാകട്ടെ, മൂഢ, എവിടെയാണു തന്റെ വാഗ്ദത്ത ഭൂമി എന്നു തേടി തന്റെ മുമ്പിൽ കണ്ട വഴികളിലൂടെ അന്തംവിട്ടു പാഞ്ഞു'.

'രാജാക്കന്മാരുടെ പുസ്തക'ത്തിലും 'വെളിപാടുപുസ്തക'ത്തിലും നിന്നിറങ്ങിവന്ന് ജെസബെൽ പൗരോഹിത്യത്തിന്റെയും പ്രവാചകത്വത്തിന്റെയും ആകാശങ്ങളിലൂടെ പാറിനടക്കുന്നു. നരകത്തീയിൽ വീണുപോയ മാലാഖയാണവൾ എന്ന് നോവൽ സാക്ഷ്യപ്പെടുത്തുന്നു. ഇലഞ്ഞിക്കലച്ചൻ, ജെസബെലിനെ ഭൂമിയിൽനിന്നുയർത്തി പ്രതിഷ്ഠിക്കുകപോലും ചെയ്യുന്നു. കാരണം, തന്നെ വെറുക്കുന്നവരെ മാത്രമല്ല, താൻ വെറുക്കുന്നവരെപ്പോലും സ്‌നേഹിക്കാൻ കഴിയുന്നുണ്ട്, ചില സന്ദർഭങ്ങളിലെങ്കിലും അവൾക്ക്.

ജെസബെൽ തൊഴിൽപരമായി ഡോക്ടറാണ് എന്നതല്ല വൈദ്യശാസ്ത്രത്തിന് ഈ നോവലിന്റെ ആഖ്യാനകലയിൽ കൈവരുന്ന പ്രാതിനിധ്യത്തിനടിസ്ഥാനം. ജറോമും അവിനാശും സന്ദീപ്‌മോഹനും നന്ദഗോപനും ഹരിതയും അഹാനയും റാണിയും ഇർഷാദുമൊക്കെ ഡോക്ടർമാർതന്നെ. കോമായിൽ കിടക്കുന്ന ജറോമും നടുവൊഴിഞ്ഞു വീഴുന്ന ജോർജും രോഗാതുരയായ അനിതയും മുതൽ സെബിൻ വരെയുള്ളവർ വേറെയുമുണ്ട്. മെഡിക്കൽ കോളേജും മറ്റുചില ആശുപത്രികളുമാണ് നോവലിലെ മുഖ്യഭാവഭൂപടവും. പക്ഷെ ഇതൊന്നുമല്ല വൈദ്യവിജ്ഞാനത്തെ നോവലിന്റെ ആഖ്യാനകലയുടെ രാഷ്ട്രീയ-സൗന്ദര്യ ഭാഗധേയമാക്കി മാറ്റുന്നത്. അത്, മിക്ക മനുഷ്യാവസ്ഥകളെയും ചോദനകളെയും അഥവാ മനുഷ്യജീവിതത്തെത്തന്നെയും വൈദ്യശാസ്ത്രദൃഷ്ടിയിലൂടെ വിവരിക്കുന്ന ഭാവബന്ധമാണ്. ശരീരവും മനസും മാത്രമല്ല, രതിയും മൃതിയും രോഗവും വേദനയും പ്രണയവും പ്രത്യുല്പാദനവും കാമവും ക്രോധവുമൊക്കെ വൈദ്യശാസ്ത്രപരമായി വ്യാഖ്യാനിച്ചുകൊണ്ടാണ് നോവൽ അവയുടെ വൈകാരികമൂല്യത്തെ മുന്നോട്ടുവയ്ക്കുന്നതും മറികടക്കുകയോ കടക്കാതിരിക്കുകയോ ചെയ്യുന്നതും. ഒരുദാഹരണം നോക്കുക:

'അയാൾ പെട്ടെന്നു കൈ നീട്ടി അവളുടെ ചിരി വിടർന്ന കവിളിലെ നുണക്കുഴിയിൽ തൊട്ടു. അവൾ പറഞ്ഞുവന്നതു മറന്ന് കോരിത്തരിച്ചു. ശരീരത്തിലെ കോശങ്ങൾ ഏഴു കാഹളങ്ങൾ മുഴക്കി. അയാൾ കട്ടിലിൽ ഇരുന്നു. അവളെ കൈപിടിച്ച് മുമ്പിലേക്കു നീക്കി നിർത്തി. അവൾ പൂത്തുലഞ്ഞു. ആ നിമിഷം സമാഗതമായിരിക്കുന്നു. ഞാൻ എന്റെ പുരുഷനോടു ചേരാൻ പോകുന്നു-അവളുടെ ഹൃദയം പ്രവചിച്ചു. എന്റെ ഭർത്താവ്. എന്റെ പുരുഷൻ. ഞങ്ങൾ സ്‌നേഹത്താൽ ജ്ഞാനസ്‌നാനപ്പെടും. മരണം വേർപെടുത്തുന്നതുവരെ ഒറ്റ ശരീരവും ആത്മാവും ആകും. അയാൾ കയ്യുയർത്തി അവളുടെ കഴുത്തിൽ സ്പർശിച്ചു. അവൾ വീണ്ടും കോരിത്തരിച്ചു. അപ്പോൾ മുന്നറിയിപ്പില്ലാതെ അയാൾ അവളുടെ തല പിടിച്ചു താഴ്‌ത്തി. അവൾ അയാളുടെ കാൽച്ചുവട്ടിലേക്കു മുട്ടുകുത്തി വീണു. അയാൾ അവളുടെ മുഖം പിടിച്ചു ബലമായി തന്റെ മടിയിലേക്ക് അമർത്തി. തന്റെ ലിംഗം അവളുടെ വായിലേക്കു തള്ളി. അവൾക്കു ശരീരത്തിൽനിന്ന് ആത്മാവു വേർപെട്ടതുപോലെ തോന്നി. അവളുടെ ശിരസ്സ് അയാളുടെ കയ്യിൽ, കഴുത്തൊടിഞ്ഞ പാവ വികൃതിക്കുട്ടിയുടെ കയ്യിലെന്നപോലെ, അനിച്ഛാപൂർവ്വകം ആടി.

'പഠിക്കാനുള്ളതല്ലാതെ ഞാനീ പന്ന പുസ്തകമൊന്നും വായിച്ചിട്ടില്ല. മേലിൽ എന്നോട് കിബ്രാൻ കുബ്രാൻ എന്നൊന്നും പറഞ്ഞേക്കരുത്.... പിന്നെ, നിന്റെ പേര് അതെനിക്ക് ഇഷ്ടപ്പെട്ടു! ജെസബെൽ എന്ന പേരിന്റെ അർത്ഥമറിയാമോ? ഹോർ, ഹോർ, ഹോർ......!'

അയാൾ കിതപ്പോടെ ചിരിച്ചു. ജെസബെലിന് ഒരു നിമിഷം ബോധം നഷ്ടപ്പെട്ടു. അപ്രതീക്ഷിതമായ ആ ആഘാതം നേരിടാൻ അവൾക്കൊരു മുന്നൊരുക്കവും ഉണ്ടായിരുന്നില്ല. മസ്തിഷ്‌കം പകുതി മരവിച്ചു. മറുപകുതി ആ നിമിഷങ്ങളെ അതിജീവിക്കാൻ പഴയ പാഠപുസ്തകങ്ങളിലേക്കു പിൻവാങ്ങി.

പുരുഷലിംഗത്തിനു പ്രധാനമായി നാലു ഭാഗങ്ങളുണ്ട്. ഡോക്ടറായ ജെസബെൽ നവവധുവായ ജെസബെലിനോടു സുവിശേഷം ചെയ്തു. ഗ്ലാൻസ്, കോർപസ്, കാവേർനോസം, കോർപസ് സ്‌പോഞ്ചിയോസം, യുറീത്ര. ഗ്ലാൻസ് എന്നാൽ ലിംഗത്തിന്റെ തലപ്പ്. അത് പിങ്ക് നിറത്തിലായിരിക്കും. മ്യൂക്കോസയാൽ പൊതിയപ്പെട്ടിരിക്കും. കോർപസ് കാവേർനോസം എന്നാൽ ലിംഗത്തിന്റെ വശങ്ങളിലുള്ള മാംസകലകളുടെ പാളികളാണ്. ഈ കലകളിൽ രക്തം ഇരച്ചു കയറുമ്പോഴാണ് ഉദ്ധാരണം സംഭവിക്കുന്നത്. കോർപസ് സ്‌പോഞ്ചിയോസം എന്നാൽ ലിംഗത്തിന്റെ മുമ്പിലൂടെ ഗ്ലാൻസ് വരെ നീളുന്ന സ്‌പോഞ്ച്‌പോലെയുള്ള കലകൾ. ഉദ്ധാരണവേളയിൽ രക്തം ഈ കലകളിലും ഇരച്ചു കയറുകയും യുറീത്ര തുറക്കുകയും ചെയ്യുന്നു. കോർപസ് സ്‌പോഞ്ചിയോസത്തിന്റെ കലകൾക്കിടയിലൂടെ പോകുന്ന നാളിയാണ് യുറീത്ര. ഇതിലൂടെയാണു മൂത്രവും ശുക്ലവും പുറത്തുവരുന്നത്.

