ലോക പുകയില വിരുദ്ധ ദിനാചരണത്തിന്റെ ഭാഗമായി ഖത്തറിലെ ആന്റി സ്മേക്കിങ് സൊസൈറ്റി ചിത്രപ്...

ലോക പുകയില വിരുദ്ധ ദിനാചരണത്തിന്റെ ഭാഗമായി ഖത്തറിലെ ആന്റി സ്മേക്കിങ് സൊസൈറ്റി ചിത്രപ്രദർശനം ഒരുക്കി

May 31, 201803:07 PM IST Permalink

ദോഹ: പുകവലിയില്ലാത്ത സമൂഹത്തെ സൃഷ്ടിക്കുന്നതിലൂടെ ഹൃദ്രോഗത്തെ ഒരു പരിധിവരെ പ്രതിരോധിക്കാനാകുമെന്നും ഈ രംഗത്ത് വ്യക്തികളും സമൂഹവും ഉത്തരവാദിത്തം നിറവേറ്റണമെന്നും ലോക പുകയില വിരുദ്ധ ദിനാചരണത്തിന്റെ ഭാഗമായി ഖത്തർ പൊതുജനാരോഗ്യ മന്ത്രാലയവുമായി സഹകരിച്ച് ആന്റി സ്മോക്കിങ് സൊസൈറ്റി സംഘടിപ്പിച്ച പരിപാടിയിലെ പ്രസംഗകർ അഭിപ്രായപ്പെട്ടു. സ്‌കിൽസ് ഡവലപ്മെന്റ് സെന്റർ ഓഡിറ്റോറിയത്തിൽ നടന്ന പരിപാടികൾ സൊസൈറ്റി ഗ്ളോബൽ ചെയർമാൻ ഡോ. മുഹമ്മദുണ്ണി ഒളകര ഉദ്ഘാടനം ചെയ്തു.

പുകയിലയും ഹൃദ്രോഗവുമെന്ന സുപ്രധാനമായ പ്രമേയം ചർച്ചക്ക് വച്ചാണ് ലോകാരോഗ്യ സംഘടനയും അനുബന്ധ സ്ഥാപനങ്ങളും ഈ വർഷത്തെ പുകയില വിരുദ്ധ ദിനം ആചരിക്കുന്നതെന്നും ലോകാടിസ്ഥാനത്തിൽ തന്നെ ആരോഗ്യ രംഗത്തെ ശക്തമായ വെല്ലുവിളിയായി മാറിയ ഹൃദ്രോഗത്തിന്റെ വ്യാപനത്തിൽ പുകയില ഉൽപന്നങ്ങളുടെ പങ്ക് ശാസ്ത്രീയമായി തെളിയിക്കപ്പെട്ട സാഹചര്യത്തിൽ പുകയില ഉൽപന്നങ്ങളുടെ ഉപഭോഗം നിയന്ത്രിക്കുന്നതിലൂടെ ഹൃദ്രോഗം തടയാനാകുമെന്ന സന്ദേശമാണ് ഈ പ്രമേയം മുന്നോട്ട് വെക്കുന്നതെന്നും അദ്ദേഹം പറഞ്ഞു.

ലോകത്ത് ഏറ്റവും കൂടുതലാളുകൾ മരണപ്പെടുന്നത് ഹൃദ്രോഗം കാരണമായാണ്. രക്ത സമ്മർദ്ദം കഴിഞ്ഞാൽ ഹൃദ്രോഗത്തിന് ആക്കം കൂട്ടുന്ന പ്രധാന വില്ലൻ പുകവലിയും പുകയില ഉൽപന്നങ്ങളുടെ ഉപഭോഗവുമാണ്. ഔദ്യോഗിക കണക്കുകളനുസരിച്ച് ഏകദേശം 12 ശതമാനം ഹൃദ്രോഗങ്ങൾക്കും പുകവലി നേരിട്ടോ അല്ലാതെയോ കാരണമാണെന്നാണ് പഠനങ്ങൾ തെളിയിക്കുന്നത്. പുകയില ഹൃദയങ്ങൾ തകർക്കുന്നു. അതിനാൽ ആരോഗ്യം തെരഞ്ഞെടുക്കുക. പുകയിലയെയല്ല എന്ന ലോക പുകയില വിരുദ്ധ ദിന സന്ദേശം ഏറെ കാലിക പ്രാധാന്യമുള്ളതാണ്.
വൈദ്യശാസ്ത്ര പരമായി ലോകം പുരോഗമിക്കാത്ത കാലത്ത് മനുഷ്യൻ അനുഭവിച്ച മിക്ക പ്രയാസങ്ങളും മാറാരോഗങ്ങൾ, അണുബാധ, മരുന്നുകളുടെ ദൗർലഭ്യത എന്നിവയുമായി ബന്ധപ്പെട്ടവയായിരുന്നു. എന്നാൽ ശാസ്ത്രീയരംഗത്തും വൈദ്യ മേഖലയിലും കൈവരിച്ച പുരോഗതി ഈ പ്രയാസങ്ങൾ ദൂരീകരിക്കാൻ സഹായിച്ചെങ്കിലും മനുഷ്യന്റെ ബിഹേവിയറൽ ഡിസ് ഓർഡറുകളും അശാസ്ത്രീങ്ങളായ ജീവിത രീതികളും എല്ലാവർക്കും ആരോഗ്യമെന്ന മഹത്തായ ലക്ഷ്യസാക്ഷാൽക്കാരത്തിന്റെ മുന്നിൽ വലിയ തടസ്സമായി നിലകൊള്ളുകയാണ്. ഈ രംഗത്ത് ഏറ്റവും വലിയ വില്ലനായി നിലകൊള്ളുന്ന ഒരു ദുസ്വഭാവമാണ് പുകവലി. ഇതിനെതിരെ ശക്തമായ ബോധവൽക്കരണ പരിപാടികൾ അനിവാര്യമാണെന്ന് ചടങ്ങിൽ വിഷയമവതരിപ്പിച്ച് സംസാരിച്ച സൊസൈറ്റി പ്രസിഡണ്ട് ഡോ. അബ്ദുൽ റഷീദ് പറഞ്ഞു.