'നിന്റെ പേരിനോടു നീതി കാണിക്കെടാ.... നീതി കാണിക്ക്..... നിന്റെ സാമർഥ്യം ഞനൊന്നു കാണട്ടെ..... യൂ ഹോർ, ഹോർ, ഹോർ.....!'

അയാൾ ഭ്രാന്തനെപ്പോലെ കിതച്ചു. ജെസബെൽ തകർന്നടിയുകയായിരുന്നു. അയാൾ അവളുടെ ശിരസ്സിലല്ലാതെ മറ്റൊരിടത്തും സ്പർശിച്ചില്ല. എങ്കിലും അവളുടെ ശരീരം കീറിമുറിഞ്ഞതുപോലെ വേദനിച്ചു. പുരുഷനിൽ ലൈംഗിക താത്പര്യം ഉണരുന്നതിനെക്കുറിച്ചു പഠിച്ചത് ഓർമ്മിക്കൂ-ഡോക്ടറായ ജെസബെൽ ഉദ്‌ഘോഷിച്ചു. തലച്ചോറിലെ ഓട്ടോണമസ് നെർവസ് സിസ്റ്റത്തിലെ പാരാ സിംപതറ്റിക് കോശങ്ങൾ അസെറ്റൈൽ കോളൈൻ ഉത്പാദിപ്പിക്കുകയും അത് എൻഡോത്തീലിയൽ കോശങ്ങളിൽ നൈട്രിക് ഓക്‌സൈഡ് ഉത്പാദിപ്പിക്കുകയും ഈ നൈട്രിക് ഓക്‌സൈഡ് കോർപസ് കാവേർനോസയുടെ ട്രാബിക്യുലാർ രക്തക്കുഴലുകൾ വലിയാൻ ഇടയാക്കുകയും തുടർന്നു കൂടുതൽ രക്തം ലിംഗത്തിലേക്ക് ഇരച്ചു കയറാൻ ഇടയാക്കുകയും താഴെയുള്ള കോശങ്ങൾ ഞെരുങ്ങി ആ രക്തം വാർന്നു പോകാതെ നിലനിർത്തുകയും അങ്ങനെ കോർപസ് കാവേർനോസം കലകൾ ദൃഢമാകുകയും....

കുറച്ച് നൈട്രിക് ഓക്‌സൈഡ്-ജെസബെൽ സ്വയം സമാശ്വസിപ്പിച്ചു.

തലച്ചോറിലെ പാരാസിംപതറ്റിക് കോശങ്ങളിൽ പ്രവർത്തനം നിലച്ചപ്പോൾ ജെറോം ജോർജ് മരക്കാരൻ എഴുന്നേറ്റു. അയാളുടെ ശരീരത്തിൽ രാസവസ്തുക്കളുടെ ഉത്പാദനം നിലച്ചിരുന്നു. ശരീരകലകളിൽ നിന്നു രക്തം തിരിച്ചൊഴുകി അവ പഴയ നിലയിലേക്കു ചുരുങ്ങിയിരുന്നു. അയാൾ ബാത്‌റൂമിൽ പോയി വന്ന് ഒരക്ഷരംപോലും മിണ്ടാതെ കിടക്കയിലേക്കു വീണു. അയാളുടെ ശരീരം മെലട്ടോണിൻ ഉത്പാദിപ്പിച്ചു. അയാൾ ഉറങ്ങി'.

ജീവിതത്തിനു സംഭവിക്കുന്ന ഭാവമാറ്റങ്ങളുടെ ഈ തലം ജെസബെലിന്റെ മനോനിലകളെ സ്വാധീനിക്കുകയും രൂപപ്പെടുത്തുകയും ചെയ്യുന്നു. അതുകൊണ്ടാണ് അവൾക്കു കുറ്റബോധമോ പാപബോധമോ തോന്നാതെ തന്റെ കാമനകളെ തുറന്നാവിഷിക്കരിക്കാൻ കഴിയുന്നത്. 'മെഡിക്കൽ ഫിക്ഷൻ' എന്നുതന്നെ വിളിക്കാവുന്നവിധം വൈദ്യശാസ്ത്രത്തിന്റെ (ഗൈനക്കോളജിയും പീഡിയാട്രിയും സൈക്കിയാട്രിയും ഓങ്കോളജിയും മുതൽ ന്യൂറോളജി വരെ.) സൂക്ഷ്മസമവാക്യങ്ങളിൽ ജീവിതത്തെ കൊരുത്തിടാൻ കഴിയുന്നുണ്ട് നോവലിന്. മലയാളത്തിൽ തീർത്തും വിരളമാണ് ഈയൊരുശാഖ.

കോടതിയുടെയും നിയമത്തിന്റെയും വ്യവഹാരതലങ്ങളാണ് നോവലിലെ മറ്റൊരു ആഖ്യാനധാര. അവിശ്വസനീയവും അതിശയോക്തിപരവുമാണ് പലപ്പോഴും കോടതിയിലെ വാദങ്ങളുടെ പോക്ക്. പക്ഷെ കോടതി, ഈ നോവലിൽ ഒരു യഥാർഥ സ്ഥലവും സന്ദർഭവും എന്നതിനപ്പുറം നോവലിന്റെ കേന്ദ്രരാഷ്ട്രീയത്തെ പ്രതിനിധാനം ചെയ്യുന്ന സാമൂഹ്യസ്ഥാപനവും പ്രത്യയശാസ്ത്രവുമായാണ് പ്രവർത്തിക്കുന്നത്. കുടുംബകോടതിയാണല്ലോ പശ്ചാത്തലം. വിവാഹമോചനത്തിന് കുടുംബകോടതിയെ സമീപിക്കുന്ന ഒരു സ്ത്രീക്കുമേൽ സമൂഹവും കുടുംബങ്ങളും പുരുഷപൊതുബോധവും മതവും സദാചാരനിയമങ്ങളും കഴുകൻകണ്ണുകൾകൊണ്ടു നടത്തുന്ന ചുഴിഞ്ഞുനോട്ടങ്ങളാണ് കോടതിമുറിയിലെ വാദങ്ങളും പ്രതിവാദങ്ങളും. വാക്കുകൾകൊണ്ടുള്ള വസ്ത്രാക്ഷേപമാണ് അവിടത്തെ രീതിശാസ്ത്രവും നീതിശാസ്ത്രവും. നോവലിൽ കഥയും കാലവും ഭൂതവും ഓർമയും ചുരുളഴിയുന്ന കലാരൂപകം കോടതിമുറിയിലെ വാദങ്ങളാണ്. തന്നെ ചുഴറ്റിവീഴ്‌ത്തുന്ന ഓരോ ചോദ്യത്തിലും നിന്നാണ് ജെസ് ഓർമയുടെ ചുഴിക്കുത്തുകളിൽ മുങ്ങി ജീവിതം കണ്ടെടുക്കുന്നതും കഥയായി പറയുന്നതും. എതിർഭാഗം വക്കീലും തന്റെ വക്കീലും ജഡ്ജിയും കോടതിതന്നെയും പുലർത്തുന്ന ആണധികാരവ്യവസ്ഥയ്ക്കുള്ളിലാണ് നോവൽ ദാമ്പത്യമെന്ന അധികാരഘടനയെയും കുടുംബമെന്ന ചൂഷണസ്ഥാപനത്തെയും ഭർതൃമേൽക്കോയ്മയിലൂന്നിയ ലൈംഗികതയെയും ചവിട്ടിയുറപ്പിക്കുന്ന സ്ത്രീവിരുദ്ധതയുടെ രാഷ്ട്രീയം ചൂണ്ടിക്കാണിക്കുന്നത്. പുരുഷാധീശപൗരോഹിത്യഘടനയിലൂന്നിയ മതബോധത്തിന്റെതന്നെ നീട്ടിപ്പിടിക്കലാണത്.

മലയാളത്തിൽ പുരുഷസ്വലിംഗരതിയുടെ തുറന്നെഴുത്തുകൾ തീരെയില്ല. നന്ദകുമാറും മാധവിക്കുട്ടിയും സാറാജോസഫും സംഗീതാ ശ്രീനിവാസനുമൊക്കെ സ്ത്രീയുടെ സ്വലിംഗരതിയെയാണ് പ്രശ്‌നവൽക്കരിക്കാൻ ശ്രമിച്ചത്. മീര തന്റെ നോലിൽ ആവിഷ്‌ക്കരിക്കുന്ന പുരുഷസ്വലിംഗരതിയുടെ സാമൂഹ്യമാനങ്ങൾ മലയാളസന്ദർഭത്തിൽ കിഷോർകുമാറിന്റെ ആത്മാനുഭവാവിഷ്‌ക്കാരം (രണ്ടുപുരുഷന്മാർ ചുംബിക്കുമ്പോൾ) ജയൻ ചെറിയാന്റെ സിനിമ (കാബോഡി സ്‌കേപ്‌സ്) എന്നിവ മുതൽ സുപ്രീംകോടതി സെപ്റ്റംബറിൽ നടത്തിയ വിധി (377-ാം വകുപ്പ്) വരെയുള്ള സന്ദർഭങ്ങൾ മുൻനിർത്തി വായിക്കുന്നതു കൗതുകരമായിരിക്കും.

ആണാകട്ടെ, പെണ്ണാകട്ടെ, ലിംഗമാറ്റശസ്ത്രിക്രിയയുടെ പുതിയ ലിംഗപദവി കൈവരിക്കുന്ന ആരുമാകട്ടെ, ഈ നോവൽ മുന്നോട്ടുവയ്ക്കുന്ന ലിംഗബോധത്തിന്റെ രാഷ്ട്രീയം കാലങ്ങളായി നമ്മുടെ സാമൂഹ്യാബോധങ്ങളെ കിരാതമായി കീഴടക്കിയിരുന്ന പുരുഷാധിപത്യത്തിന്റെയും സദാചാരപ്രമാണങ്ങളുടെയും കടയ്ക്കൽ വയ്ക്കുന്ന കത്തിയാണ്. ജെറോമിനെയും അവിനാശിനെയും വേർപിരിക്കാൻ ജോർജും കുടുംബവും കണ്ടെത്തിയ വഴിയാണ് ജെസിന്റെയും കുടുംബത്തിന്റെയും ജീവിതം തലകീഴ്മറിച്ചത്. സ്വാത്മബോധമുള്ള ലിംഗപദവിയും സ്വതന്ത്രമായ ലൈംഗികാനുഭവും അനുവദിക്കപ്പെടാത്ത മനുഷ്യരുടെ ജീവിതം നരകമാകുന്നതിന്റെ വ്യവസ്ഥാപിതമായ വിളിപ്പേരായി മാറുന്നു, ഇവിടെ കുടുംബവും ദാമ്പത്യവുമൊക്കെ. മൂക്കറ്റം കയ്പുനീർ കുടിക്കുംപോലുള്ള കിടപ്പറയനുഭവങ്ങൾക്കുശേഷം ജെസ് ചിന്തിക്കുന്നു:

'വീട്ടിൽ സംരക്ഷിക്കപ്പെടുകയും സ്‌കൂളിലും കോളേജിലും സുഹൃത്തുക്കൾക്ക് ഇടയിലും ബഹുമാനിക്കപ്പെടുകയും ചെയ്യുന്ന ഒരു സ്ത്രീയുടെ കുതികാലിൽ പരുക്കേൽപ്പിക്കാനുള്ള സമൂഹത്തിന്റെ പദ്ധതിയാണു ദാമ്പത്യമെന്ന് അവൾ തീർച്ചപ്പെടുത്തി. കിന്നരവും വീണയും തപ്പും കൈത്താളവും കാഹളവും കൊണ്ട് ആനന്ദാരവം മുഴക്കി അവൾ സ്വീകരിക്കാൻ കാത്തിരുന്ന വലിയ സ്വർണക്കിരീടവും നേരിയ ചണനൂൽകൊണ്ടുള്ള ചെമന്ന മേലങ്കിയും ധരിച്ച രാജകുമാരൻ ഒരു ആൾമാറാട്ടക്കാരൻ മാത്രമാണ് എന്നറിഞ്ഞ് അവൾ നടുങ്ങി. 'നീ വേറൊരുവളായി നടിക്കുന്നതെന്തിന്' എന്ന് അവൾ അവളോടുതന്നെ നിരന്തരം ചോദിച്ചു. അവളുടെ ആത്മാവിൽ മുൾച്ചെടികൾ വളർന്നു'.

മീര, തന്റെ കാലത്തിന്റെ ഏറ്റവും മൂർത്തവും മാനവികവുമായ സാമൂഹ്യരാഷ്ട്രീയത്തിനും ലിംഗസ്സ്തിത്വത്തിനും വേണ്ടിയാണ് യഥാർഥത്തിൽ ഈ നോവലിൽ വാദിക്കുന്നത്. ഒപ്പം ലൈംഗികാനുഭവങ്ങൾക്കുമേൽ ഏതുലിംഗത്തിൽപെട്ട വ്യക്തികൾക്കും കൈവരേണ്ട സ്വയംനിർണയശേഷിയെക്കുറിച്ചുള്ള തിരിച്ചറിവും. ഒരു സന്ദർഭം നോക്കുക:

' 'ഞാൻ കാത്തിരിക്കാം. വിവാഹം എന്നത് ഉടനെ വേണമെന്നല്ല ഞാൻ പറഞ്ഞത്. ജെസബെലിന്റെ ഫെലോഷിപ്പ് കഴിയട്ടെ. നമുക്ക് പരസ്പരം മനസ്സിലായതിനുശേഷം-എന്റെ കൂടെ ജീവിക്കാൻ ജെസബെലിന് ഉറപ്പു തോന്നിയതിനു ശേഷം....'.

ജെസബെലിന് അയാളോടു കൂടുതൽ അനുകമ്പ തോന്നി.

'നിങ്ങളോട് എനിക്ക് ദേഷ്യമൊന്നുമില്ല, കബീർ. എനിക്കിപ്പോൾ നിങ്ങളോട് ഇഷ്ടം മാത്രമേയുള്ളൂ. പക്ഷേ, ഇതുവരെയുള്ള ജീവിതത്തിൽനിന്ന് ഒരു പാഠം ഞാൻ പഠിച്ചു. ഒരു തീരുമാനം എടുത്തു- ഒരുപാടു പുരുഷന്മാരുടെ കൂടെക്കഴിഞ്ഞിട്ടേ ഞാനിനി സ്ഥിരമായി ഒരു പുരുഷനെ സ്വീകരിക്കുന്നുള്ളൂ. ഈ നശിച്ച ചാരിത്ര്യം കാരണം, നിങ്ങൾക്കു മാത്രമല്ല, എനിക്കും സ്വസ്ഥത ഉണ്ടായില്ലെങ്കിലോ?'

കബീറിന്റെ മുഖം ചുവന്നു. നിരസിക്കപ്പെടുമ്പോൾ പുരുഷന് തോന്നാവുന്ന അസ്വസ്ഥത അയാളെയും അലട്ടുന്നുണ്ട് എന്ന് അവൾക്കു തോന്നി'.

അഞ്ചാമത്തെതലം ജനപ്രിയനോവലിന്റെ ഭാവുകത്വപരിസരങ്ങൾ പുനഃസൃഷ്ടിക്കുന്നതിൽ മീര പുലർത്തുന്ന രസതന്ത്രങ്ങളാണ്. 'വനിത' ദ്വൈവാരികയിൽ തുടർച്ചയായി പ്രസിദ്ധീകരിക്കാനുള്ള കൃതി എന്ന നിലയിൽ ജനപ്രിയനോവലെഴുത്തിന്റെ കലാത്മക പ്രൊഫഷണലിസം അടിമുടി പാലിക്കാൻ മീര പ്രകടിപ്പിക്കുന്ന മിടുക്കാണ് ഈ തലം. സ്ത്രീയനുഭവങ്ങൾക്കു കൈവരുത്തുന്ന ദൈനംദിനത്വത്തിന്റെ പുതുമ, പ്രണയമുൾപ്പെടെയുള്ള വൈകാരികാനുഭൂതികളുടെ സംഘർഷാത്മകത, സമകാലിക സംഭവങ്ങളിൽ സ്ത്രീ(പത്ര)വായനക്കാർക്കും (ടിവി) പ്രേക്ഷകർക്കും പ്രിയങ്കരമായ സെൻസേഷണൽ സംഭവങ്ങളുടെ നാടകീയത, ലൈംഗികതയുടെ നാനാതലങ്ങളിൽ ശ്രദ്ധകേന്ദ്രീകരിക്കുന്ന സ്‌ത്രൈണഭാവങ്ങളുടെ പടർച്ച, കുടുംബം, വിവാഹം, ദാമ്പത്യം, സദാചാരം, അവിഹിതഗർഭം, വിവാഹേതര ബന്ധം, ഗാർഹികപീഡനം, ശിശുപീഡനം, 'കൂട്ട' ആത്മഹത്യ, ലൈംഗിക'വൈകൃതം', കന്യാചർമ-ലിംഗമാറ്റ ശസ്ത്രക്രിയകൾ...... എന്നിങ്ങനെയുള്ള വിഷയങ്ങളുടെ ധാരാളിത്തം-ജനപ്രിയനോവലിന്റെ മലയാളസമവാക്യങ്ങൾ ഒട്ടേറെയുണ്ട്, നോവലിൽ. 'സ്വന്തം അമ്മയുടെ നഗ്നത, കുളിമുറിയിൽ ഒളിച്ചുവച്ച മൊബൈൽഫോണിൽ ചിത്രീകരിക്കുന്ന കൗമാരക്കാരനെ'ക്കുറിച്ചുള്ള വാർത്തയുടെ ആവിഷ്‌ക്കാരംപോലുള്ളവ വേറിട്ടുനിൽക്കുന്നു. ഏറ്റവും ശ്രദ്ധേയം, നോവലിന്റെ കേന്ദ്രപ്രമേയമായി മാറുന്ന വാർത്താധിഷ്ഠിതജീവിതപ്രശ്‌നം തന്നെയാണ്- 'കാമുകനുമൊത്ത് ജീവിക്കാൻ വേണ്ടി ഭർത്താവിനെ കൊല്ലാൻ 'ക്വട്ടേഷൻ' കൊടുത്ത സ്ത്രീ'.