ഏതൊരു സാമൂഹ്യ തിന്മയുടെ നിർമ്മാർജനത്തിലും സന്നദ്ധപ്രവർത്തനങ്ങൾക്കും സേവനങ്ങൾക്കും വലിയ പങ്ക് വഹിക്കാനുണ്ട്. സമൂഹ ഗാത്രത്തെ കാർന്ന് തിന്നുകൊണ്ടിരിക്കുന്ന പുകവലി അവസാനിപ്പിക്കുന്നതിലും ഗവൺമെന്റ് തലത്തിലുള്ള എല്ലാ നിയമപരമായ സഹായങ്ങളോടുമൊപ്പം സമൂഹത്തിന്റെ കൂട്ടായ്മക്ക് വമ്പിച്ച സ്വാധീനം ചെലുത്താൻ കഴിയും. പുകവലി വിരുദ്ധ പ്രവർത്തനങ്ങൾ ഏതെങ്കിലും സവിശേ,മായ ദിനങ്ങളിൽ പരിമിതപ്പെടുത്താതെ സ്ഥിരമായി നടക്കേണ്ടതാണെന്ന് അദ്ദേഹം ഓർമിപ്പിച്ചു.

മീഡിയ പ്ളസ് സി. ഇ. ഒ. ഡോ. അമാനുല്ല വടക്കാങ്ങര പരിപാടി നിയന്ത്രിച്ചു. സൊസൈറ്റി ചെയർമാൻ ഡോ. എം. പി. ഹസൻകുഞ്ഞി പുകവലി വിരുദ്ധ പ്രതിജ്ഞക്ക് നേതൃത്വം നൽകി. ഐഡിയൽ ഇന്ത്യൻ സ്‌ക്കൂൾ വിദ്യാർത്ഥി സഅദ് അമാനുല്ല, മൈന്റ് ട്യൂൺ എക്കോ വേവ്സ് ഗ്ളോബൽ സെക്രട്ടറി ജനറൽ മശ്ഹൂദ് തിരുത്തിയാട്, ഐ.സി.ബി. എഫ്. വൈസ് പ്രസിഡണ്ട് പി. എൻ. ബാബു രാജൻ എന്നിവർ സംസാരിച്ചു. ദോഹ ബ്യൂട്ടി സെന്റർ മാനേജിങ് ഡയറക്ടർ ഡോ. ഷീല ഫിലിപ്പോസ് ചടങ്ങിൽ വിശിഷ്ട അതിഥിയായിരുന്നു.

പുകയില വിരുദ്ധ പ്രമേയത്തിൽ ഖത്തറിലെ വിവിധ ഇന്ത്യൻ സ്‌ക്കൂൾ വിദ്യാർത്ഥികൾ വരച്ച ചിത്രങ്ങളുടെ പ്രദർശനത്തോടെയാണ് പുകയില വിരുദ്ധ ദിനാചരണ പരിപാടികൾ തുടങ്ങിയത്. പ്രദർശനം ആരോഗ്യ മന്ത്രാലയത്തിലെ ടൊബാക്കോ കൺട്രോൾ സൂപ്പർവൈസർ ഡോ. മജ്ദീ യൂസുഫ് അശൂർ, കമ്മ്യൂണിറ്റി ആൻഡ് ബിഹേവിയറൽ ചെയിഞ്ച് കമ്മ്യൂണിക്കേഷൻ സ്പെഷ്യലിസ്റ്റ് സോഫിയ ബീഗം, ആന്റി സ്മോക്കിങ് ഇൻസ്പെക്ടർമാരായ ബദർ അൽ റുമൈഹി, അഹ്മദ് അൽ നുഐമി, പരിപാടിയുടെ പ്രായോജകരായ ദോഹ ബ്യൂട്ടി സെന്റർ മാനേജിങ് ഡയറക്ടർ ഡോ. ഷീല ഫിലിപ്പോസ് എന്നിവർ ചേർന്ന് ഉദ്ഘാടനം ചെയ്തു.