നിശ്ചയമായും മാധവിക്കുട്ടിക്കും സാറാജോസഫിനും ശേഷം മലയാളത്തിൽ സ്ത്രീയുടെ അകംലോകങ്ങൾ ഇത്രമേൽ തുറന്നാവിഷ്‌ക്കരിച്ച മറ്റൊരെഴുത്തുകാരിയില്ല. നോവലിന്റെ കലയിൽ പിന്തുടരുന്ന കാവ്യാത്മക റിയലിസത്തിന്റെയും സ്ത്രീപക്ഷ സൗന്ദര്യ-രാഷ്ട്രീയത്തിന്റെയും പുരുഷാധീശമൂല്യവ്യവസ്ഥകൾക്കു നേരെയുള്ള നിശിതമായ കടന്നാക്രമണങ്ങളുടെയും തലങ്ങളിൽ മീരയ്ക്കുള്ള കാഴ്ചപ്പാടുകളും നിലപാടുകളും മലയാളഭാവനയിൽ സൃഷ്ടിക്കുന്ന ലാവണ്യവിസ്മയം ഒന്നു വേറെതന്നെയാണ്. 'സൂര്യനെ അണിഞ്ഞ ഒരു സ്ത്രീ'യാകട്ടെ, ഒരുപടികൂടികടന്ന്, മലയാളനോവലിന്റെ ലിംഗരാഷ്ട്രീയഭൂപടത്തിൽ സ്വന്തവും സ്വതന്ത്രവുമായ ഒരു ഭാവരാഷ്ട്രം വരച്ചുചേർക്കുകയും ചെയ്യുന്നു. കാമനകളുടെ സ്വതന്ത്രറിപ്പബ്ലിക്.

നോവലിൽ നിന്ന്:-

'അതൊരു ഞായറാഴ്ചയായിരുന്നു. ജെസബെലിനു ക്ലാസ് ഇല്ലാത്ത ദിവസമായിരുന്നു. രാവിലെമുതൽ വിഴുപ്പലക്കിയും ജെറോം ഓർഡർ ചെയ്ത വിഭവങ്ങൾ പാകംചെയ്തും പാത്രങ്ങൾ കഴുകിയും തറതുടച്ചും തളർന്ന ദിവസം.

ജെറോം ഉച്ചയുറക്കത്തിൽ ആഴ്ന്നപ്പോൾ കുളി കഴിഞ്ഞ് ഒരു ചായയുമായി അവൾ സോഫയിൽ ചടഞ്ഞു. അഹാനയുടെ കയ്യിൽനിന്നും കടം വാങ്ങിയ 'എ ഹിസ്റ്ററി ഓഫ് ഗോഡ്' എന്ന പുസ്തകം കയ്യിൽ ഉണ്ടായിരുന്നു. വളരെ ദിവസങ്ങൾക്കുശേഷം ഒരു പുസ്തകം മറിക്കാൻ സമയം കിട്ടിയതിന്റെ ആഹ്ലാദത്തിൽ മുഴുകിയിരിക്കെ, ജെറോം വിളിച്ചു. അവൾ കേട്ടില്ല. അതുകൊണ്ട് അയാൾ എഴുന്നേറ്റു വന്നു. പുസ്തകത്തിൽ മുഴുകിയ അവളുടെ ഇരിപ്പ് അയാളെ ചൊടിപ്പിച്ചു. 'ഏതു പരീക്ഷയ്ക്കാ എപ്പഴും ഒരു പഠിത്തം' എന്നു ചോദിച്ച് അയാൾ പുസ്തകം നിന്ദയോടെ വലിച്ചെടുത്ത് അതിന്റെ ശീർഷകം വായിച്ചു.

'വേസ്റ്റ്!' എന്നു മുറുമുറുത്തുകൊണ്ട് അയാൾ പുസ്തകം അവജ്ഞയോടെ താഴേക്കിട്ടു. അതു മൂക്കും കുത്തി തറയിൽ വീണു. അവളുടെ മുഖം ചുവന്നു. അവളുടെ മുഖത്തേക്കു പാളി നോക്കിയതും ജെറോമിനു വീണ്ടുവിചാരമുണ്ടായി. വിഷയം മാറ്റാൻ 'എനിക്കും ഒരു ചായ താ' എന്ന് അയാൾ ഉത്തരവിട്ടു. അവൾ അനങ്ങിയില്ല. അയാളെ തുറിച്ചു നോക്കി ഇരുന്നു. 'പറഞ്ഞതു കേട്ടില്ലേ, ചായയെടുക്ക്' എന്നു ജെറോം വീണ്ടും കല്പിച്ചു. 'ഫ്‌ളാസ്‌കിലുണ്ട്' എന്ന് അവൾ പരുഷമായി പ്രതിവചിച്ചു. 'എടുത്തുതന്നാലെന്താ' എന്ന് അയാൾ ചോദ്യം ചെയ്തു. 'ജെറോമിനെന്താ കൈയ്ക്കു സ്വാധീനമില്ലേ? എടുത്തു കുടിക്ക്' എന്ന് അവളും മറുതലിച്ചു. അയാളുടെ മുഖം ചുവന്നു. പക്ഷേ അവളുടെ മുഖവും ചുവന്നതായി അയാൾ കണ്ടു. അതുകൊണ്ട്, പെട്ടെന്ന് അയാൾ ശബ്ദം മയപ്പെടുത്തി.

'ഒന്നെടുത്തുതാ, ജെസബെൽ! എന്തിനാ വെറുതെ എന്നോടു ദേഷ്യപ്പെടുന്നത്?'

ജെസബെൽ പുകയുന്ന മുഖത്തോടെ എഴുന്നേറ്റുപോയി ചായ പകർന്നു. സോഫയിൽ ഇരുന്നു ടിവി ഓൺ ചെയ്യുകയായിരുന്ന ജെറോമിനു നീട്ടി.

'ജെറോം, മേലിൽ ഇങ്ങനെ ചെയ്യരുത്....' ശബ്ദം ശാന്തമാക്കാൻ അവൾ കഴിയുന്നത്ര ശ്രമിച്ചു.

ജെറോം മനസ്സിലാകാത്ത ഭാവം അഭിനയിച്ചു. 'അതിനു ഞാനെന്തു ചെയ്തു' എന്ന് അമ്പരന്നു.

'ഞാൻ വായിച്ചുകൊണ്ടിരുന്ന പുസ്തകം വലിച്ചെടുത്ത് നിലത്തെറിഞ്ഞില്ലേ?'

'ഓ, അതോ?'

അയാൾ പെട്ടെന്ന് ടിവിയുടെ ചാനൽ മാറ്റുന്നതിൽ ശ്രദ്ധാലുവായി. അതിനിടയിൽ അയാളുടെ മുഖത്ത് ആത്മവിശ്വാസമില്ലാത്ത മനുഷ്യരുടെ മഞ്ഞച്ച ചിരി തെളിഞ്ഞു. ഇതൊക്കെ വായിച്ചാൽ നിനക്കു ബോറടിക്കില്ലേ? എന്ന് അയാൾ അതു തമാശയാക്കി. അവൾ നടന്നു ചെന്നു പുസ്തകം എടുത്തു പൊടി തട്ടി നെഞ്ചോടു ചേർത്ത് അയാളെ നോക്കി. അവളുടെ കണ്ണുകൾ കത്തി.

'പുസ്തകമെടുത്തെറിയാൻ സാധിക്കുന്ന ഒരാൾ ആണെന്നറിഞ്ഞിരുന്നെങ്കിൽ ഞാനൊരിക്കലും നിങ്ങളെ വിവാഹം കഴിക്കുമായിരുന്നില്ല, ജെറോം'.

ജെറോമിന്റെ മുഖത്ത് അനിഷ്ടം നിറഞ്ഞെങ്കിലും അയാൾ പെട്ടെന്നു ചിരി അഭിനയിച്ചു.

'ഹ! ഞാനൊരു തമാശയ്ക്ക്...! അപ്പോഴേക്കു നീയതിനെ അങ്ങു സീരിയസാക്കി'.

'ഒരാൾ പറയുകയും ചെയ്യുകയും ചെയ്യുന്ന തമാശകളിൽനിന്ന് അയാളുടെ തനി സ്വഭാവമറിയാം'.

അവൾ നേരിട്ടുള്ള യുദ്ധത്തിനു തയ്യാറാകുന്നു എന്നു മനസ്സിലായപ്പോൾ അയാൾ വക്രിപ്പിച്ച ചുണ്ടുകളോടെ ചായയിൽ ശ്രദ്ധ കേന്ദ്രീകരിച്ചു. പിന്നീട് താൻ ദുർബലനാകുന്നു എന്നതിൽ ലജ്ജ തോന്നിയതുകൊണ്ട് ഒന്നു മുറുമുറുത്തു.

'ങ്ഹാ, ഡാഡി പറഞ്ഞതു ശരിയാ.. നിന്റെ പേരിന്റെ തനിഗുണമാ ഭർത്താവിനെ വകവയ്ക്കാത്ത സ്വഭാവം'.

'ആയിരിക്കും.... ഞാൻ നിങ്ങളെ ക്ഷണിച്ചില്ലല്ലോ, എന്നെ വന്നു കെട്ടിയെടുക്കണേ എന്ന്!'.

അവൾ പൊട്ടിത്തെറിച്ചു. ജെറോം ഞെട്ടിത്തരിച്ചു. അയാൾ ചായക്കപ്പ് ടീപ്പോയ്‌മേൽ വച്ച് ചാടിയെഴുന്നേറ്റു. പല്ലു ഞെരിച്ച് അവളുടെ നേരേ കൈ ചൂണ്ടി.

'ഛീ! നിർത്തെടീ! ഇല്ലെങ്കിൽ എന്റെ തനിഗുണം നീ കാണും... ഞങ്ങളുടെ വീട്ടിലെ പെണ്ണുങ്ങൾ ഭർത്താക്കന്മാരോട് ഇങ്ങനെ ഒറ്റയ്ക്കു പറഞ്ഞാലുണ്ടല്ലോ-അടിച്ചു പല്ലു താഴെയിടും...!'.

'ധൈര്യമുണ്ടെങ്കിൽ അടിച്ചു നോക്ക്. അപ്പോൾ കാണാം!'.

ജെസബെൽ ജ്വലിച്ചു. ജെറോമിന്റെ മുഖം വിവർണമായി. അയാൾ കയ്യോങ്ങി. അവൾ പുച്ഛത്തോടെ ചിരിച്ചു.

'ആണാണെന്നു കാണിക്കാൻ ഭാര്യയെ അടിക്കുകയല്ല വേണ്ടത്. കൂടെക്കിടന്നു കാണിക്ക്....!'

ജെറോമിന്റെ മുഖം അപമാനം കൊണ്ടു കരുവാളിച്ചു.

'ഞാൻ നല്ല ആണാണെടീ! അതുകൊണ്ട്, എനിക്കു നീ പോരാ. നിന്റെ കൂടെക്കിടക്കുന്നതിനേക്കാൾ എനിക്കിഷ്ടം വഴിയിൽ കാണുന്ന കൊടിച്ചിപ്പട്ടിയുടെ കൂടെ കിടക്കുന്നതാ. എനിക്ക് നിന്റെ ശരീരം കാണുന്നതോ അറപ്പാ!'

ജെസബെൽ തരിച്ചുപോയി. ഒരു യന്ത്രമനുഷ്യൻ തന്റെ മുടിക്കെട്ടിൽ തൂക്കി ഒരു നെരിപ്പോടിലേക്ക് വലിച്ചെറിഞ്ഞാൽ എന്നതുപോലെ, അവൾ പൊള്ളിപ്പിടഞ്ഞു. അവൾ പൊട്ടിക്കരയാൻ ആഗ്രഹിച്ചു. അതേസമയം, കരയുന്നതിൽ ലജ്ജിച്ചു. അയാൾ അവൾക്കു നേരേ വീണ്ടും കൈ ഉയർത്തിയെങ്കിലും വേദനിപ്പിക്കാൻ കൂടുതൽ നല്ല മാർഗ്ഗം മറ്റൊന്നാണ് എന്ന മട്ടിൽ അവളുടെ കൈയിൽനിന്നു പുസ്തകം പിടിച്ചുവാങ്ങി വലിച്ചെറിഞ്ഞു. ജെസബെലിന്റെ നിയന്ത്രണം വിട്ടു. അവൾ കിതച്ചു. ദ്രവിച്ചു. കണ്ണുനീർ അവളെ അപമാനിച്ച് അണപൊട്ടിയപ്പോൾ അവൾ വസ്ത്രം മാറി ബാഗെടുത്ത് സ്‌കൂട്ടറിന്റെ കീയുമായി പുറത്തേക്കു പാഞ്ഞു, മുറ്റത്തു വീണു കിടന്ന പുസ്തകം എടുത്തു ബാഗിലിട്ടു. സ്‌കൂട്ടർ സ്റ്റാർട്ട് ചെയ്ത ശബ്ദം കേട്ട് ജെറോം വാതിൽക്കൽ എത്തുന്നതു മിററിലൂടെ കണ്ടു. തിരിഞ്ഞു നോക്കാതെ പാഞ്ഞു. ജങ്ഷനിലെ തിരക്കിൽ ഒന്നു രണ്ടു തവണ അവളുടെ വണ്ടി മറ്റു വണ്ടികളുമായി കൂട്ടിയിടിക്കാൻ ആഞ്ഞു. ആളുകൾ തുറിച്ചുനോക്കി. ശകാരിച്ചു'.

സുര്യനെ അണിഞ്ഞ ഒരു സ്ത്രീ
കെ. ആർ. മീര
ഡി. സി. ബുക്‌സ്
വില: 380 രൂപ

ഷാജി ജേക്കബ്‌    
കേരള സര്‍വകലാശാലയില്‍ ഗവേഷകവിദ്യാര്‍ത്ഥിയായിരുന്ന കാലത്ത് കലാകൗമുദി വാരികയില്‍ തുടര്‍ച്ചയായി ലേഖനങ്ങളും ഫീച്ചറുകളും എഴുതിത്തുടങ്ങി. ആനുകാലികങ്ങളിലും, പുസ്തകങ്ങളിലും, പത്രങ്ങളിലും രാഷ്ട്രീയസാംസ്‌കാരിക വിഷയങ്ങളെ സംബന്ധിച്ച നിരവധി ലേഖനങ്ങളും പഠനങ്ങളും എഴുതിയിട്ടുണ്ട്. അക്കാദമിക നിരൂപണരംഗത്തും മാദ്ധ്യമവിമര്‍ശനരംഗത്തും സജീവമായ വിവിധ വിഷയങ്ങളില്‍ ഷാജി ജേക്കബിന്റെ നൂറുകണക്കിനു രചനകള്‍ പുറത്തുവന്നിട്ടുണ്ട്.

Readers Comments

മലയാളത്തിൽ ടൈപ്പ്‌ ചെയ്യാൻ ഇവിടെ ക്ലിക്ക്‍ ചെയ്യുക
കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

MNM Recommends

TODAYLAST WEEKLAST MONTH
ഒരുകോടി ദിർഹം കൊടുക്കാതെ ചെക്ക് കൊടുത്ത് പറ്റിച്ചു; പത്ത് വർഷമായി ചോദിച്ചിട്ടും തിരിച്ച് തന്നില്ല; ചർച്ച ചെയ്ത് പരിഹരിക്കാം എന്ന് പറഞ്ഞ് വിളിച്ചുവരുത്തി അറസ്റ്റ് ചെയ്യിപ്പിച്ചു; ബിഡിജെഎസ് ചെയർമാനും വെള്ളാപ്പള്ളിയുടെ മകനുമായ തുഷാർ വെള്ളാപ്പള്ളിയെ അറസ്റ്റ് ചെയ്ത് ജയിലിൽ അടച്ചത് അജ്മാൻ പൊലീസ്; തുഷാറിനെ പുറത്തിറക്കാൻ ഗൾഫിലെ പ്രമുഖ മലയാളി വ്യവസായികളെല്ലാം പാഞ്ഞെത്തിയെങ്കിലും പരാതിക്കാരനായ നാസിൽ അബ്ദുള്ള ഉറച്ച് നിന്നതിനാൽ തുഷാറിനെ ഇരുമ്പഴിക്കുള്ളിൽ അടച്ച് യുഎഇ പൊലീസ്
തട്ടം ധരിക്കുന്ന നിന്നെ എനിക്ക് ഇഷ്ടമല്ല; എന്റെ കൂടെ ജീവിക്കണമെങ്കിൽ മോഡേണാകണമെന്ന് ഭർത്താവിന്റെ വാട്‌സാപ്പ് മെസേജ്; ഉപേക്ഷിക്കരുതെന്ന് കാല് പിടിച്ച് അപേക്ഷിച്ചിട്ടും ചെവിക്കൊണ്ടില്ല; `ഉപ്പയുടേയും ഉമ്മയുടേയും കൂടെ ജീവിച്ച് എനിക്ക് കൊതി തീർന്നില്ല`; ഇവിടെ ഈ പീഡനം സഹിക്കാൻ ഇനിയും എനിക്ക് കരുത്തില്ല; ഭർതൃ വീട്ടിൽ ഫിദ നേരിട്ടത് ക്രൂരമായ പീഡനം; യുവതിയുടെ ആത്മഹത്യയിൽ ഭർത്താവും പിതാവും അറസ്റ്റിൽ
ഈ സ്ത്രീയുണ്ടല്ലോ... ഷാനി പ്രഭാകരൻ താങ്കളിലേക്ക് ചീറ്റിയത് ദേശീയ മാധ്യമങ്ങൾ എല്ലാം ചേർന്ന് ചീറ്റിയതതിലും അധികം വിഷമാണ്! താങ്കളെ കുറിച്ച് സ്വാഗത പ്രസംഗത്തിൽ ഇവർ നല്ലത് പറയുന്നത് കേട്ടാൽ ഞങ്ങൾക്ക് ചർദ്ദിക്കാൻ വരും! മനോരമ കോൺക്ലേവിൽ പങ്കെടുക്കാൻ മോദി എത്തുമെന്ന നിഷാ പുരുഷോത്തമന്റെ ട്വീറ്റ് പിൻവലിച്ചതിലും ആശ്വാസം കണ്ട് പരിവാറുകാർ; മനോരമ ന്യൂസിന്റെ പരിപാടിയിൽ പ്രധാനമന്ത്രി എത്തുമോ? ആർ എസ് എസ് ഉയർത്തുന്നത് അതിശക്തമായ പ്രതിഷേധം
നേരാ തിരുമേനീ.. ഈപ്പച്ചൻ ഔട്ട്‌സ്‌പോക്കൺ ആണെന്ന് എം.ജി.സോമൻ പറഞ്ഞപ്പോൾ കൈയടി കിട്ടിയത് മണർകാട് പാപ്പനും കൂടി; പാപ്പൻ മോഹിച്ച് കെട്ടിയ പാലാ മഹാറാണിയും യുവറാണിയും അടങ്ങുന്ന മണർകാട് തിയേറ്റർ സമുച്ചയത്തിന് ശനിദശ; ജെ.ജെ.ഹോളിഡേ പ്രൈവറ്റ് റിസോർട്ടിന് വേണ്ടി ഉടമകൾ വരുത്തി വച്ചത് എട്ടരക്കോടിയിലേറെ ബാധ്യത; സർഫാസി നിയമപ്രകാരം തിയേറ്റർ സമുച്ചയവും മൂന്നാറിലെ ടി ആൻഡ് യു ലീഷർ ഹോട്ടലും ഏറ്റെടുത്ത് ഇടുക്കി ജില്ലാ സഹകരണ ബാങ്ക്
സ്റ്റാർ ഇന്ത്യ മുൻ സിഇഒ പീറ്റർ മുഖർജിക്കും ഭാര്യ ഇന്ദ്രാണിക്കും വഴിവിട്ട സഹായം നൽകിയത് ഒന്നാം യുപിഎയിലെ ധനകാര്യ മന്ത്രിയായിരിക്കെ; അഴിമതി ആരോപണത്തിൽ സിബിഐയും കള്ളപ്പണം വെളുപ്പിക്കലിൽ എൻഫോഴ്‌സ്‌മെന്റും കേസ് രജിസ്റ്റർ ചെയ്തത് 2017ൽ; മുൻ ധനകാര്യ മന്ത്രി നിയമസംവിധാനങ്ങളെ വെല്ലുവിളിച്ചത് അന്വേഷണത്തിന്റെ ഒരു ഘട്ടത്തിലും സഹകരിക്കാതെ; നാടകീയതയുടെ അങ്ങേയറ്റത്തിന് ശേഷം ചിദംബരം വലയിലാകുമ്പോൾ കോൺഗ്രസും പ്രതിരോധത്തിൽ
ഗുജറാത്തിലെ ആഭ്യന്തര മന്ത്രിയെ സിബിഐ മൂന്ന് മാസം അഴിക്കുള്ളിലാക്കിയത് ഒൻപതുകൊല്ലം മുമ്പ്; അതിതീവ്ര നിലപാട് കാരണം സുപ്രീംകോടതി ജാമ്യം നൽകിയിട്ടും സ്വന്തം വീട്ടിൽ പോലും പോകാനായില്ല; വ്യാജ ഏറ്റുമുട്ടൽ കേസിന് പിന്നിൽ അന്നത്തെ കേന്ദ്ര ആഭ്യന്ത്രമന്ത്രി ചിദംബരമെന്ന് ആരോപിച്ച് രാഷ്ട്രീയം ചർച്ചയാക്കി; കോടതി വെറുതെ വിട്ടപ്പോൾ സകല അടവും പയറ്റി മോദിയെ പ്രധാനമന്ത്രിയാക്കി; രണ്ടാമൂഴത്തിൽ ആഭ്യന്തരം ഏറ്റെടുത്ത് പകവീട്ടൽ; ചിദംബരത്തിന്റെ അറസ്റ്റിന് പിന്നിൽ അമിത് ഷായുടെ പ്രതികാരമോ?
ഐഎൻഎക്‌സ് മീഡിയ കേസിൽ പി ചിദംബരം അറസ്റ്റിൽ; ഡൽഹി ജോർബാഗിലെ വീട്ടിൽ നിന്ന് മുൻ മന്ത്രിയെ പിടികൂടി സിബിഐ; അറസ്റ്റ് ചെയ്തത് ഡൽഹി പൊലീസിന്റെ സഹായത്തോടെ; വലയിലായത് മുൻകൂർ ജാമ്യാപേക്ഷ വെള്ളിയാഴ്ച സുപ്രീം കോടതി പരിഗണിക്കാനിരിക്കവെ; എഐസിസി ആസ്ഥാനത്ത് വെച്ച് നഷ്ടപ്പെട്ട നേതാവിനെ പിടികൂടിയത് വീടിന്റെ മതിൽ ചാടിക്കടന്നും; സിബിഐ സംഘത്തെ കണ്ട് വീട് പൂട്ടിയിട്ടും മുൻ മന്ത്രി കുടുങ്ങി; വീടിന് മുന്നിൽ പ്രതിഷേധവുമായി കോൺഗ്രസ് പ്രവർത്തകർ
വേനലവധിക്കാലത്ത് വീട്ടിലേക്ക് പോയ ഭാര്യയും കുട്ടികളും എത്ര വിളിച്ചിട്ടും മടങ്ങിയില്ല; കൂട്ടിക്കൊണ്ട് പോകാൻ എത്തിയപ്പോൾ മക്കളെ മാത്രം കൂടെ വിട്ടു; സണ്ണിയും മക്കളും പോയതിന് പിന്നാലെ സ്റ്റേഷനിലെത്തി ബിൻസി പറഞ്ഞത് കുട്ടികളെ തട്ടിക്കൊണ്ട് പോയെന്ന്; അന്വേഷിച്ച് സ്റ്റേഷനിലെത്തിയ സണ്ണിയുടെ പിതാവ് കണ്ടത് എണീറ്റ് നിൽക്കാൻ ആവതില്ലാത്ത മകനെ; കോട്ടയം മെഡിക്കൽ കോളേജിൽ കഴിയുന്ന സണ്ണിയെ ഏമാന്മാർ കൈകാര്യം ചെയ്തത് ഒരു രാത്രി മുഴുവൻ
2000ൽ നാവായിക്കുളത്ത് നിക്കാഹ്; രണ്ടാം ഗർഭം അലസിപ്പിച്ചത് തന്നിഷ്ട പ്രകാരം; പുരുഷ സുഹൃത്തുക്കളുമായുള്ള ഭാര്യയുടെ സൗഹൃദം ബഹറിനിലെ ബിസിനസിനെ തകർത്തു; യുഎഇയിൽ നിഷേധിച്ചത് ഭർത്താവിന്റെ അവകാശങ്ങൾ; തിരുവനന്തപുരത്ത് നിശാ ക്ലബ്ബുകളിൽ ഉല്ലസിപ്പിച്ചപ്പോൾ തകർന്നത് തന്റെ ജീവിതം; ശ്രീറാമുമായുള്ള അപകടത്തെ കുറിച്ച് ചോദിച്ചപ്പോൾ കിട്ടിയത് അസഭ്യം; വഫായ്‌ക്കെതിരെ വിവാഹ മോചന ഹർജിയിൽ ഭർത്താവ് ഉന്നയിക്കുന്നത് ഗുരുതര ആരോപണങ്ങൾ; ഏഷ്യാനെറ്റ് ന്യൂസിലെ അഭിമുഖ വാദമെല്ലാം പൊളിയുമ്പോൾ
ഇസ്ലാമികമല്ലാത്ത ജീവിതരീതി; പരപുരുഷ ബന്ധം; അനുമതിയില്ലാതെ വിദേശയാത്രകൾ; തന്റെ ചെലവിൽ വാങ്ങിയ കാർ സ്വന്തം പേരിൽ രജിസ്റ്റർ ചെയ്ത് ഇഷ്ടാനുസരണം രഹസ്യയാത്രകൾ; വഴിവിട്ട ജീവിതം ചോദ്യം ചെയ്തപ്പോൾ പറഞ്ഞത് തന്റെ കാര്യങ്ങളിൽ ഇടപെട്ടാൽ പാഠം പഠിപ്പിക്കുമെന്ന്; വഫയ്ക്ക് കേരളത്തിലുള്ളത് ഉന്നത ബന്ധങ്ങളെന്നും വിവാഹമോചന ഹർജിയിൽ ആരോപണം; ഫിറോസ് വിവാഹ മോചനത്തിന്; ശ്രീറാമിനൊപ്പം സഞ്ചരിച്ച വഫ ഏഷ്യാനെറ്റ് ന്യൂസിനോട് പറഞ്ഞതെല്ലാം പച്ചക്കള്ളം
സ്‌കൂളിൽ തല കറങ്ങി വീണ പന്ത്രണ്ടുകാരി; അദ്ധ്യാപകർ ആശുപത്രിയിൽ എത്തിയപ്പോൾ അറിഞ്ഞത് ഗർഭിണിയെന്ന വിവരം; അബോർഷൻ നടന്നപ്പോൾ ചൈൽഡ് ലൈനുകാരും ഓടിയെത്തി; പുറത്തു വന്നത് പതിനൊന്നുകാരന്റെ പീഡന കഥ; ബന്ധുവായ ബാലനെതിരെ ബലാത്സംഗം കുറ്റം ചുമത്തി പോക്‌സോ കേസെടുത്ത് പൊലീസ്; പീഡനം നടന്നത് രണ്ട് കുട്ടികളും ഒരു വീട്ടിൽ താമസിക്കുമ്പോൾ; പീഡനം തെളിയിക്കാൻ ഇനി ഡിഎൻഎ ടെസ്റ്റ്; കേരളം ചർച്ച ചെയ്യുന്ന വിചിത്ര പീഡനക്കേസ് ഇങ്ങനെ
നിന്റെ തന്ത കറിയ തന്നെയാണെങ്കിൽ കിട്ടിയ അടിയുടെയും ഇടിയുടെയും നിലവിളിയുടെയും വീഡിയോ പുറത്തുവിടെടാ...ഊളെ എന്ന തെറ്റിദ്ധരിപ്പിക്കൽ പോസ്റ്റുമായി പ്രീജിത്ത് രാജ്; രഹസ്യ ക്യാമറ വെച്ചെന്ന് പരസ്യമായി വിളിച്ചു പറയുന്ന 'സ്‌കങ്കറിയ' പേടിയുടെ അവസ്ഥാന്തരമെന്ന് ദീപാ നിശാന്ത്; നാണമില്ലാത്തവന്റെ ആസനത്തിൽ ആൽ മുളച്ചാൽ അതുമൊരു തണൽ എന്ന് സുനിതാ ദേവദാസിന്റെ ഉപദേശവും: വിനു ജോണിനെ കടന്നാക്രമിക്കുന്നവർ മറുനാടനേയും വെറുതെ വിടുന്നില്ല; വ്യാജ ആരോപണവുമായി വീണ്ടും സൈബർ സഖാക്കൾ
ശ്രീറാമിനെ വഫ വണ്ടിയിൽ കയറ്റിയ കവടിയാർ കൊട്ടാരത്തിനു സമീപത്ത് അവിടെ നടന്നതിനെല്ലാം സാക്ഷിയായി ബഷീറും ഉണ്ടായിരുന്നിരിക്കാം; ആ ഫോൺ കണ്ടെടുക്കാൻ സാധിച്ചാൽ കേസിന്റെ കഥ മാറും; പൊലീസുകാരൻ രാത്രി 1.56ന് ഫോണിലേക്ക് വിളിച്ചിരുന്നു; മറുതലയ്ക്കൽ ആരോ ഫോൺ എടുക്കുകയും കട്ട് ചെയ്യുകയും ചെയ്തു; അതിനു ശേഷം ആ ഫോൺ ഓൺ ആയിട്ടില്ല: മ്യൂസിയത്തിലെ അപകടത്തിലെ ദുരൂഹത ചർച്ചയാക്കി സോഷ്യൽ മീഡിയ: അന്വേഷണത്തിൽ നിറയുന്നത് കള്ളക്കളികൾ തന്നെ
അടിയന്തര ബ്രേക്കിങ്! അയൽവാസിയെ കേറിപ്പിടിച്ചതിന് വിനു വി ജോൺ എന്നയാളെ നാട്ടുകാർ എടുത്തിട്ട് പെരുമാറി: ചാനൽ അവതാരകനെതിരെ വ്യാജ വിവരം പോസ്റ്റ് ചെയ്തത് ഡിവൈഎഫ്‌ഐയുടെ താനൂർ മേഖലാ സെക്രട്ടറി; അപമാനിക്കൽ പോസ്റ്റിനെതിരെ ഡിജിപിക്ക് പരാതി നൽകാൻ ഏഷ്യാനെറ്റ് ന്യൂസ് മാധ്യമ പ്രവർത്തകൻ; സഖാക്കളുടെ സൈബർ ഗുണ്ടായിസത്തിന്റെ വികൃത മുഖം കണ്ട് ഞെട്ടി സോഷ്യൽ മീഡിയ; കേസും അറസ്റ്റും ഒഴിവാക്കാൻ ന്യായീകരണത്തിന്റെ പുതു തന്ത്രവുമായി ഷിഹാബ് അമനും
ദുരിതാശ്വാസനിധിയിൽ വേഗം പണമെത്തി, എന്നാൽ പണം വേഗത്തിൽ അർഹതപ്പെട്ടവരിലേക്ക് എത്തിയില്ല; നമുക്കൊരു മുഖ്യമന്ത്രിയുണ്ട്, മന്ത്രിമാരുണ്ട്, എംപിമാരുണ്ട്, എംഎൽഎമാരുണ്ട്.. ഒരു സംവിധാനം മുഴുവൻ ഉണ്ട്; എന്നിട്ടും ജനങ്ങളിലേക്ക് എന്തുകൊണ്ട് സഹായം എത്തുന്നില്ല? സർക്കാറിനെ വിമർശിച്ച ധർമ്മജൻ ബൊൾഗാട്ടിയെ പച്ചത്തെറി വിളിച്ച് സിപിഎം സൈബർ പോരാളികൾ; നിന്നെ എടുത്തോളാം.. എന്നു ഭീഷണിപ്പെടുത്തി തെറിവിളികൾ
ആറാം വയസുമുതൽ അച്ഛന്റെ കാമാർത്തി തീർക്കാൻ വിധിക്കപ്പെട്ട പെൺകുട്ടി എല്ലാം സഹിച്ചത് നീണ്ട 15 വർഷം; ഗർഭനിരോധന ഉറകളും ഗുളികയും നൽകി സ്വന്തം മകളെ ബലാത്സംഗം ചെയ്യാൻ ഒന്നര പതിറ്റാണ്ടുകാലം കൂട്ടുനിന്നത് പെറ്റമ്മ തന്നെ; എല്ലാം തുറന്ന് പറഞ്ഞ് 22കാരി പരാതി നൽകിയത് അനുജത്തിയെയും അച്ഛനും അമ്മയും കണ്ണുവെച്ചതോടെ
വിവാഹം കഴിഞ്ഞ അബുദാബിക്കാരി! ആഗ്രഹിച്ചത് കേരളത്തിലെ ഉന്നതരുടെ അടുത്ത സുഹൃത്താകാൻ; മോഡലായി തിളങ്ങിയതും സ്വപ്‌ന സമാനമായ സൗഹൃദങ്ങളുടെ കാവൽക്കാരിയാകാൻ; ശ്രീറാം വെങ്കിട്ടരാമനൊപ്പം ഉണ്ടായിരുന്നത് മലയാളിയായ പ്രവാസി യുവതി തന്നെ; ആഘോഷിച്ചത് കൂട്ടുകാരന്റെ പഠനം കഴിഞ്ഞുള്ള മടങ്ങി വരവും; നിവർത്തിയില്ലാതെ ഐഎഎസ് സുഹൃത്തിനെ തള്ളി പറഞ്ഞ് ഒടുവിൽ മലക്കം മറിച്ചിൽ; മ്യൂസിയത്തെ അപകടത്തിൽ വിവാദത്തിലാകുന്നത് വാഫാ ഫിറോസ് എന്ന പട്ടം മരപ്പാലത്തുകാരി
ശബരിമല ഓപ്പറേഷന് ചുക്കാൻ പിടിച്ച എസ്‌പി ഹരിശങ്കർ ഐപിഎസിന്റെ അമ്മായിഅപ്പൻ; ഇടതുപക്ഷത്തോട് അടുപ്പമുള്ള പഴയ എസ് എൻ ഡി പി നേതാവ്; മേൽപ്പാലത്തിൽ ക്രമക്കേട് കണ്ടെത്തിയ അസിസ്റ്റന്റ് ഏക്‌സിക്യുട്ടീവ് എൻജിനിയർ ചർച്ചയാക്കിയത് എം സി റോഡിൽ കോട്ടയം സംക്രാന്തിയിലെ പാലം കുളമാക്കിയ കോൺട്രാക്ടറുടെ മറ്റൊരു കള്ളക്കളി; ശ്രീധന്യയും കളിമാനൂർ ചന്ദ്രബാബുവും സുധാകര മന്ത്രിക്ക് വേണ്ടപ്പെട്ടവർ; വൈറ്റിലയിൽ സത്യം മറയ്ക്കാൻ ശ്രമിക്കുന്നത് സിപിഎം ബന്ധമുള്ള അതിവിശ്വസ്തനെ രക്ഷിച്ചെടുക്കാൻ തന്നെ
ചതിച്ചതാണ്.. എന്നെ ചതിച്ചതാണ്; ചാനൽ പരിപാടിക്കിടെ കുടിവെള്ളം എന്നപേരിൽ എല്ലാവർക്കും കൊടുക്കുന്ന ഗ്ലാസിന് പകരം എനിക്ക് വേറൊരു ഗ്ലാസിൽ എന്തോ തന്നു; പിന്നീട് ഞാൻ പറഞ്ഞതൊന്നും സ്വബോധത്തോടെയല്ല; പരിപാടി കഴിഞ്ഞ് അരമണിക്കൂർ കഴിഞ്ഞിട്ടും തലയുടെ മത്ത് മാറിയിട്ടില്ല; ഈ ചാനൽ പരിപാടിയിൽ ഞാൻ പറഞ്ഞതൊക്കെ ഈ രീതിയിലെ കാണാവൂ എന്ന് മോഹനൻ വൈദ്യർ; ട്വന്റിഫോർ ന്യൂസിലെ ജനകീയകോടതി പരിപാടിയിൽ ഉത്തരം മുട്ടിയപ്പോൾ പുതിയ അടവുമായി വിവാദ ചികിൽസകൻ
അടിച്ചു പൂസായി കാൽ നിലത്തുറയ്ക്കാത്ത നിലയിൽ കാറിൽ നിന്ന് ഇറങ്ങിയത് മൂന്നാറിനെ വിറപ്പിച്ച ഐഎഎസുകാരൻ; ഒപ്പം ഉണ്ടായിരുന്നത് പെൺ സുഹൃത്തും; വണ്ടിയോടിച്ചത് താനല്ല കൂട്ടുകാരിയാണെന്ന് പറഞ്ഞിട്ടും സ്ത്രീയുടെ മെഡിക്കൽ എടുക്കാൻ പോലും മടിച്ച് പൊലീസ്; ശ്രീറാം വെങ്കിട്ടരാമന്റെ കാറിടിച്ചു കൊന്നത് തലസ്ഥാനത്തെ സൗമ്യനായ പത്രക്കാരനെ; സിറാജിലെ ബഷീറിന്റെ ജീവനെടുത്തത് അമിത വേഗതയിലെ അലക്ഷ്യമായ ഡ്രൈവിങ്; മ്യൂസിയത്തെ ആക്‌സിഡന്റിൽ ഇനി നിർണ്ണായകം സിസിടിവി
റിട്ട.ഐഎഎസ് ഉദ്യോഗസ്ഥന്റെ കൈയിലെ രേഖ പുറത്ത്; ഓർത്തഡോക്‌സ്-യാക്കോബായ സഭാതർക്കത്തിൽ വൻവഴിത്തിരിവ്; 1934ലെ ഭരണഘടനയുടെ കയ്യെഴുത്ത് പ്രതി കോടതിയിലും മന്ത്രിസഭാ ഉപസമിതിയിലും സമർപ്പിച്ച് യാക്കോബായ സഭ; അവകാശവാദം ഭരണഘടനയുടെ യഥാർഥ കോപ്പിയെന്ന്; ഭരണഘടന അന്ത്യോഖ്യാ പാത്രിയർക്കീസിന്റെ യഥാർത്ഥ അധികാരങ്ങൾ വിശദീകരിക്കുന്നതെന്ന് യാക്കോബായ സഭ; ഓർത്തഡോക്‌സ് സഭ അസൽ ഹാജരാക്കാതെ ഏകപക്ഷീയമായി ഭരണഘടന ഭേദഗതി ചെയ്‌തെന്ന വാദത്തിന് ഇനി ചൂടുകൂടും
ശ്രീറാം വെങ്കിട്ടരാമന്റെ അപകടത്തിൽ ഹണി ട്രാപ്പ് മണക്കുന്നു; വഫയുടെ ഉന്നത ബന്ധങ്ങളും മുഖ്യമന്ത്രിയുടെ നിലപാടും വ്യക്തമാക്കുന്നത് ചതിക്കപ്പെട്ടുവെന്ന് തന്നെ; വാഹനം ഓടിച്ചത് ശ്രീറാം തന്നെയോ എന്ന വിഷയം വീണ്ടും ചർച്ചയാകുന്നു; ശ്രീറാമിന്റെ പാർട്ടിയിൽ വഫയും ഉണ്ടായിരുന്നുവെന്ന് സംശയിച്ച് പൊലീസ്; മെറിൻ ജോസഫിന്റെ ദുരൂഹമായ ഇടപെടലും ചർച്ചയാകുന്നു; മാധ്യമ പ്രവർത്തകൻ ബഷീറിന്റെ അപകട മരണത്തിന് പിന്നിലെ യഥാർത്ഥ കാരണം അജ്ഞാതമോ?
കവടിയാറിൽ ശ്രീറാമും വഫയും നിൽക്കുന്നത് കണ്ട് ബഷീർ ഫോട്ടോ എടുത്തു? വൈരാഗ്യം തീർക്കാൻ പിന്തുടർന്ന് കാറിടിച്ചു കൊലപ്പെടുത്തിയതോ? മരിച്ച മാധ്യമ പ്രവർത്തകന്റെ മൊബൈൽ അപ്രത്യക്ഷമായതും ദുരൂഹം; ഒന്നര കിലോമീറ്റർ ദൂരത്തെ ക്യാമറകളെല്ലാം ഒരേസമയം കണ്ണടച്ചതും സംശയകരം; ശ്രീറാമിനെ കുടിപ്പിച്ച് ബോധം കെടുത്തിയത് ജില്ലാ കളക്ടറോ? മദ്യപരിശോധന താമസിപ്പിച്ചതും ജില്ലാ മജിസ്‌ട്രേട്ടെന്ന് ആരോപണം; മെറിൻ ജോസഫിന് പിന്നാലെ ഗോപാലകൃഷ്ണൻ ഐഎഎസും സംശയ നിഴലിൽ; പകച്ച് പൊലീസും
കെട്ടിടത്തിനകത്ത് എന്തായിരുന്നു പണി? മഴയും തണുപ്പും ആസ്വദിക്കാനെത്തിയതാണോ? ഞങ്ങളോടും സഹകരിച്ചിട്ട് പോയാൽ മതി; കയർത്തതോടെ കൈയേറ്റം; സിഫ്റ്റ് കാറിൽ നേതാക്കളെത്തിയത് കോളേജ് കെട്ടിടത്തിന് പുറത്തെ ഒഴിഞ്ഞ കോണിൽ മദ്യപിച്ച് ആർത്തുലസിക്കാൻ; മഴപ്പേടിയിൽ ഫയലുകൾ ഭദ്രമാക്കാൻ ഭർത്താവിനൊപ്പം എത്തിയ ജീവനക്കാരിക്ക് നേരെ സഖാക്കൾ നടത്തിയത് സദാചാരത്തിന്റെ വികൃത മുഖം; പൊലീസ് ശ്രമം സിപിഎമ്മുകാരെ രക്ഷിക്കാനും; പരുമലയിൽ ഹരികുമാറും അനൂപും വില്ലന്മാരാകുമ്പോൾ
2000ൽ നാവായിക്കുളത്ത് നിക്കാഹ്; രണ്ടാം ഗർഭം അലസിപ്പിച്ചത് തന്നിഷ്ട പ്രകാരം; പുരുഷ സുഹൃത്തുക്കളുമായുള്ള ഭാര്യയുടെ സൗഹൃദം ബഹറിനിലെ ബിസിനസിനെ തകർത്തു; യുഎഇയിൽ നിഷേധിച്ചത് ഭർത്താവിന്റെ അവകാശങ്ങൾ; തിരുവനന്തപുരത്ത് നിശാ ക്ലബ്ബുകളിൽ ഉല്ലസിപ്പിച്ചപ്പോൾ തകർന്നത് തന്റെ ജീവിതം; ശ്രീറാമുമായുള്ള അപകടത്തെ കുറിച്ച് ചോദിച്ചപ്പോൾ കിട്ടിയത് അസഭ്യം; വഫായ്‌ക്കെതിരെ വിവാഹ മോചന ഹർജിയിൽ ഭർത്താവ് ഉന്നയിക്കുന്നത് ഗുരുതര ആരോപണങ്ങൾ; ഏഷ്യാനെറ്റ് ന്യൂസിലെ അഭിമുഖ വാദമെല്ലാം പൊളിയുമ്പോൾ
വേദനകൾ ഇല്ലാത്ത ലോകത്തേക്ക് പറന്നകന്ന്‌ അനിതാ തച്ചങ്കരി; ഡിജിപി ടോമിൻ ജെ തച്ചങ്കരിയുടെ ഭാര്യ മരണത്തിന് കീഴടങ്ങിയത് പുലർച്ചെ മൂന്ന് മണിക്ക് കൊച്ചിയിലെ സ്വവസതിയിൽ; സംരംഭക എന്ന് പേരെടുത്ത അനിത മടങ്ങുന്നത് രണ്ടു പെൺമക്കളെയും കെട്ടിച്ചയച്ച സന്തോഷം ബാക്കിയാക്കി; ആദരാഞ്ജലികളുമായി കേരളം തമ്മനത്തെ വീട്ടിലേക്ക്