പുകവലിയുടെ ദൂഷ്യങ്ങളെക്കുറിച്ച് വിപുലമായ ബോധവൽക്കരണ പ്രക്രിയക്ക് ആഹ്വാനം ചെയ്തുകൊണ്ടും ഗുണപരമായ മാറ്റത്തിന് സമൂഹത്തെ സജ്ജമാക്കാനുദ്ദേശിച്ചുകൊണ്ടും 1988 ലാണ് ലോകാരോഗ്യ സംഘടന മെയ് 31 ലോക പുകവലി വിരുദ്ധ ദിനമായി നിശ്ചയിച്ചത്. പുകവലിയുടെ മാരകവിപത്തുകൾ പൊതുജനങ്ങളെ ബോധ്യപ്പെടുത്തി ഈ ദുശ്ശീലത്തിന്നെതിരെ ആവശ്യമായ മുന്നേറ്റങ്ങൾക്കായി സമൂഹത്തിന്റെ വിവിധ കോണുകളിൽ നിന്നായി മുറവിളിയുയരുന്നുണ്ട് എന്നത് ശുഭോദർക്കമാണ്. പക്ഷേ ഇത്തരം പ്രവർത്തനങ്ങൾ ശാസ്ത്രീയമായ പ്രവർത്തന രീതിയും തുടർച്ചയായ ഫോളോഅപ്പുവർക്കുകളുടേയും അഭാവത്തിൽ ഉദ്ദേശിക്കുന്ന ലക്ഷ്യത്തിലെത്തുന്നില്ല. കേവലം പ്രഖ്യാപനങ്ങൾക്കും പ്രചാരവേലകൾക്കുമുപരിയായി ആത്മാർഥമായ കൗൺസിലിങ്, മെഡിസിൻ സൗകര്യങ്ങളോടെയുള്ള ചികിൽസ എന്നിവയിലൂടെ മാത്രമേ പുകവലിയെ കാര്യക്ഷമമായി പ്രതിരോധിക്കാൻ കഴിയുകയുള്ളൂവെന്നാണ് ലോകോരോഗ്യ സംഘടന കരുതുന്നത്.

ഫോട്ടോ 1 : ലോക പുകയില വിരുദ്ധ ദിനാചരണത്തിന്റെ ഭാഗമായി ഖത്തറിലെ ആന്റി സ്മേക്കിങ് സൊസൈറ്റി പൊതുജനാരോഗ്യ മന്ത്രാലയവുമായി സംയുക്തമായി സംഘടിപ്പിച്ച ചിത്രപ്രദർശനം ടൊബാക്കോ കൺട്രോൾ സൂപ്പർവൈസർ ഡോ. മജ്ദീ യൂസുഫ് അശൂർ, കമ്മ്യൂണിറ്റി ആൻഡ് ബിഹേവിയറൽ ചെയിഞ്ച് കമ്മ്യൂണിക്കേഷൻ സ്പെഷ്യലിസ്റ്റ് സോഫിയ ബീഗം, ആന്റി സ്മോക്കിങ് ഇൻസെപെക്ടർമാരായ ബദർ അൽ റുമൈഹി, അഹ്മദ് അൽ നുഐമി, പരിപാടിയുടെ പ്രായോജകരായ ദോഹ ബ്യൂട്ടി സെന്റർ മാനേജിങ് ഡയറക്ടർ ഡോ. ഷീല ഫിലിപ്പോസ് എന്നിവർ ചേർന്ന് ഉദ്ഘാടനം ചെയ്യുന്നു.

Stories you may Like

Readers Comments+

മലയാളത്തിൽ ടൈപ്പ്‌ ചെയ്യാൻ ഇവിടെ ക്ലിക്ക്‍ ചെയ്യുക

കമന്റ് ബോക്‌സില്‍ വരുന്ന അഭിപ്രായങ്ങള്‍ മറുനാടന്‍ മലയാളിയുടേത് അല്ല. മാന്യമായ ഭാഷയില്‍ വിയോജിക്കാനും തെറ്റുകള്‍ ചൂണ്ടി കാട്ടാനും അനുവദിക്കുമ്പോഴും മറുനാടനെ മനഃപൂര്‍വ്വം അധിക്ഷേപിക്കാന്‍ ശ്രമിക്കുന്നവരെയും അശ്ലീലം ഉപയോഗിക്കുന്നവരെയും മറ്റു മലയാളം ഓണ്‍ലൈന്‍ ലിങ്കുകള്‍ പോസ്റ്റ് ചെയ്യുന്നവരെയും മതവൈരം തീര്‍ക്കുന്നവരെയും മുന്നറിയിപ്പ് ഇല്ലാതെ ബ്ലോക്ക് ചെയ്യുന്നതാണ് - എഡിറ്റര്‍

Forex Rate: